ଭୁବନେଶ୍ୱର, ୧୫।୭(ବ୍ୟୁରୋ): ଓଡିଶା ପୋଲିସ ଓ କ୍ରାଇମବ୍ରାଞ୍ଚ ରାଜ୍ୟରେ ନିଶା କାରବାର ବନ୍ଦ କରିବାକୁ ଦୀର୍ଘଦିନ ହେବ ସ୍ବତନ୍ତ୍ର ଡ୍ରାଇଭ୍ ଚଳାଇଛି। କ୍ରାଇମବ୍ରାଞ୍ଚ ଏସ୍ଟିଏଫ୍, କମିଶନରେଟ୍ ପୋଲିସର କ୍ୟୁଏଟି ଓ ସ୍ପେଶାଲ ସ୍କ୍ବାଡ୍ ବିଭିନ୍ନ ସମୟରେ ଚଢାଉ କରି ପୁଳା ପୁଳା ଧଳାଜହର ଜବତ କରୁଛି। ସମସ୍ତ ଘଟଣାର ଲିଙ୍କ୍ ବାଲେଶ୍ୱରର ଜଳେଶ୍ୱର ରହୁଛି। କୋଲକାତା ଓ ବାଂଲାଦେଶରୁ ବ୍ରାଉନସୁଗାର ସ୍ଥଳ ଓ ଜଳପଥରେ ଆସି ପହଞ୍ଚତ୍ବା ପରେ ଏଠାରୁ ବିଭିନ୍ନ ଏଜେଣ୍ଟଙ୍କ ଦ୍ୱାରା ରାଜଧାନୀ ଭୁବନେଶ୍ୱର ସମେତ ରାଜ୍ୟ ତଥା ବାହାରକୁ ଚାଲାଣ ହେଉଛି। ବୁଧବାର ଭୁବନେଶ୍ୱର କେଶୁରା ଅଞ୍ଚଳରୁ ଅଧକୋଟି ଟଙ୍କାର ବ୍ରାଉନସୁଗାର ଓ ୩୫ ଲକ୍ଷ ଟଙ୍କା ଜବତ ହେବାପରେ ପୋଲିସ ଓ କ୍ରାଇମବ୍ରାଞ୍ଚର କାର୍ଯ୍ୟଧାରା ଚର୍ଚ୍ଚାକୁ ଆସିଛି। ଜଳେଶ୍ୱରରେ ବଡ଼ ବଡ଼ ନିଶା ମାଫିଆଙ୍କ ଆଡ୍ଡାସ୍ଥଳ ରହିଛି। ହେଲେ ଛୋଟ ଛୋଟ ବେପାରି ଓ ଯୋଗାଣକାରୀଙ୍କୁ ଧରି ପୋଲିସ ସବୁବେଳେ ବାହାଃବା ନେଉଛି। ଜଳେଶ୍ୱରରେ ବଡ଼ ଅପରେଶନ ପାଇଁ ମିଳିତ ଅପରେଶନର ଆବଶ୍ୟକତା ରହିଥିବାବେଳେ ପୋଲିସ ଓ କ୍ରାଇବ୍ରାଞ୍ଚ କାହିଁକି ଏଥିପ୍ରତି ମନବଳାଉନି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ତଦନ୍ତରେ ଅଟକିଛି ପୋଲିସ
ନିଶା କାରବାରର ବଡ଼ ମାର୍କେଟ ପାଲଟିଛି ଓଡ଼ିଶା। ନିଶା ମାଫିଆମାନେ ସହ ସମ୍ପର୍କ ରଖୁଛନ୍ତି। ଚାପ ପଡ଼ିଲେ କିଛି ଚାଲାଣକାରୀଙ୍କୁ ଧରି ତଦନ୍ତ ନାଁରେ ଚୁପ୍ ବସୁଛି ପୋଲିସ। ବିଭିନ୍ନ ଘଟଣାରେ ଧରାପଡ଼ୁଥିବା ଅଭିଯୁକ୍ତଙ୍କର ଜଳେଶ୍ୱର ଓ ପଶ୍ଚିମବଙ୍ଗ ଲିଙ୍କ୍ ଥିବା ପୋଲିସ କହୁଥିଲେ ମଧ୍ୟ ତଦନ୍ତରେ ଝୁଣ୍ଟୁଛି। ଅଭିଯୁକ୍ତମାନେ କାହାପାଖରୁ ବ୍ରାଉନସୁଗାର ଆଣିଥିଲେ। ରାଜ୍ୟ ବାହାରୁ କିଏ ଏତେ ପରିମାଣର ବ୍ରାଉନସୁଗାର ରାଜ୍ୟ ଭିତରକୁ ଆଣୁଛି ପୋଲିସ ସେ ଦିଗରେ ତଦନ୍ତ କରି କାହାକୁ ବାନ୍ଧିପାରୁନାହିଁ।
ପୋଲିସର ପାରିବା ପଣିଆକୁ ପ୍ରଶ୍ନ କଲେ ଅଭିଯୁକ୍ତ
ଭୁବନେଶ୍ୱର କେଶୁରା ଅଞ୍ଚଳରେ ବ୍ରାଉନ୍ସୁଗାର କାରବାର ଚାଲୁଥିବା ନେଇ ସୂଚନା ପାଇବା ପରେ କମିଶନରେଟ୍ ପୋଲିସ ଚଢାଉ କରିଥିଲା। ତେବେ ଗିରଫ ହୋଇଥିବା ଦୁଇ ଅଭିଯୁକ୍ତ ପୋଲିସର ଦକ୍ଷତାକୁ ଅଙ୍ଗୁଳି ଉଠାଇ ନାଲିଆଖି ଦେଖାଇଥିଲେ। ଜଳେଶ୍ୱର ଅଞ୍ଚଳରେ ପନି ପରିବା ଭଳି ଗଳି କନ୍ଦିରେ ବ୍ରାଉନସୁଗାର ବିକ୍ରି ହେଉଛି। ଡାକିହାକି ବ୍ରାଉନସୁଗାର ଦେଉଛନ୍ତି। ତାଙ୍କୁ ତ ଧରୁନ, ଆମେ ତାଙ୍କ ପାଖରୁ ଆଣି ବିକ୍ରି କଲେ ଆମକୁ କାହିଁକି ଧରୁଛ ବୋଲି ପୋଲିସର ପାରିବା ପଣିଆକୁ ନେଇ ଅଭିଯୁକ୍ତମାନେ ପ୍ରଶ୍ନ କରିଥିଲେ।
ପାଇଖାନାରେ ଢାଳିଲେ, ନିଆଁ ଲଗାଇ ଜାଳିଲେ
ଚଢାଉ ସମୟରେ କ୍ୟୁଏଟି ଓ ଶହୀଦନଗର ଥାନା ପୋଲିସକୁ ଚକ୍ମା ଦେବାକୁ ଚେଷ୍ଟା କରିଥିଲେ ଗିରଫ ମହିଳା ପିଙ୍କି ଦାସ। ପୋଲିସ ଚଢାଉ କରୁଥିବା ଜାଣିପାରି ସେ ଘରର ସମସ୍ତ କବାଟ ବନ୍ଦ କରିଦେଇଥିଲେ। ଏପଟେ ପୋଲିସ କବାଟ ବାଡେଇ ଡାକୁଥିବାବେଳେ ପିଙ୍କି ଘରେ ଷ୍ଟକ ଥିବା ବିପୁଳ ବ୍ରଉନ୍ସୁଗାରକୁ ନେଇ ପାଇଖାନାରେ ଢାଳି ଦେବା ସହ କିଛି ଜଳାଇଦେଇଥିଲେ। ବ୍ରାଉନସୁଗାର ଜଳିବାର ବାସ୍ନା ଆସିବା ପରେ ପୋଲିସ କବାଟ ଭାଙ୍ଗି ଭିତରକୁ ପଶି ପାଇଖାନା ସାରା ବ୍ରାଉନସୁଗାର ପଡ଼ିଥିବା ଦେଖିଥିଲା। ଏହାପରେ ଘର ସାରା ଖୋଜିଖୋଜି ୫୫୦ଗ୍ରାମ୍ ବ୍ରାଉନସୁଗାର ଜବତ କରିଥିଲା।
