ବରଗଡ଼,୪।୧୦(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ଦାଦନ ସମସ୍ୟା ଅସମାହିତ ରହିଛି। ଜିଲାର ପଦ୍ମପୁର ଉପଖଣ୍ଡରେ ଏହି ସମସ୍ୟା ଲାଗି ରହିଛି। ଏଠାରୁ ପ୍ରତିବର୍ଷ ରାଜ୍ୟ ବାହାରକୁ ଲୋକେ ଦାଦନ ଖଟିବାକୁ ଯାଉଛନ୍ତି। ହେଲେ ସେମାନଙ୍କ ପ୍ରତି ନିର୍ଯାତନା ଥମୁ ନାହିଁ। ଅଧିକ ପାରିଶ୍ରମିକ ପ୍ରଲୋଭନରେ ପଡ଼ି ରାଜ୍ୟ ବାହାରକୁ ଯାଉଥିବା ପ୍ରବାସୀ ଶ୍ରମିକଙ୍କୁ ପାରିଶ୍ରମିକ ବଦଳରେ ଶାରୀରିକ, ମାନସିକ ନିର୍ଯାତନା ମିଳୁଛି ତ ଆଉକେବେ ଘରକୁ ଫେରିବାକୁ ଚାହୁଁଥିଲେ ମଧ୍ୟ କାରଖାନା ମାଲିକଙ୍କ ପାଖରେ ସେମାନଙ୍କୁ ବନ୍ଧା ପଡ଼ିବାକୁ ପଡୁଛି। ଏଭଳି ଦାଦନ ଦୁଃଖ ନେଇ ଶନିବାର ଏକ ଲୋମଟାଙ୍କୁରା ଘଟଣା ସାମ୍ନାକୁ ଆସିଛି। ଜିଲାର ପଦ୍ମପୁର ଉପଖଣ୍ଡ ମେଲଛାମୁଣ୍ଡା ଅଞ୍ଚଳରୁ ତାମିଲନାଡୁକୁ ଦାଦନ ଖଟିବାକୁ ଯାଇଥିବାବେଳେ ସେଠାରେ ଶୁକ୍ରବାର ମୃତ ଜଣେ ପ୍ରବାସୀ ଶ୍ରମିକଙ୍କ ମୃତଦେହ ଘରକୁ ଫେରାଇବା ପାଇଁ ଏକ ନିର୍ଦ୍ଦିଷ୍ଟ କାରଖାନା ମାଲିକ ୨ଲକ୍ଷଟଙ୍କା ଦାବି କରିଛନ୍ତି ଏବଂ ଏପର୍ଯ୍ୟନ୍ତ ସେଠାରୁ ମୃତଦେହକୁ ଅଣାଯାଇ ନ ଥିବା ଭଳି ଗୁରୁତର ଅଭିଯୋଗ ହୋଇଛି। ଅନ୍ୟପଟେ ମୃତ ପ୍ରବାସୀ ଶ୍ରମିକଙ୍କ ମୃତଦେହ ଘରକୁ ଆଣିବା ପାଇଁ ମୃତକଙ୍କ ପରିବାର ଲୋକେ ଜିଲା ପ୍ରଶାସନକୁ ନିବେଦନ କରିଛନ୍ତି।
ସୂଚନା ଅନୁଯାୟୀ, ମେଲଛାମୁଣ୍ଡା ନିବାସୀ ମକରାମ ମହାନନ୍ଦଙ୍କ ଭାଇ କମଳ(୩୦)ଙ୍କ ସମେତ ଶିବୁ ଭୋଇ ଏବଂ ସାନ ଭରାସାଗର ପ୍ରାୟ ୨ବର୍ଷ ତଳୁ ତାମିଲନାଡୁକୁ ଦାଦନ ଖଟିବାକୁ ଯାଇଛନ୍ତି। ଏହି ରାଜ୍ୟର କୋଏମ୍ବାଟୁର ଅଧୀନ କାରୁମାଥାମ୍ପାଟି ନିକଟ ସେଲମବରାୟମପାଲାୟମସ୍ଥିତ ଏକ ହଳଦୀ କମ୍ପାନୀରେ କାମ କରୁଥିଲେ। ତେବେ ଶୁକ୍ରବାର ସନ୍ଧ୍ୟାରେ କମଳଙ୍କ ମୃତ୍ୟୁ ହୋଇଥିବା ନେଇ ଶିବୁ ଓ ସାନ ତାଙ୍କ ପରିବାର ଲୋକଙ୍କୁ ଫୋନରେ ସୂଚନା ଦେଇଥିଲେ। ଅନ୍ୟପଟେ ୨ଲକ୍ଷ ଟଙ୍କା ଜମାକଲେ ଯାଇ କମଳଙ୍କ ମୃତଦେହ ଛାଡ଼ିବା ପାଇଁ କହୁଛନ୍ତି। ଏହା ଜାଣିବା ପରେ ପରିବାର ଲୋକଙ୍କ ଆହୁରି ଦୁଃଖ ବଢ଼ାଇ ଦେଇଛି।
ମୃତକଙ୍କ ଭାଇ ନିର୍ମଳ କହିଛନ୍ତି, ଦି ପଇସା ରୋଜଗାର କରିବା ପାଇଁ କମଳ ତାମିଲନାଡ଼ୁ ଯାଇଥିଲା। କିଛି ରୋଜଗାର କରି ସେ ଘରକୁ ଫେରିବ ବୋଲି ଆଶା ମଧ୍ୟ କରିଥିଲୁ। କିନ୍ତୁ ସେଠାରେ ଭାଇର ମୃତ୍ୟୁ ହୋଇଗଲା। ମୃତଦେହ ମଧ୍ୟ ଘରକୁ ଫେରି ପାରୁ ନାହିଁ। ସେ କାମ କରୁଥିବା କାରଖାନା ମାଲିକ ୨ଲକ୍ଷ ଟଙ୍କା ଜମାକଲେ ଯାଇ ମୃତଦେହ ଫେରାଇବାକୁ କହୁଛନ୍ତି। ଗରିବ ଲୋକ, ଏବେ କେଉଁଠୁ ୨ଲକ୍ଷ ଟଙ୍କା ପାଇବୁ ବୋଲି ନିର୍ମଳ କହିଛନ୍ତି। ସେହିପରି କମଳଙ୍କ ଆଉଜଣେ ସମ୍ପର୍କୀୟ ମାଗୀ ସାଗର କହିଛନ୍ତି, ଭଣଜା କମଳ ଦାଦନ ଖଟିବାକୁ ଯାଇଥିଲେ। ସେଠାରେ ଜୀବନ ଚାଲିଗଲା। ମୃତଦେହ ଘରକୁ ଫେରିଲେ ଅନ୍ତତଃପକ୍ଷେ ଶେଷଦର୍ଶନ କରିପାରିବୁ ବୋଲି ମାଗୀ କହିଛନ୍ତି। ଆଉଜଣେ ସମ୍ପର୍କୀୟ ଶ୍ରୀମତୀ ଗୁରୁ କହିଛନ୍ତି, ନିଜ ଗୋଡ଼ରେ ଛିଡ଼ା ହେବି କହି କମଳ ତାମିଲନାଡ଼ୁ ଯାଇଥିଲେ। ହେଲେ କ’ଣ ହେଲା ଯେ ସେଠାରେ ତାଙ୍କର ମୃତ୍ୟୁ ହୋଇଗଲା, ଆମେ ଜାଣିପାରୁ ନାହୁଁ। ୨ଲକ୍ଷ ଟଙ୍କା ଦେଲେ ଯାଇ କମ୍ପାନୀବାଲା ମୃତଦେହ ଛାଡ଼ିବୁ କହୁଛନ୍ତି। ଏତେ ଟଙ୍କା କେଉଁଠୁ ପାଇବୁ। ସରକାର ଘରକୁ ମୃତଦେହ ଫେରାଇ ଆଣିବା ଦିଗରେ ପଦକ୍ଷେପ ନେବାକୁ ନିବେଦନ କରୁଛୁ।