ବ୍ରହ୍ମପୁର ଅଫିସ,୧୧।୭: ବ୍ରହ୍ମପୁର ସଦର ଥାନା ପୋଲିସ ରବିବାର ଏକ ଯୌତୁକ ଜନିତ ହତ୍ୟା ମାମଲାରେ ୩ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ମୃତ ମନ୍ଦାକିନି ସ୍ବାଇଁଙ୍କ ଶାଶୁ ଝୁନୁ ସ୍ବାଇଁ, ଶ୍ୱଶୁର ଜଳନ୍ଧର ସ୍ବାଇଁ ଓ ନଣନ୍ଦ ଜିତୁନୁ ସ୍ବାଇଁ। ପୋଲିସ ଯୌତୁକ ଜନିତ ହତ୍ୟା ମାମଲା ନମ୍ବର ୧୬୩/୨୧ ରେ ଗିରଫ ଅଭିଯୁକ୍ତମାନଙ୍କୁ ରବିବାର କୋର୍ଟ ଚାଲାଣ କରିଛି। ମନ୍ଦାକିନି ହତ୍ୟା ଘଟଣାର ମୁଖ୍ୟ ଅଭିଯୁକ୍ତ ତଥା ତାଙ୍କ ସ୍ବାମୀ ମିଥୁନ ସ୍ବାଇଁଙ୍କୁ ପୋଲିସ ପୂର୍ବରୁ ମେ ୨୭ରେ ଗିରଫ କରିଥିଲା।
ମିଳିଥିବା ସୂଚନା ମୁତାବକ, ସଦର ଥାନା ଅଦୀନ ବଉଳଝୋଳି ଗ୍ରାମର ସୁରେନ୍ଦ୍ର ପାତ୍ରଙ୍କ ଝିଅ ମନ୍ଦାକିନିଙ୍କୁ ରୋହିଗଁାର ମିଥୁନ ବିବାହ କରିଥିଲେ। ଗତ ମେ ୨୬ ତାରିଖ ରାତିରେ ମନ୍ଦାକିନିଙ୍କ ମୃତ୍ୟୁ ଘଟିଥିବା ଖବର ପାଇ ତାଙ୍କ ମା’ ଲକ୍ଷ୍ମୀ ପାତ୍ର ଓ ଭାଇ ପ୍ରକାଶ ବଉଳଝୋଳି ଗ୍ରାମରେ ପହଞ୍ଚତ୍ଥିଲେ। ଅଧିକ ଯୌତୁକ ଦାବି କରି ଝିଅକୁ ଶ୍ୱଶୁର ଘର ଲୋକ ମାନସିକ ଓ ଶାରୀରିକ ନିର୍ଯାତନା ଦେଉଥିଲେ। ଏଣୁ ମିଥୁନ ଓ ତାଙ୍କ ପରିବାର ଲୋକ ମନ୍ଦାକିନିଙ୍କ ତଣ୍ଟି ଚିପି ହତ୍ୟା କରିଛନ୍ତି ବୋଲି ସେ ଥାନାରେ ଅଭିଯୋଗ କରିଥିଲେ। ପୋଲିସ ଏନେଇ ଏକ ମାମଲା ରୁଜୁ କରି ପ୍ରଥମେ ମିଥୁନଙ୍କୁ ଗିରଫ କରି କୋର୍ଟ ଚାଲାଣ କରିଥିଲା।
