ମେଲବୋର୍ନ,୧୬।୧୧(ପି.ଟି.): ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳର ବ୍ୟାଟିଂ ଲାଇନ୍- ଅପ୍ ବିଶ୍ୱସ୍ତରୀୟ। ଭାରତ ବିପକ୍ଷରେ ବୋଲିଂ କରିବା ମୋ ପାଇଁ ଏକ ବଡ଼ ଚ୍ୟାଲେଞ୍ଜ ବୋଲି ଯୁବ ଅଷ୍ଟ୍ରେଲୀୟ ଲେଗ୍ସ୍ପିନର ମିଚେଲ ସ୍ବେପ୍ସନ କହିଛନ୍ତି। ଭାରତ ବିପକ୍ଷ ଆଗାମୀ ୪ ମ୍ୟାଚ୍ବିଶିଷ୍ଟ ଟେଷ୍ଟ ସିରିଜ ପାଇଁ ସ୍ବେପସନ ଅଷ୍ଟ୍ରେଲିଆ ଦଳରେ ସାମିଲ ହୋଇଛନ୍ତି। ତାଙ୍କୁ ନ୍ୟୁଜିଲାଣ୍ଡ ବିପକ୍ଷ ସିଡନୀ ଟେଷ୍ଟ ଓ ବାଂଲାଦେଶ ଗସ୍ତରେ ସାମିଲ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ ସେ ଟେଷ୍ଟ ପଦାର୍ପଣ କରିନାହାନ୍ତି। ଅବଶ୍ୟ କୋଭିଡ୍-୧୯ କାରଣରୁ ଏହି ସିରିଜ ବାତିଲ ହୋଇଥିଲା।
ଭାରତ ବିପକ୍ଷ ଦୁଇଟି ଓ୍ବାର୍ମଅପ୍ ମ୍ୟାଚ୍ରେ ସ୍ବେପ୍ସନଙ୍କୁ ସାମିଲ କରାଯାଇଛି। ଏହି ଦୁଇଟି ମ୍ୟାଚ୍ରେ ସେ ବୋଲିଂ କରିବେ ବୋଲି ଆଶା କରୁଛନ୍ତି। କୋହଲିଙ୍କ ଭଳି ମହାନ୍ ବ୍ୟାଟ୍ସମ୍ୟାନଙ୍କୁ ବୋଲିଂ କରିବାକୁ ଉତ୍ସାହିତ ଅଛି ବୋଲି ସେ କହିଛନ୍ତି।
୩ଟି ମାର୍ଶ ଶେଫିଲ୍ଡ ସିଲ୍ଡ ମ୍ୟାଚ୍ ଖେଳି ସ୍ପେପ୍ସନ ୨୧.୧୭ ରନ ହାରରେ ୨୩ଟି ଉଇକେଟ ହାସଲ କରି ଚୟନକର୍ତ୍ତାଙ୍କ ଦୃଷ୍ଟିଆକର୍ଷଣ କରିଛନ୍ତି। ତେବ ସ୍ପିନର ହିସାବରେ ଅଭିଜ୍ଞ ନାଥନ ଲିୟନ ପ୍ରଥମ ପସନ୍ଦ ଭାବେ ଟେଷ୍ଟ ଖେଳିବେ। ଯଦି ଦୁଇଜଣ ସ୍ପିନରଙ୍କୁ ଖେଳାଯାଏ ତା’ହେଲେ ମୋର ଖେଳିବାର ସମ୍ଭାବନା ସୃଷ୍ଟି ହେବ ବୋଲି ୨୭ ବର୍ଷୀୟ ସ୍ବେପ୍ସନ କହିଛନ୍ତି। ୪ଟି ଯାକ ଟେଷ୍ଟ ଖେଳିବାକୁ ପ୍ରସ୍ତୁତ ହେବି। ଉଲ୍ଲେଖଥାଉ କି, ଅଷ୍ଟ୍ରେଲିଆ ଗସ୍ତରେ ଭାରତ ୩ଟି ଦିନିକିଆ, ୩ଟି ଟି୨୦ ଓ ୪ଟି ଟେଷ୍ଟ ମ୍ୟାଚ୍ ଖେଳିବ। ନଭେମ୍ବର ୨୭ରୁ ଦିନିକିଆ ସିରିଜ ଆରମ୍ଭ ହେବ। ଡିସେମ୍ବର ୧୭ରୁ ଟେଷ୍ଟ ସିରିଜ ଆରମ୍ଭ ହେବ। ଆଡିଲେଡ୍ରେ ପ୍ରଥମ ଟେଷ୍ଟ (ଦିବାରାତ୍ର) ଖେଳାଯିବ। ଅଧିନାୟକ ବିରାଟ କୋହଲି ପିତୃତ୍ୱ ଛୁଟିରେ ଯିବାକୁ ଥିବାରୁ ଅନ୍ତିମ ୩ଟି ଟେଷ୍ଟ ଖେଳିବେନାହିଁ।
