ରାଉରକେଲା,୩।୯(ବିପ୍ଳବ ରଞ୍ଜନ ଦାଶ)ରାଉରକେଲାର ଜୀବନରେଖା କୁହାଯାଉଥିବା ବ୍ରାହ୍ମଣୀ ନଦୀ ଦିନକୁ ଦିନ ପ୍ରଦୂଷିତ ହେବାରେ ଲାଗିଛି। ରାଉରକେଲା ସହରର ୭ ହସ୍ପିଟାଲକୁ ଛାଡିଦେଲେ ଅନ୍ୟ କୌଣସି ସଂସ୍ଥା ଏବଂ ପ୍ରତିଷ୍ଠାନର ପରିତ୍ୟକ୍ତ ଜଳ ବିଶୁଦ୍ଧୀକରଣ ହେଉନାହିଁ। ଏହି ମଇଳା ପାଣି ସିଧାସଳଖ ବ୍ରାହ୍ମଣୀରେ ମିଶୁଛି। ଫଳରେ ନଦୀ ପାଣି ପ୍ରଦୂଷିତ ହୋଇ ଜନଜୀବନ ପ୍ରତି ବିପଦ ସାଜିଛି।
ସୂଚନା ଅନୁସାରେ, ସହରର ଅଳିଆ ପାଣି ସ୍ବିରେଜ ସିଷ୍ଟମ ଓ ମୁକ୍ତ ଡ୍ରେନେଜ ଯୋଗେ ବ୍ରାହ୍ମଣୀ ନଦୀକୁ ନିଷ୍କାସିତ ହେଉଛି। ରାଉରକେଲା ସ୍ବେରେଜ ବିଭାଗ ସିଭିଲ ଟାଉନସିପ୍, ଛେଣ୍ଡ ଓ ପାନପୋଷର ଘରକୁ ଘର ପାଇପ୍ ସଂଯୋଗ କରାଇ ମଇଳା ପାଣିକୁ ବାଲୁଘାଟ ସ୍ଥିତ ୪୦ ମିଲିୟନ ଲିଟର କ୍ଷମତା ବିଶିଷ୍ଟ ସ୍ବେରେଜ ଟ୍ରିଟମେଣ୍ଟ ସିଷ୍ଟମ(ଏସଟିପି)ରେ ବିଶୋଧନ କରି ବ୍ରାହ୍ମଣୀକୁ ନିଷ୍କାସନ କରୁଛି। ସିଭିଲ ଟାଉନସିପ୍ରୁ ବାଳୁଘାଟ ତରେକେରାକୁ ଲମ୍ବିଥିବା ଓପନ ଡ୍ରେନ ନାଳ ଅଳିଆ ପାଣି ବିନା ଟ୍ରିଟମେଣ୍ଟରେ ବ୍ରାହ୍ମଣୀକୁ ଯାଉଛି। ସ୍ବେରେଜ ପାଇପରେ କମ୍ ଅଳିଆ ପାଣି ନିସ୍କାଷିତ ହେଉଛି । ମାତ୍ର ସହରରେ ମାଳମାଳ ପ୍ରାଇଭେଟ ହସ୍ପିଟାଲ ଏବଂ ପ୍ରତିଷ୍ଠାନ ରହିଥିବା ବେଳେ ତନ୍ମଧ୍ୟରୁ ନିଷ୍କାସିତ ପାଣି ବ୍ରାହ୍ମଣୀରେ ମିଶୁଛି। ଓ୍ବାଟକୋ ପ୍ରତ୍ୟେହ ସିଭିଲ ଟାଉନସିପ୍କୁ ୬୧ ମିଲିୟନ ଲିଟର ପାଣି ପ୍ରଦାନ କରୁଛି। ୫୦ଭାଗ ବ୍ୟବହାର ପରେ ବାକି ଅପହାର୍ଯ୍ୟ ପାଣି ସିଧା ସ୍ବେରେଜ ସିଷ୍ଟମରେ ନଦୀରେ ମିଶୁଛି। ଏଥିସହ ସିଭିଲ ଟାଉନସିପ୍ର ୩୦ଭାଗ ଲୋକ ଓ ବିଭିନ୍ନ ପ୍ରତିଷ୍ଠାନ ଖୋଲା ଡ୍ରେନରେ ଅଲିଆ, ଆବର୍ଜନା, କେମିକାଲଯୁକ୍ତ ଦ୍ରବ୍ୟ ଡ୍ରେନରେ ଛାଡୁଛନ୍ତି। ଫଳରେ ବ୍ରାହ୍ମଣୀ ନଦୀ ଅଧିକରୁ ଅଧିକ ପ୍ରଦୂଷିତ ହେବାରେ ଲାଗିଛି। ଏ ନେଇ ବିଧାନସଭାରେ ବ୍ରାହ୍ମଣୀ ନଦୀ ପ୍ରଦୂଷଣ ପ୍ରସଙ୍ଗ ଉଠିଛି। ନଦୀ ପ୍ରଦୂଷଣ ରୋକିବା ପାଇ ଓ୍ବାଟର ଟ୍ରିଟମେଣ୍ଟ ଜରୁରୀ ବୋଲି ମତପ୍ରକାଶ ପାଇଛି। ମାତ୍ର ଏପର୍ଯ୍ୟନ୍ତ ସହରରେ ଏହି ବ୍ୟବସ୍ଥା ସୂଚାରୁ ଭାବେ କାର୍ଯ୍ୟକାରୀ ହୋଇପାରିନାହିଁ।
ଫଳରେ ସହରାଞ୍ଚଳର ପ୍ରଦୂଷିତ ପାଣି ବିଶୁଦ୍ଧ ନ ହୋଇ ସିଧାସଳଖ ଡ୍ରେନ ଓ ସ୍ବେରେଜ ସିଷ୍ଟମ ମାଧ୍ୟମରେ ବ୍ରାହ୍ମଣୀରେ ମିଶୁଛି। ଏହାର ପ୍ରତିକାର ପାଇଁ ତୁରନ୍ତ ପ୍ରଦୂଷଣ ବିଭାଗ, ସ୍ବେରେଜ ବିଭାଗ ଓ ଆରଏମସି ପକ୍ଷରୁ ବିହିତ ପଦକ୍ଷେପ ଗ୍ରହଣ କରାଯିବା ଜରୁରୀ ବୋଲି ସହରର ବୁଦ୍ଧିଜୀବୀ ମହଳରେ ମତପ୍ରକାଶ ପାଇଛି।
ଏ ନେଇ ରାଉରକେଲା ପ୍ରଦୂଷଣ ବିଭାଗ ଯନ୍ତ୍ରୀ ରମଣୀ ରଞ୍ଜନ ଦାଶଙ୍କୁ ପଚାରିବାରୁ ସେ କହିଲେ, ଉଚ୍ଚ କର୍ତ୍ତୃପକ୍ଷଙ୍କ ପରାମର୍ଶ ନ ନେଇ ଏଭଳି ସୂଚନା ପ୍ରଦାନ କରିବା ନିୟମ ନାହିଁ ବୋଲି କହିଥିଲେ। ରାଉରକେଲା ସ୍ବେରେଜ ସିଷ୍ଟମ ବିଭାଗ ଜେନେରାଲ ମ୍ୟାନେଜର ଡାକୁଆ ବାବୁଙ୍କୁ ପଚାରିବାରୁ ସେ କହିଲେ, ଆମ ବିଭାଗ ପାଇପ୍ ଯୋଗେ ସିଭିଲ ଟାଉନସିପ୍, ଛେଣ୍ଡ ଓ ପାନପୋଷ ଅଞ୍ଚଳ ଏବଂ ୭ ହସ୍ପିଟାଲର ପ୍ରଦୂଷିତ ପାଣି ଟ୍ରିଟମେଣ୍ଟ ସିଷ୍ଟମରେ ବିଶୋଧନ କରି ନଦୀକୁ ନିଷ୍କାସନ କରୁଛି। ତେବେ ଖୋଲା ଡ୍ରେନରେ ଅତ୍ୟଧିକ ମଇଳା ପାଣି ନିଷ୍କାସନ ହେଉଥିବା ବେଳେ ସ୍ବରେଜ ପାଇପ୍ରେ କମ୍ ନିଷ୍କାସନ ହେଉଥିବା ସେ କହିଥିଲେ।
