ବେଙ୍ଗାଲୁରୁ,୨।୧୨: କର୍ନାଟକର ଶାସକ କଂଗ୍ରେସ ଦଳ ମଧ୍ୟରେ କ୍ଷମତା ସଂଘର୍ଷ ଶେଷ ହୋଇଛି। ବ୍ରେକ୍ଫାଷ୍ଟ ରାଜନୀତି ମାଧ୍ୟମରେ ଦଳ ଭିତରେ ମତଭେଦ ସମାଧାନ କରିବାକୁ ପ୍ରୟାସ ଚାଲିଛି। ଦଳର ହାଇକମାଣ୍ଡଙ୍କ ନିର୍ଦ୍ଦେଶ ପରେ ଗତ ସପ୍ତାହରେ ଆଭ୍ୟନ୍ତରୀଣ ବିବାଦ ଆରମ୍ଭ ହୋଇଥିଲା। ମୁଖ୍ୟମନ୍ତ୍ରୀ ସିଦ୍ଧରମୈୟା ଶନିବାର ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କୁ ତାଙ୍କ ଘରକୁ ବ୍ରେକ୍ଫାଷ୍ଟ ପାଇଁ ନିମନ୍ତ୍ରଣ କରିଥିଲେ ଏବଂ ପରେ ସେମାନଙ୍କ ମଧ୍ୟରେ କୌଣସି ମତଭେଦ ନ ଥିବା ଦାବି କରିଥିଲେ। ବର୍ତ୍ତମାନ ବ୍ରେକ୍ଫାଷ୍ଟ ରାଜନୀତିର ଏକ ଅଂଶ ଭାବରେଶିବକୁମାର ଆଜି ମୁଖ୍ୟମନ୍ତ୍ରୀଙ୍କୁ ତାଙ୍କ ଘରକୁ ନିମନ୍ତ୍ରଣ କରିଥିଲେ।
ନିମନ୍ତ୍ରଣ ପାଇବା ପରେ, ମୁଖ୍ୟମନ୍ତ୍ରୀ ସିଦ୍ଧରମୈୟା ମଙ୍ଗଳବାର ସକାଳ ପ୍ରାୟ ୧୦ଟା ସମୟରେ ଉପମୁଖ୍ୟମନ୍ତ୍ରୀ ଶିବକୁମାରଙ୍କ ବାସଭବନରେ ବ୍ରେକ୍ଫାଷ୍ଟ ପାଇଁ ପହଞ୍ଚିଥିଲେ। ଶିବକୁମାର ପୂର୍ବରୁ ଗତକାଲି ସନ୍ଧ୍ୟାରେ ଘୋଷଣା କରିଥିଲେ ଯେ ସେ କର୍ନାଟକକୁ ଦିଆଯାଇଥିବା ପ୍ରତିଶ୍ରୁତି ପୂରଣ କରିବା ପାଇଁ ସାମୂହିକ ପ୍ରୟାସ ଉପରେ ଆଲୋଚନା ଏବଂ ମଜଭୁତ କରିବା ପାଇଁ ମୁଖ୍ୟମନ୍ତ୍ରୀଙ୍କୁ ନାସ୍ତା ପାଇଁ ନିମନ୍ତ୍ରଣ କରିଛନ୍ତି।
ମୁଖ୍ୟମନ୍ତ୍ରୀ ସିଦ୍ଧରମୈୟା ପୂର୍ବରୁ କହିଥିଲେ, ସେ ଏପର୍ଯ୍ୟନ୍ତ ଡିକେଙ୍କଠାରୁ ଆନୁଷ୍ଠାନିକ ନିମନ୍ତ୍ରଣ ପାଇନାହାଁନ୍ତି ଏବଂ ନିମନ୍ତ୍ରଣ ହେଲେ ନିଶ୍ଚିତ ଭାବରେ ଯୋଗ ଦେବେ, ଶିବକୁମାର କହିଥିଲେ ଯେ, ଏହା ତାଙ୍କ ଏବଂ ମୁଖ୍ୟମନ୍ତ୍ରୀଙ୍କ ମଧ୍ୟରେ ଏକ ବିଷୟ ଏବଂ ସେମାନେ ଭାଇ ଭାବରେ ଏକାଠି କାମ କରୁଛନ୍ତି।
Dharitri – Odisha’s No.1 Odia Daily
