ନୂଆଦିଲ୍ଲୀ, ୧୬।୧: ଦିଲ୍ଲୀ ମ୍ୟୁନିସିପାଲିଟି କର୍ପୋରେଶନ(ଏମ୍ସିଡି) ନିର୍ବାଚନକୁ ଦୃଷ୍ଟିରେ ରଖି ଭାଜପା ପକ୍ଷରୁ ରାଜଧାନୀର ଝୁମ୍ପୁଡ଼ି ବସ୍ତିରେ ନମୋ ସେବା କେନ୍ଦ୍ର ଖୋଲିବାକୁ ଯୋଜନା କରାଯାଉଛି। ରବିବାର ଦଳର ନେତାମାନେ ଏନେଇ ସୂଚନା ପ୍ରଦାନ କରିଛନ୍ତି। କେନ୍ଦ୍ର ସରକାରଙ୍କ ଯୋଜନାକୁ ଲୋକଙ୍କ ନିକଟରେ ପହଞ୍ଚାଇବା ପାଇଁ ଚଳିତ ବର୍ଷ ଶେଷରେ ହେବାକୁ ଥିବା ପୌରସଂସ୍ଥା ନିର୍ବାଚନ ପୂର୍ବରୁ ଏଭଳି କରାଯିବାକୁ ଯୋଜନା ରହିଛି। ଏଥିପାଇଁ ବର୍ତ୍ତମାନର କୋଭିଡ ଲହର ହ୍ରାସ ପାଇବାକୁ ଭାଜପା ପକ୍ଷରୁ ଅପେକ୍ଷା କରାଯାଇଛି।
ଦିଲ୍ଲୀ ଭାଜପା ଅଧ୍ୟକ୍ଷ ଆଦେଶ ଗୁପ୍ତା ରବିବାର କହିଛନ୍ତି ଯେ ଏହି ନମୋ କେନ୍ଦ୍ର ଖୋଲିବା ପାଇଁ ଆମର ପ୍ରସ୍ତୁତି ଶେଷ ହୋଇଛି। ଆସନ୍ତା ସପ୍ତାହରେ କୋଭିଡ ମାମଲା ହ୍ରାସ ପାଇବା ପରେ ଆମେ ପ୍ରାୟ ୨୦-୨୨ ବିଧାନସଭା ନିର୍ବାଚନମଣ୍ଡଳୀରେ ଥିବା ଝୁମ୍ପୁଡ଼ି ବସ୍ତିଗୁଡିକରେ କେନ୍ଦ୍ର ଖୋଲିବାକୁ ଯୋଜନା କରିଛୁ। ଗତ ବର୍ଷ ଅକ୍ଟୋବରରେ, ରାଜଧାନୀର ବସ୍ତି ବାସିନ୍ଦାଙ୍କ ନିକଟରେ ପହଞ୍ଚିବା ପାଇଁ ଦିଲ୍ଲୀ ଭାଜପା ପକ୍ଷରୁ ଝୁମ୍ପୁଡ଼ି ବସ୍ତିରେ ସମ୍ମାନ ଯାତ୍ରା ଆରମ୍ଭ କରାଯାଇଥିଲା।
୭୦ଟି ବିଧାନସଭା ନିର୍ବାଚନମଣ୍ଡଳୀରେ ନମୋ ସେବା କେନ୍ଦ୍ର ଖୋଲାଯିବାକୁ ଯୋଜନା ହୋଇଛି। ଏକ ଆକଳନ ଅନୁସାରେ ଦିଲ୍ଲୀର ଝୁମ୍ପୁଡ଼ି ବସ୍ତିରେ ୨୦ ଲକ୍ଷରୁ ଅଧିକ ଲୋକ ବାସ କରନ୍ତି। ସେମାନଙ୍କ ମଧ୍ୟରୁ ଅଧିକାଂଶ ଉତ୍ତରପ୍ରଦେଶ, ବିହାର, ଝାଡଖଣ୍ଡ ଏବଂ ପଶ୍ଚିମବଙ୍ଗରୁ ଆସିଥାନ୍ତି। ଦ୍ରୁତ ସହରୀକରଣ ମଧ୍ୟରେ ଆଜି ମଧ୍ୟ ଏହି ବସ୍ତିଗୁଡ଼ିକରେ ବିଶୁଦ୍ଧ ପାନୀୟ ଜଳ, ସ୍ବିରେଜ ଏବଂ ପରିମଳ, ସ୍ବାସ୍ଥ୍ୟ ସୁବିଧା ଭଳି ମୌଳିକ ସୁବିଧାର ଅଭାବ ରହିଛି। ପ୍ରତ୍ୟେକ ନମୋ କେନ୍ଦ୍ର ଏଭଳି ସମସ୍ୟାକୁ ଦୂର କରିବା ପାଇଁ କାର୍ଯ୍ୟ କରିବ।
ଦିଲ୍ଲୀରେ ପ୍ରାୟ ୭୦୦ଟି ବସ୍ତି କ୍ଲଷ୍ଟର ଅଛି ଯେଉଁଠାରେ ଗତ ନିର୍ବାଚନରେ ଭାଜପା ସଫଳ ହୋଇ ନ ଥିଲା। ଆମ୍ ଆଦ୍ମୀ ପାର୍ଟି ଏବଂ ଏହା ପୂର୍ବରୁ କଂଗ୍ରେସ ଝୁମ୍ପୁଡ଼ି ବସ୍ତି ଭୋଟରଙ୍କ ଉପରେ ପ୍ରାଧାନ୍ୟ ବିସ୍ତାର କରିଥିଲା।
