ଓ୍ବାଶିଂଟନ, ୨୫।୫ : ଆମେରିକାର ଟେକ୍ସାସର ରୋବ ଏଲିମେଣ୍ଟାରୀ ସ୍କୁଲରେ ଜଣେ ୧୮ ବର୍ଷ ବୟସ୍କ ଯୁବକ ଗୁଳି ଚଳାଇଛନ୍ତି। ଏହି ଘଟଣାରେ ଏପର୍ଯ୍ୟନ୍ତ ୨୧ ଜଣଙ୍କ ମୃତ୍ୟୁ ଘଟିଛି। କୁହାଯାଉଛି ଯେ ଗତ ପାଞ୍ଚ ବର୍ଷ ମଧ୍ୟରେ ଏପର୍ଯ୍ୟନ୍ତ ଏହା ସବୁଠାରୁ ବଡ଼ ଧରଣର ଗୁଳିକାଣ୍ଡ।
ଆମେରିକାର ସ୍କୁଲ ଇତିହାସରେ ଏହା ପ୍ରଥମ ଘଟଣା ନୁହେଁ ।ଏ ପରିସଂଖ୍ୟାନରୁ ଜଣାପଡିଛି ଯେ ଏଭଳି ଘଟଣାରେ ଏପର୍ଯ୍ୟନ୍ତ ଶତାଧିକ ଲୋକଙ୍କ ଜୀବନ ଯାଇଛି। ଗତ ୨୩ ବର୍ଷ ମଧ୍ୟରେ ଏଭଳି ୯ଥର ଗୁଳିକାଣ୍ଡ ଘଟିଛି। ଏଥିରେ ମୋଟ ୧୫୧ ଜଣଙ୍କର ମୃତୁ୍ୟୁ ହୋଇଛି।
ଏପ୍ରିଲ ୧୯୯୯ରେ କଲୋରାଡୋର ଲିଟଲେଟନରେ କଲମ୍ବାଇନ ହାଇସ୍କୁଲରେ ଦୁଇଜଣ ଛାତ୍ର ୧୨ ସାଥୀ ଛାତ୍ରଙ୍କୁ ଗୁଳି କରି ହତ୍ୟା କରିଥିଲେ। ଏଥିରେ ଜଣେ ଶିକ୍ଷକଙ୍କର ମଧ୍ୟ ମୃତ୍ୟୁ ଘଟିଥିଲା। ବହୁ ଲୋକ ଆହତ ହୋଇଥିଲେ। ଏହି ହିଂସାତ୍ମକ ଘଟଣା ଘଟାଇବା ପରେ ଉଭୟ ଆକ୍ରମଣକାରୀ ମଧ୍ୟ ଆତ୍ମହତ୍ୟା କରିଥିଲେ।
ମାର୍ଚ୍ଚ ୨୦୦୫ରେ ରେଡ ଲେକ୍ ହାଇ ସ୍କୁଲରେ ଜଣେ ୧୬ ବର୍ଷର ଛାତ୍ର ତାଙ୍କର ଜେଜେବାପା ଏବଂ ତାଙ୍କ ସାଥୀଙ୍କୁ ସେମାନଙ୍କ ମିନେସୋଟା ଘରେ ହତ୍ୟା କରିଥିଲେ। ଏହା ପରେ ସେ ନିକଟସ୍ଥ ରେଡ ଲେକ୍ ହାଇ ସ୍କୁଲରେ ପହଞ୍ଚି ୫ ଜଣ ଛାତ୍ରଙ୍କୁ ହତ୍ୟା କରିଥିଲେ। ଆକ୍ରମଣକାରୀ ଆତ୍ମହତ୍ୟା କରିବା ପୂର୍ବରୁ ଜଣେ ଶିକ୍ଷକ ଏବଂ ଜଣେ ସୁରକ୍ଷାକର୍ମୀଙ୍କୁ ମଧ୍ୟ ହତ୍ୟା କରିଥିଲେ।
ଏପ୍ରିଲ ୨୦୦୭ରେ ଭର୍ଜିନିଆ ଟେକରେ ଜଣେ ୨୩ ବର୍ଷୀୟ ଛାତ୍ର ବ୍ଲାକ୍ସବର୍ଗରେ କ୍ୟାମ୍ପସକୁ ଟାର୍ଗେଟ କରିଥିଲେ। ଆକ୍ରମଣକାରୀ ୩୨ ଜଣଙ୍କୁ ହତ୍ୟା କରିବା ସହ ଆତ୍ମହତ୍ୟା କରିବା ପୂର୍ବରୁ ୨୪ରୁ ଅଧିକ ଲୋକଙ୍କୁ ଆହତ କରିଥିଲେ।
ଡିସେମ୍ବର ୨୦୧୨ରେ କନେକ୍ଟିକଟର ନିଉଟାଉନରେ ସ୍ୟାଣ୍ଡି ହୁକ ପ୍ରାଥମିକ ବିଦ୍ୟାଳୟରେ ଜଣେ ୧୯ ବର୍ଷର ଯୁବକ ୨୭ ଜଣଙ୍କୁ ହତ୍ୟା କରିଥିଲେ। ଆକ୍ରମଣକାରୀ ପ୍ରଥମେ ତାଙ୍କ ମା’ଙ୍କୁ ହତ୍ୟା କରିଥିଲେ। ଏହାପରେ ସେ ନିକଟସ୍ଥ ସ୍ୟାଣ୍ଡି ହୁକ ପ୍ରାଥମିକ ବିଦ୍ୟାଳୟକୁ ଯାଇ ୨୦ ଜଣ ଛାତ୍ର ଏବଂ ୬ ଜଣ ଶିକ୍ଷକଙ୍କୁ ହତ୍ୟା କରିଥିଲେ। ଏହା ପରେ ନିଜେ ଆତ୍ମହତ୍ୟା କରିଥିଲେ।
ଅକ୍ଟୋବର ୨୦୧୫ରେ ଓରେଗନର ରୋଜବର୍ଗରେ ଅନୁପୁଆ କମ୍ୟୁନିଟି କଲେଜରେ ଜଣେ ବ୍ୟକ୍ତି ଆତ୍ମହତ୍ୟା କରିବା ପୂର୍ବରୁ ୯ ଜଣଙ୍କୁ ହତ୍ୟା କରିଥିଲେ। ଏହି ଘଟଣାରେ ୯ ଜଣ ଆହତ ହୋଇଥିଲେ।
ଫେବୃଆରୀ ୨୦୧୮ ଫ୍ଲୋରିଡାର ପାର୍କଲ୍ୟାଣ୍ଡରେ ଥିବା ମାରଜୋରୀ ଷ୍ଟୋନମ୍ୟାନ ଡଗଲାସ ହାଇ ସ୍କୁଲରେ ହୋଇଥିବା ଆକ୍ରମଣରେ ୧୪ ଜଣ ଛାତ୍ରଙ୍କ ମୃତ୍ୟୁ ଘଟିଥିଲା। ଏହି ଆକ୍ରମଣରେ ୩ ଜଣ କର୍ମଚାରୀଙ୍କର ମଧ୍ୟ ମୃତ୍ୟୁ ଘଟିଥିବା ବେଳେ ବହୁ ଆହତ ହୋଇଥିଲେ। ଏହି ଘଟଣାରେ ୨୦ ବର୍ଷୀୟ ସନ୍ଦିଗ୍ଧଙ୍କ ବିରୋଧରେ ହତ୍ୟା ମାମଲା ରୁଜୁ କରାଯାଇଥିଲା।
ମେ ୨୦୧୮ ହ୍ୟୁଷ୍ଟନ ଅଞ୍ଚଳର ସାଣ୍ଟା ଫେ ହାଇସ୍କୁଲରେ ଜଣେ ୧୭ ବର୍ଷ ବୟସ୍କ ବାଳକ ଗୁଳି ଚଳାଇ ଥିଲେ। ଏଥିରେ ୧୦ ଜଣଙ୍କର ମୃତ୍ୟୁ ଘଟିଥିଲା। ଆମେରିକାରେ ଏଭଳି ଘଟଣା ବୃଦ୍ଧି ପାଉଥିଲେ ମଧ୍ୟ ଏହା ନିରାକରଣ ଏପର୍ଯ୍ୟନ୍ତ କରାଯାଇ ପାରୁ ନାହିଁ।
