ଭଦ୍ରକ ଅଫିସ, ୨୨ା୫: ଭଦ୍ରକରେ ଧଳାଜହର କାରବାର ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଦୁଇଦିନ ତଳେ ଅନ୍ନପାଳ ଛକରେ ହେଲ୍ମେଟ ଯାଞ୍ଚ ବେଳେ ଗ୍ରାମାଞ୍ଚଳ ଥାନା ପୋଲିସ ବାଇକ୍ ଆରୋହୀଙ୍କଠାରୁ ୨୧ ଗ୍ରାମ୍ ବ୍ରାଉନସୁଗାର ଜବତ କରିଥିଲା। ଏଥିସହ ୩ ଯୁବକ ଗିରଫ ହୋଇଥିଲେ। ଶୁକ୍ରବାର ସନ୍ଧ୍ୟାରେ ଭଦ୍ରକ ସହରାଞ୍ଚଳ ଡାହାଣୀଗଡ଼ିଆ ଛକ ନିକଟରୁ ୨୦ ଗ୍ରାମ୍ ବ୍ରାଉନସୁଗାର ଜବତ ସହ ଦୁଇ ଯୁବକଙ୍କୁ ପୋଲିସ ଗିରଫ କରିଛି। ଟାଉନ ପୋଲିସ ହେଲ୍ମେଟ ଚେକିଂ କରୁଥିବା ବେଳେ ବାଇକ୍ରେ ଆସୁଥିବା ୨ଯୁବକଙ୍କ ହାବଭାବରେ ସନ୍ଦେହ ସୃଷ୍ଟି ହେବାରୁ ତଲାସି ନେଇଥିଲା। ସେମାନଙ୍କ ନିକଟରୁ ୨୦ ଗ୍ରାମ୍ ବ୍ରାଉନସୁଗାର, ୫୦ଟି ଖାଲି ପୁଡ଼ିଆ ଓ ୨ଟି ମୋବାଇଲ ଜବତ କରାଯାଇଥିଲା। ଗିରଫ ଦୁଇ ଯୁବକ ହେଲେ ଯାଜପୁର ଜିଲା ଶ୍ରୀରାମପୁର ଅଞ୍ଚଳର ସଞ୍ଜୟ ବେହେରା ଓ ଭଦ୍ରକ ଜିଲା ଭଣ୍ଡାରିପୋଖରୀ ଥାନା ଅଧୀନ ମଠସାହି ଅଞ୍ଚଳର ସତ୍ୟଜିତ ପଣ୍ଡା। ଶନିବାର ସେମାନଙ୍କୁ କୋର୍ଟଚାଲାଣ କରାଯାଇଛି। ଏଥିରେ କେଉଁମାନେ ସମ୍ପୃକ୍ତ ଅଛନ୍ତି ସେ ବିଷୟରେ ଅଧିକ ତଦନ୍ତ ଜାରି ରହିଥିବା ଅତିରିକ୍ତ ଏସ୍ପି ଯତୀନ ପଣ୍ଡା ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
