ଘର ଖାଲି ମୁଣ୍ଡ ଗୁଞ୍ଜିବା ପାଇଁ ଛାତଟିଏ ନୁହେଁ। ତା’ ଭିତରେ ମଣିଷର ଭାବ ଜଡିତ ଥାଏ। ତେଣୁ ଘର ପ୍ରତି ଭଲ ପାଇବା ସମସ୍ତଙ୍କର ଥାଏ। ତେଣୁ ନିଜ ଘରକୁ ସବୁଠୁ ସୁନ୍ଦରଭାବେ ସଜାଇବାକୁ ସମସ୍ତେ ଚାହାନ୍ତି। ମନ ପସନ୍ଦର ରଙ୍ଗରେ ରଙ୍ଗାଇବା ସହ ଘରର ଆଭ୍ୟନ୍ତରୀଣ ସାଜସଜ୍ଜାକୁ ବେଶ୍ ସୁନ୍ଦରଭାବେ କରିଥାନ୍ତି। ହେଲେ କେବେ କେହି ନିଜ ଘରକୁ କଳା ରଙ୍ଗରେ ରଙ୍ଗାଇବା ଦେଖିଛନ୍ତି କି? ସାଧାରଣତଃ କଳା ରଙ୍ଗକୁ ଅଶୁଭ ମଣାଯାଏ। ତେଣୁ କେହି ଘରକୁ ଏହି ରଙ୍ଗରେ ରଙ୍ଗାଇ ନ ଥାନ୍ତି। ହେଲେ ଆମେରିକା, ମାସାଚୁସେଟ୍ସସ୍ଥ ସ୍ପ୍ରିଙ୍ଗଫିଲ୍ଡରେ ଅଛି ଏମିତି ଏକ ଘର ଯାହା ଦେଖିବାକୁ ପୁରାପୁରି କଳା ରଙ୍ଗର। ଏହା ‘ଗଥ୍ ହୋମ୍’ ଭାବେ ବେଶ୍ ପରିଚିତ। ଦୁଇ ମହଲାବିଶିଷ୍ଟ ଏହି ଘରଟି ଅକ୍ଟାଗନ୍ ବା ଅଷ୍ଟଭୂଜାକାର ଅଟେ। ଅଧ ଏକର ଜମିରେ ନିର୍ମିତ ଏଇ ଘରର କେବଳ ବାହାରର ରଙ୍ଗ କଳା ନୁହେଁ ବରଂ ଭିତର ବି କଳା ରଙ୍ଗର। ଏମିତିକି ଏହାର ଇଣ୍ଟେରିୟର୍ ଡିଜାଇନ୍ ବି କଳା ରଙ୍ଗର। ଏହାର କେବଳ ଟାଇଲ୍୍ସ ଓ ଚଟାଣ ଧଳା ରଙ୍ଗର। ଏହାକୁ ଛାଡିଦେଲେ ଆଉ ସବୁ କଳା। ଆଉ କୋଠରୀଗୁଡିକ ଚାରିକୋଣିଆ ନୁହେଁ ବରଂ ଅଷ୍ଟଭୁଜାକାର। ଏହା ମଧ୍ୟରେ ଦୁଇଟି ବେଡ୍୍ରୁମ୍, ଦୁଇଟି ବାଥ୍ରୁମ୍, ରୋଷେଇ ଘର, ଲଣ୍ଡରୀ ରୁମ୍, ଓପନ୍ ଲିଭିଂ ଡାଇନିଂ ରୁମ୍, ଫାୟାରପ୍ଲେସ୍ ଅଛି। ଉପର ମହଲାରେ କ୍ୟାଥେଡ୍ରାଲ୍ ସିଲିଂ ହେବା ସହ ତିନୋଟି ସ୍କାଇଲାଇଟ୍, ଟାଇଲ୍ଡ ବାଥ୍ ସହ ଡବଲ୍ ଭ୍ୟାନିଟି ଓ ଓ୍ବାକ୍ ଇନ୍ ସାଓ୍ବାର ଅଛି। ଏହାର ଗ୍ୟାରେଜ୍ଟି ବି କଳାରଙ୍ଗର ଅଟେ। ଉକ୍ତ ଘରକୁ ଡିଜାଇନ୍ କରିଛନ୍ତି ଭଲ୍ଡେମର୍ଟ ନାମକ ଡିଜାଇନର୍। ଏହି ଘରକୁ ସେଠ ଗୁଡମ୍ୟାନ୍ କିଣିଥିଲେ, କାରଣ ତାଙ୍କୁ ଅଷ୍ଟଭୂଜାକାର ଘର ବହୁତ ଭଲ ଲାଗିଥିଲା। ଏହାର କିଛି ରୁମ୍ କଳା ରଙ୍ଗର ଥିଲା, ଯାହା ତାଙ୍କୁ ବହୁତ ଭଲ ଲାଗିଥିଲା। ପରେ ସେ ଧୀରେ ଧୀରେ ସେହି ଘରର ସବୁକିଛି କଳା ରଙ୍ଗରେ ପରିଣତ କରିଦେଇଥିଲେ। ଏବେ ସେ ତାଙ୍କର ଏଇ କଳା ଘରକୁ ବିକ୍ରି କରିବାକୁ ଯୋଜନା କରିଛନ୍ତି।
