ହାଇଦ୍ରାବାଦ,୯ ।୨: ପଚିଯାଇଥିବା ପନିପରିବାକୁ ସାଧାରଣତଃ ଆମେ ଫିଙ୍ଗି ଦେଇଥାଉ କି ଗଛମୂଳେ ଦେଇ ଦେଇଥାଉ । ହେଲେ ହାଇଦ୍ରାବାଦରେ ଏମିତି ଏକ ପରିବା ମଣ୍ଡି ରହିଛି ଯେଉଁଠି ପଚି ଯାଇଥିବା ପରିବାରୁ ବିଜୁଳି ଶକ୍ତି ଉତ୍ପାଦନ କରାଯାଉଛି । ପ୍ରତିଦିନ ଏଠାରେ ପାଖାପାଖି ୧୦ ଟନ ପଚା ପରିବା ବାହରିଥାଏ । ପ୍ରଥମେ ପ୍ରଥମେ ଏହାକୁ ଫୋପାଡି ଦିଆଉଥିବା ବେଳେ ହେଲେ ଏବେ ଏହି ଜୈବିକ ବର୍ଜ୍ୟବସ୍ତୁକୁ ବ୍ୟବହାର କରି ପ୍ରତିଦିନ ପ୍ରାୟ ୫୦୦ ୟୁନିଟ ବିଜୁଳି ଉତ୍ପାଦନ କରାଯାଇ ପାରୁଛି । ହାଇଦ୍ରାବାଦ ବାହାରେ ସିକନ୍ଦରାବାଦରେ ଏକ ବଡ ପରିବା ମଣ୍ଡି ରହିଛି । ପ୍ରାୟ ୫୫ ବର୍ଷ ପୁରୁଣା ଏହି ମଣ୍ଡିକୁ କରୋନା ଭାଇରସ ମହାମାରୀ ସମୟରେ ବି ଲୋକେ ଯା’ଆସ କରୁଥିଲେ । ତେବେ ଏହି ମଣ୍ଡିରେ କେବଳ ବିଜୁଳି ନୁହେଁ ପଚା ପରିବାରୁ ୩୦ କିଲୋଗ୍ରାମ ବାୟୋଗ୍ୟାସ ବି ପ୍ରସ୍ତୁତ କରାଯାଉଛି । ଉତ୍ପାଦନ ହେଉଥିବା ୫୦୦ ୟୁନିଟ ବିଜୁଳିରୁ ପ୍ରାୟ ୧୦୦ ଷ୍ଟ୍ରିଟ ଲାଇଟ ଜଳିବାର କ୍ଷମତା ଥିବା ବେଳେ ଏଥିରୁ ମଣ୍ଡିରେ ଥିବା ୧୭୦ ଷ୍ଟଲ, ଏକ ଆଡମିନିଷ୍ଟ୍ରେଟିଭ ବିଲଡିଂ ଓ ପାନୀୟ ଜଳ ଯୋଗାଣ ପାଇଁ ଏହା ବ୍ୟବହାର କରାଯାଉଛି । ଆଉ ୩୦ କିଲୋଗ୍ରାମ ବାୟୋଗ୍ୟାସକୁ ମଣ୍ଡିରେ ଥିବା କ୍ୟାଣ୍ଟିନକୁ ଯୋଗାଇ ଦିଆଯାଉଛି । ଯେତେବେଳେ ଏହି ମଣ୍ଡିରେ ପରିବା ସବୁକୁ ନଷ୍ଟ କରି ଦିଆଯାଉଥିଲା ସେତେବେଳେ ହାଇଦ୍ରାବାଦର ସିଏସ୍ଆଇଆର୍ ଇଣ୍ଡିଆନ ଇନଷ୍ଟିଚ୍ୟୁଟ ଅଫ୍ କେମିକାଲ ଟେକ୍ନୋଲୋଜିର ବୈଜ୍ଞାନକ ମାନେ ଏହା ଉପରେ କାମ ଆରମ୍ଭ କରିଦେଇଥିଲେ । ଆଉ ଏବେ ଏହାର ଫଳ ବି ମିଳି ସାରିଛି । ଏବେ ଆଇଆଇସିଟିର ଦେଖାରଖାରେ ଏକ ଇଞ୍ଜିନିୟରିଂ ସର୍ଭିସେସ ପ୍ରାଇଭେଟ ଲିମିଟେଡ ଏହି କାମ କରୁଛି । ତେବେ ପରିବାରୁ ଖାଦ୍ୟ ପ୍ରସ୍ତୁତ କରିବା ସହଜ ହେଲେ ବିଜୁଳି ଉତ୍ପାଦନ ସାମାନ୍ୟ କଷ୍ଟକର ବ୍ୟାପାର । ଏଥିପାଇଁ ପ୍ରଥମେ ପଚା ପରିବାର ଏକ ଘୋଳ ପ୍ରସ୍ତୁତ କରାଯାଇଥାଏ । ଏହାପରେ ଏହାକୁ ଏକ ବଡ କଣ୍ଟେନରରେ ଢାଳି ଦିଆଯାଏ ଯାହା ଫଳରେ ଏହା ଜୈବ ଇନ୍ଧନରେ ପରିଣତ ହେବ । ଏଥିରେ କାର୍ବନ ଡାଇଅକ୍ସାଇଡ ଓ ମିଥେନ ଗ୍ୟାସ ରହିଥାଏ ଏହାପରେ ଏହାକୁ ଜେନେରେଟରେ ବ୍ୟବହାର କରି ବିଜୁଳି ଉତ୍ପାଦନ କରାଯାଇଥାଏ । ବିଜ୍ଞାନ ପ୍ରସାର ପତ୍ରିକା ଅନୁଯାୟୀ, ବୈଜ୍ଞାନିକ ଡାକ୍ତର ଏ ଜି ରାଓ କୁହନ୍ତି ଏବେ ପର୍ଯ୍ୟନ୍ତ ଏଠାରେ ପାଖାପାଖି ୧୪୦୦ଟନ ପରିବାରୁ ବିଜୁଳି ଉତ୍ପାଦନ କରି ସାରିଲେଣି । ଏଥିରୁ ପାଖାପାଖି ୩୨,୦୦୦ୟୁନିଟ ବିଜୁଳି ଉତ୍ପାଦନ ହୋଇ ସାରିଲାଣି । ଏହାପରେ ହାଇଦ୍ରାବାଦର ଆଉ ୫ ମଣ୍ଡିରେ ଏଭଳି ଯୋଜନା କରାଯିବାର କାର୍ଯ୍ୟକ୍ରମ ପ୍ରସ୍ତୁତ କରାଯାଉଛି । ଅତିତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ପରିବା ମଣ୍ଡି ସମ୍ପର୍କରେ ତାଙ୍କ ‘ମନ କି ବାତ’ କାର୍ଯ୍ୟକ୍ରମରେ ଆଲୋଚନା କରି ସାରିଛନ୍ତି ।
