ବ୍ରହ୍ମପୁର ଅଫିସ,୩୦।୬: ବ୍ରହ୍ମପୁରର ନାଳ ନର୍ଦ୍ଦମାରୁ ବର୍ଷା ପାଣି ତ୍ୱରିତ ନିଷ୍କାସନ ହୋଇପାରୁ ନ ଥିବାରୁ ମଶା ବଂଶ ବଢ଼ିବାରେ ଲାଗିଛି। ମଇଳା ପାଣି ଜମି ରହୁଥିବା ତଳିଆ ଓ ଖାଲୁଆ ଅଞ୍ଚଳରେ ଦିନରେ ମଧ୍ୟ ମଶା କାମୁଡ଼ୁଛନ୍ତି। ଅପରପକ୍ଷରେ ନର୍ଦ୍ଦମାରେ ମଶାମରା ତେଲ ନିୟମିତ ପକାଯାଉ ନ ଥିବା ଏବଂ ଟିଫା ମେଶିନ ଦ୍ୱାରା ଧୁଆଁ ଛଡ଼ା ଯାଉ ନ ଥିବା ୧୨ନଂ ୱାର୍ଡ ଅନ୍ତର୍ଗତ ହରିକୃଷ୍ଣ ନଗର ଉନ୍ନୟନ କମିଟି ଅଭିଯୋଗ କରିଛି। ପ୍ରତିକାର ଦିଗରେ ମହାନଗର ନିଗମ (ବିଏମସି) ବିଫଳ ହୋଇଥିବା ସମାଲୋଚନା କରାଯାଇଛି। କମିଟି ସାଧାରଣ ସମ୍ପାଦକ ତଥା ବାମପନ୍ଥୀ ନେତା ଅଶୋକ ଦାସ କହିଛନ୍ତି ପୂର୍ବରୁ ନିଗମ ପକ୍ଷରୁ ସପ୍ତାହରେ ଦୁଇଥର ନର୍ଦ୍ଦମା ଗୁଡ଼ିକରେ ମଶାମରା ତେଲ ପକାଯାଉଥିଲା। ଗତ କିଛିମାସ ହେବ ତେଲ ପକା ବନ୍ଦ ହୋଇଯାଇଛି। ନିଗମରେ ନିଜସ୍ବ ଟିଫା ମେଶିନ ଥାଇ ମଧ୍ୟ ମଶାମରା ଧୁଆଁ ସବୁ ସାହିରେ ଛଡ଼ାଯାଉ ନ ଥିବାରୁ ଡ଼ାଉଁଶ ମଶା ଉପଦ୍ରବ ବଢ଼ୁଛି। ଏହା ଫଳରେ ଲୋକେ ଅତିଷ୍ଠ ହୋଇଯାଇଛନ୍ତି। ପିଲାଙ୍କ ପାଠ ପଢ଼ା ବ୍ୟାହତ ହେଉଥିବା ଦାସ ଦର୍ଶାଇଛନ୍ତି। ନିଗମ ପକ୍ଷରୁ ତୁରନ୍ତ ମଶା ମରା ଅଭିଯାନ ଆରମ୍ଭ କରିବାକୁ ସେ ଦାବି କରିଛନ୍ତି। ଅପରପକ୍ଷରେ ସହରର ବୃହତ୍ତ ଜଳାଶୟ ବେଢ଼ା ବନ୍ଧ ପାର୍ଶ୍ୱ ଅଞ୍ଚଳ ୨୬ ଓ ୨୭ନଂ ୱାର୍ଡର ଅନେକ ବାସିନ୍ଦାଙ୍କ କହିବାନୁସାରେ ପୋଖରୀ ଭିତରେ ଓ ପାର୍ଶ୍ୱ ଇଲାକାରେ ଲଟାବୁଦା ମାଡିଛି। ଜଳାଶୟ ପୁନରୁଦ୍ଧାର ଦୂରେ ଥାଉ ଲଟାବୁଦା ସଫା କରାଯାଉନଥିବାରୁ ସମଗ୍ର ଅଞ୍ଚଳରେ ମଶା ଉପଦ୍ରବ ଚାଲିଛି। ଡ୍ରେନରୁ ମଇଳା ପାଣି ନିଷ୍କାସନ ପାଇଁ ସ୍ବତନ୍ତ୍ର ଯୋଜନା ଆରମ୍ଭ ହୋଇଥିବା ବିଏମସି ପକ୍ଷରୁ ସଫେଇ ଦିଆଯାଇଛି। ମଶା ଉପଦ୍ରବର ପ୍ରତିକାର ନିମନ୍ତେ ପଦକ୍ଷେପ ନିଆଯିବାର ନିଗମର ପରିମଳ ବିଭାଗ ପକ୍ଷରୁ କୁହାଯାଇଛି।