ନୂଆଦିଲ୍ଲୀ, ୧୭।୨ : ଦେଶର ଉତ୍ତରପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ମଣିପୁର ଏବଂ ଗୋଆ ଆଦି ୫ ରାଜ୍ୟରେ ବିଧାନସଭା ଜାରି ରହିଥିବାବେଳେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ନୀରବତା ଭାଙ୍ଗିଛନ୍ତି। ଏକ ଭିଡ଼ିଓ ଜାରି କରିବା ସହିତ ସେ ବିଧାନସଭା ନିର୍ବାଚନରେ ଏଣ୍ଟ୍ରି କରିଛନ୍ତି। ସେ କହିଛନ୍ତି ଯେ, ମୁଁ ମୋ କାର୍ଯ୍ୟକାଳରେ କମ୍ କହିଛି ଅଧିକ କାମ କରିଛି। ଏହା ସହିତ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଟାର୍ଗେଟ୍ କରି କହିଛନ୍ତି ଯେ, ମୋଦି ସରକାରଙ୍କ ରାଷ୍ଟ୍ରବାଦ ନକଲି।
ବ୍ରିଟିଶ୍ ଶାସକଙ୍କ ଭଳି ଭାଜପା ଡିଭାଇଡ୍ ଆଣ୍ଡ୍ ରୁଲ୍ ଆପଣେଇଥିବା ସେ ଭିଡ଼ିଓରେ ଅଭିଯୋଗ କରିଛନ୍ତି। ଚାଇନା ପ୍ରସଙ୍ଗରେ ମଧ୍ୟ ସେ କେନ୍ଦ୍ର ସରକାରଙ୍କୁ ଘେରିଛନ୍ତି। ସେ କହିଛନ୍ତି ଯେ ଏକ ବର୍ଷ ଧରି ଚାଇନା ସେନା ଭାରତର ପବିତ୍ର ଭୂମିରେ ବସିଛି। ଭାଜପା ସରକାର ସମ୍ବିଧାନ ଉପରେ ବିଶ୍ୱାସ କରେ ନାହିଁ। ସାମ୍ବିଧାନିକ ଅନୁଷ୍ଠାନଗୁଡ଼ିକ କ୍ରମାଗତ ଭାବରେ ଦୁର୍ବଳ ହୋଇଯାଉଛନ୍ତି। କେବଳ ଦେଶ ଭିତରେ ନୁହେଁ ବୈଦେଶିକ ନୀତି କ୍ଷେତ୍ରରେ ମଧ୍ୟ ସରକାର ବିଫଳ ହୋଇଛନ୍ତି।
ସେ କହିଛନ୍ତି ଯେ ନିର୍ବାଚନ ପରିବେଶରେ ପଞ୍ଜାବର ଲୋକମାନେ ବଡ଼ ଆହ୍ବାନର ସମ୍ମୁଖୀନ ହେଉଛନ୍ତି। ସେମାନଙ୍କୁ ଏହାର ମୁକାବିଲା ସଠିକ ଭାବରେ ମୁକାବିଲା କରିବା ଜରୁରୀ। କେବଳ କଂଗ୍ରେସ ପଞ୍ଜାବରେ କୃଷକଙ୍କ ସମୃଦ୍ଧତା ଏବଂ ବେକାରି ଦୂର କରିପାରିବ। ପଞ୍ଜାବର ଭୋଟରମାନେ ଏହାକୁ ମନେ ରଖିବା ଜରୁରୀ। ସେ କହିଛନ୍ତି ଯେ ଭାରତ ଆଜି ଏକ ଗୁରୁତ୍ୱପୂର୍ଣ୍ଣ ସ୍ଥିତିରେ ଠିଆ ହୋଇଛି। ପଞ୍ଜାବ, ଉତ୍ତରପ୍ରଦେଶ, ଉତ୍ତରାଖଣ୍ଡ, ଗୋଆ ଏବଂ ମଣିପୁରର ମୋର ଭାଇ ଓ ଭଉଣୀମାନଙ୍କ ସହ ଦେଶ ତଥା ରାଜ୍ୟର ପରିସ୍ଥିତି ବିଷୟରେ ଆଲୋଚନା କରିବାକୁ ମୋର ବହୁତ ଇଚ୍ଛା ଥିଲା, କିନ୍ତୁ ଡାକ୍ତରଙ୍କ ପରାମର୍ଶ ହେତୁ ମୁଁ ଏହାକୁ ଏହିପରି ସମ୍ବୋଧନ କରୁଛି।
କିଛି ଦିନ ପୂର୍ବରୁ ପ୍ରଧାନମନ୍ତ୍ରୀଙ୍କ ସୁରକ୍ଷା ନାଁରେ ପଞ୍ଜାବର ମୁଖ୍ୟମନ୍ତ୍ରୀ ଚରଣଜିତ୍ ଚାନ୍ନି ଏବଂ ସ୍ଥାନୀୟ ଲୋକମାନଙ୍କୁ ବଦନାମ କରିବାକୁ ଉଦ୍ୟମ କରାଯାଇଥିଲା। ଯାହାକୁ କୌଣସି ପ୍ରକାରେ ସଠିକ ଭାବରେ ବିବେଚନା କରାଯାଇପାରିବ ନାହିଁ।
କୃଷକ ଆନ୍ଦୋଳନ ସମୟରେ ମଧ୍ୟ ପଞ୍ଜାବକୁ ବଦନାମ କରିବାକୁ ଚେଷ୍ଟା କରାଯାଇଥିଲା। ପଞ୍ଜାବୀଙ୍କ ସାହସ, ସାହସିକତା, ଦେଶପ୍ରେମ ଏବଂ ବଳିଦାନକୁ ସମଗ୍ର ବିଶ୍ୱ ଦ୍ୱାରା ସମ୍ମାନ ପ୍ରଦାନ କରାଯାଇଥାଏ। ସେମାନଙ୍କ ପାଇଁ କିଛି କରାଯାଇ ନାହିଁ। ପଞ୍ଜାବର ମାଟିରେ ଜନ୍ମିତ ଜଣେ ପ୍ରକୃତ ଦେଶବାସୀ ଭାବରେ ମୁଁ ଏନେଇ ବିଶେଷ ଦୁଃଖିତ।
ସରକାରଙ୍କୁ ଅର୍ଥନୀତି ବିଷୟରେ କିଛି ବି ଜଣା ନାହିଁ। ସରକାରଙ୍କ ଭୁଲ ନୀତି ଯୋଗୁଁ ଦେଶର ଅର୍ଥନୈତିକ ମନ୍ଥର ଗତିରେ ଅଟକି ରହିଛି। କୃଷକ, ବ୍ୟବସାୟୀ, ଛାତ୍ର ଏବଂ ମହିଳାମାନେ ଯନ୍ତ୍ରଣା ଭୋଗୁଛନ୍ତି। ଦେଶର ଅନ୍ନଦାତାମାନଙ୍କ ପାଖରେ ଖାଇବାକୁ ନାହିଁ। ଦେଶରେ ସାମାଜିକ ଅସମାନତା ବୃଦ୍ଧି ପାଇଛି । ଲୋକଙ୍କ ଉପରେ ଋଣ ବୋଝ ବୃଦ୍ଧି ପାଉଛି ଏବଂ ଆୟ ହ୍ରାସ ପାଉଛି । ଧନୀ ଅଧିକ ଧନୀ ହେବାରେ ଳାଗିଛନ୍ତି। ଅପରପକ୍ଷରେ ଗରିବ ପୁଣି ଗରିବ ହୋଇ ଚାଲିଛନ୍ତି। ଆକଳନ ସହ ପ୍ରତାରଣା କରି ସରକାର ସବୁକିଛି ଠିକ ବୋଲି କହୁଛନ୍ତି। ସରକାରଙ୍କ ନୀତି ଏବଂ ଉଦ୍ଦେଶ୍ୟରେ ବହୁ ତ୍ରୁଟି ରହିଛି।
ନିଜର ସ୍ବାର୍ଥକୁ ପୂରଣ କରିବା ପାଇଁ ଭାଜପା ସରକାର ଜାତି, ଧର୍ମ ଏବଂ ଅଞ୍ଚଳ ନାମରେ ଲୋକଙ୍କୁ ବିଭକ୍ତ କରୁଛନ୍ତି। ସେମାନେ ନିଜ ନିଜ ମଧ୍ୟରେ ଲଢ଼େଇ କରୁଛନ୍ତି। ବିଭାଜନ ଓ ଶାସନ ରାଜନୀତିରେ କେନ୍ଦ୍ର ସରକାର ଚାଲିଛନ୍ତି ବୋଲି ମନମୋହନ ଅଭିଯୋଗ କରିଛନ୍ତି।
