ସମ୍ବଲପୁର, ୨୪।୨(ପ୍ରମୋଦ ବହିଦାର): ପୋଲିସ ହାତରେ ଧରାପଡିଲେ ବନ୍ଧୁକ ମୁନରେ ନବବଧୂ ଅପହରଣକାରୀ। ନବବଧୂ କଣ୍ଟାମାଳ ଥାନା ଅନ୍ତର୍ଗତ କଣ୍ଟାମାଳ ବ୍ଲକଛକର ରଶ୍ମି ପୁଟେଲ(୧୯)ଙ୍କ ସହ କଣ୍ଟାମାଳ ବଡ଼ଚାପଲି ଗ୍ରାମର ସଞ୍ଜୟ ସାହୁ(୨୬)ଙ୍କୁ ପୋଲିସ ଗିରଫ କରିଛି। ଉଭୟେ ସମ୍ବଲପୁର ଅଇଁଠାପାଲି ଥାନା ଅର୍ନ୍ତଗତ ବୁଢାରାଜା ପ୍ରଫେସର କଲୋନୀରେ ସଞ୍ଜୟଙ୍କ ସମ୍ପର୍କିୟ ଭାଈଙ୍କ ଘରେ ଏକାଠି ରହୁଥିବା ଖବର ପାଇ ବିଳମ୍ବିତ ରାତିରେ ସୁବର୍ଣ୍ଣପୁର ଜିଲା ତରଭା ଥାନା ପୋଲିସ ଏଠାରେ ପହଞ୍ଚି ଅଇଁଠାପାଲି ଥାନା ପୋଲିସ ସହାୟତାରେ ସଞ୍ଜୟଙ୍କୁ ଗିରଫ କରିଛି। ଗିରଫ ପରେ ତରଭା ଥାନା ପୋଲିସ ଉଭୟ ରଶ୍ମି ଓ ସଞ୍ଜୟଙ୍କୁ ଉଠାଇ ନେଇଥିବା ସୂଚନା ମିଳିଛି। ତେବେ ଉଭୟ ନବବଧୂ ରଶ୍ମି ଓ ଅପହରଣକାରୀ ସଞ୍ଜୟ ପ୍ରେମିକା ଓ ପ୍ରେମିକ ବୋଲି କୁହାଯାଇଛି। ସେହିପରି ନବବଧୂଙ୍କ ସହମତିରେ ଅପହରଣକୁ ରୂପ ଦିଆ ଯାଇଥିବା ଚର୍ଚ୍ଚା ହେଉଛି।
ବଲାଙ୍ଗୀର ସହର କାମାକ୍ଷାନଗର ନିବାସୀ ହରିବନ୍ଧୁ ପୁଟେଲ(ରିଙ୍କୁ)ଙ୍କ ବିବାହ ଶନିବାର ରାତିରେ ବୌଦ୍ଧ ଜିଲା କଣ୍ଟାମାଳ ଥାନା ଅଞ୍ଚଳର ଜଣେ ଯୁବତୀଙ୍କ ସହ ହୋଇଥିଲା। ବୈଦିକ ରୀତିନୀତି ଅନୁଯାୟୀ, ବିବାହ ପରେ ଏକ ସୁସଜ୍ଜିତ କାରରେ ନବବଧୂଙ୍କୁ ଧରି ଘରକୁ ଫେରୁଥିଲେ ବରପକ୍ଷର ଲୋକେ। ହେଲେ ତରଭା ସହର ନିକଟସ୍ଥ ବଡବନ୍ଧ ନିକଟରେ ରବିବାର ଭୋର ୫ଟା ୧୫ରେ ବନ୍ଧୁକ ଓ ମାରଣାସ୍ତ୍ରର ଭୟ ଦେଖାଇ ସଞ୍ଜିବ୍ ସହଯୋଗୀଙ୍କ ସହାୟତାରେ କାରରୁ ନବବଧୂଙ୍କୁ ଅପହରଣ କରିଥିଲେ। ବୁଲାଣି ରାସ୍ତାରେ ବରକନ୍ୟାଙ୍କ କାରକୁ ଅଭିଯୁକ୍ତମାନେ ଆସିଥିବା କାତ ଓଭରଟେକ୍ କରିଥିଲା। ଅଭିଯୁକ୍ତମାନେ ବରକନ୍ୟା କାର ଅଟକାଇ ଥିଲେ। ଏହା ପରେ ସେମାନେ ବନ୍ଧୁକ ଓ ମାରଣାସ୍ତ୍ର ଦେଖାଇ ଆତଙ୍କ ସୃଷ୍ଟି କରିବା ସହ କାରରେ ଥିବା ନବବଧୂଙ୍କୁ ଟାଣି ନେଇ ଯାଇଥିଲେ। ମାରଣାସ୍ତ୍ର ଧରିଥିବାରୁ ବରପକ୍ଷର କେହି ବି ପ୍ରତିରୋଧ କରିବାକୁ ସାହସ କରି ନ ଥିଲେ। ତେବେ ଉକ୍ତ କାରରେ ବସିଥିବା କନ୍ୟାଙ୍କ ଜେଜେମା ଅପହରଣକାରୀ ସଞ୍ଜିବ ଓରଫ୍ ବୁଠିକୁ ଚିହ୍ନ ପାରିଥିଲେ। ସେ ଏ ସମ୍ପର୍କରେ ତରଭା ପୋଲିସକୁ ସୂଚନା ଦେଇଛନ୍ତି। ସଞ୍ଜିବ୍ ପୂର୍ବରୁ ବିବାହ କରିଛନ୍ତି। ତାଙ୍କର ୨ଟି ପିଲା ଅଛନ୍ତି। କିନ୍ତୁ ତାଙ୍କର ନବବଧୂଙ୍କ ସହିତ ପ୍ରେମ ସମ୍ପର୍କ ରହିଥିଲା। ନବବଧୂଙ୍କ ବାପା ଏକ ଗଞ୍ଜେଇ ଚୋରାଚାଲାଣ ମାମଲାରେ ଗିରଫ ହୋଇ ଜେଲରେ ଅଛନ୍ତି। ତେଣୁ ନବବଧୂଙ୍କ କକା ଏହି ବିବାହ କରିଥିଲେ। ଏହି ବିବାହକୁ ସଞ୍ଜିବ୍ ବିରୋଧ କରୁଥିଲେ। ଶେଷରେ ସଞ୍ଜିବ୍ ସହଯୋଗୀଙ୍କୁ ଧରି ଯୋଜନାବଦ୍ଧ ଭାବେ ଏଭଳିକାଣ୍ଡ ଘଟାଇଥିବା ଜଣାପଡିଛି। ଏନେଇ ବର ହରିବନ୍ଧୁ ପୁଟେଲ ମଧ୍ୟ ତରଭା ଥାନାରେ ଲିଖିତ ଅଭିଯୋଗ କରିଛନ୍ତି। ଥାନାରେ ମାମଲା ପରେ ସଞ୍ଜିବ୍ଙ୍କୁ ପୋଲିସ ଖୋଜି ପାଉନି। ଏପଟେ ହରିବନ୍ଧୁଙ୍କ ପରିବାର ଲୋକେ ଦୁଃଖରେ ଭାଙ୍ଗି ପଡିଛନ୍ତି। ବରପକ୍ଷରୁ କନ୍ୟାଙ୍କୁ ବିବାହ ପୂର୍ବରୁ ସୁନା ହାର, ସୁନା ମଙ୍ଗଳ ସୂତ୍ର, ସୁନା କାନଫୁଲ ଓ ମୁଦି ଆଦି ଦେଇଥିଲେ। ପରିବାର ଲୋକେ ବହୁ କଷ୍ଟରେ ଲକ୍ଷାଧିକ ଟଙ୍କା ଖର୍ଚ୍ଚ କରି ପୁଅର ବିବାହ କରିଥିଲେ।
Dharitri – Odisha’s No.1 Odia Daily
