ସମ୍ବଲପୁର,୧୭ା୧(ବ୍ୟୁରୋ): ସମ୍ବଲପୁର ଅଇଁଠାପାଲି ଛକରେ ପୋଲିସ ଅନୁମୋଦନକ୍ରମେ ଏନ୍ଏଚ୍ଏଆଇ ପକ୍ଷରୁ ରାସ୍ତା ମଝିରେ କଂକ୍ରିଟ ଡିଭାଇଡର କରି ଛକ ରାସ୍ତା ବନ୍ଦ କରିଦିଆଯାଇଥିଲା। ଯାତ୍ରୀଙ୍କ ସମସ୍ୟାକୁ ନେଇ ବିଭିନ୍ନ ଗଣ ମାଧ୍ୟମରେ ଖବର ପ୍ରକାଶ ପାଇଥିଲା। ବିଜେଡି ପକ୍ଷରୁ ଏହାକୁ ନିନ୍ଦା କରାଯାଇଥିବା ବେଳେ ଜିଲା ଭାଜପା ପକ୍ଷରୁ ରାସ୍ତାରୋକୋ ଚେତାବନୀ ଦିଆଯାଇଥିଲା। ନିର୍ଦ୍ଧାରିତ ସମୟ ପୂର୍ବାହ୍ନ ୧୦ଟାରେ ଭାଜପା ଜିଲା ସଭାପତି ଗିରିଶ ପଟେଲ, ରେଙ୍ଗାଲି ବିଧାୟକ ନାଉରୀ ନାଏକ, ସମ୍ବଲପୁର ବିଧାୟକଙ୍କ ପ୍ରତିନିଧି ସମୀର ରଞ୍ଜନ ବାବୁଙ୍କ ନେତୃତ୍ୱରେ ଭାଜପା କର୍ମକର୍ତ୍ତା ପହଞ୍ଚତ୍ଥିଲେ। ହେଲେ କେତେଜଣ ପୋଲିସ କର୍ମଚାରୀ ଆସି ସେମାନଙ୍କୁ ଆନ୍ଦୋଳନ ବନ୍ଦ କରିବାକୁ କହିଥିଲେ। ଯଦି ସମସ୍ୟା ହେଉଛି ଏସ୍ପି ଅଫିସ ଯାଇ ଆଲୋଚନା କର ବୋଲି କହିଥିଲେ। ନେତାମାନେ ରାସ୍ତାରୋକୋ କାର୍ଯ୍ୟକ୍ରମ ବନ୍ଦକରି ଏସ୍ପି ବାତୁଲା ଗଙ୍ଗାଧରଙ୍କୁ ଭେଟି ଆଲୋଚନା କରିଥିଲେ। ଏହି ସମୟରେ ଏପ୍ସି ଗଙ୍ଗାଧର ୨ଦିନ ସମୟ ମାଗିଥିଲେ। ହେଲେ ଭାଜପା ନେତାମାନେ ଦିନଟିଏ ସମୟ ଦେଇ ଚାଲିଆସିଥିଲେ। ପରେ ଏସ୍ପି ଅଫିସ ସମ୍ମୁଖରେ ସେମାନେ ନିଜ ଭିତରେ ଆଲୋଚନା କରିଥିଲେ। ଲୋକଙ୍କ ସମସ୍ୟା ପାଇଁ ରାସ୍ତାରୋକୋ କରି ତୁରନ୍ତ ଡିଭାଇଡର ଭାଙ୍ଗିଦେବାର ଥିଲା ବୋଲି ନେତା ବାବୁ କହୁଥିଲେ। ହେଲେ ବିଧାୟକ ନାଏକ କାହିଁକି ଏଭଳି କରିବ, ଏହା କଲେ ଆମ ପିଠିରେ କେହି ପଡିବେ ନାହିଁ ବୋଲି କହିଥିଲେ। ଉପସ୍ଥିତ ଥିବା କେତେଜଣ କର୍ମକର୍ତ୍ତା ଏହି କଥାକୁ ସହଜରେ ଗ୍ରହଣ କରିପାରି ନ ଥିଲେ। ଏହା ପ୍ରଚାର ହେବା ପରେ ସହରରେ ଚର୍ଚ୍ଚା ହୋଇଥିଲା। ଅନ୍ୟପଟେ ସନ୍ଧ୍ୟା ସମୟରେ ପ୍ରଶାସନ ପକ୍ଷରୁ ଜେସିବି ଲଗାଇ ଡିଭାଇଡରକୁ ଭାଙ୍ଗି ଦିଆଯାଇଛି। କାଇଁଶିରରେ ସ୍ଥାନୀୟ ଅଞ୍ଚଳବାସୀଙ୍କୁ ନେଇ ଏକ ବୈଠକ ଅନୁଷ୍ଠିତ ହୋଇଥିଲା। ଦୀର୍ଘ ୩ଦିନ ଧରି ଅଞ୍ଚଳବାସୀ ପ୍ରଶାସନର ତ୍ରୁଟି ଯୋଗୁ ଯେଉଁ ସମସ୍ୟା ଭୋଗିଥିଲେ ତାହାକୁ ନିନ୍ଦା କରାଯାଇଥିଲା। ଅଇଁଠାପାଲି ଛକରେ ସବ୍ରୋଡ୍ ନିର୍ମାଣ କରିବାକୁ ଏନ୍ଏଚ୍ଏଆଇ ପାଖରେ ଦାବି କରାଯିବ ବୋଲି ସ୍ଥିର ହୋଇଥିଲା। ପ୍ରଶାସନର ଭୁଲ ଯୋଗୁ କଂକ୍ରିଟ ଡିଭାଇଡର ନିର୍ମାଣ କରି ସରକାରୀ ଟଙ୍କା ବରବାଦ କରାଯାଇଛି। ସ୍ଥାୟୀ ସମାଧାନ ନ ହେଲେ ଛାତ୍ରୀଛାତ୍ର, ବୃଦ୍ଧ, ମହିଳା ଓ ପୁରୁଷ ଆନ୍ଦୋଳନକୁ ଓହ୍ଲାଇବେ ବୋଲି ମତପ୍ରକାଶ ପାଇଥିଲା।
