ଭୁବନେଶ୍ୱର,୮ା୬(ବ୍ୟୁରୋ): ବାହାନଗା ରେଳ ଦୁର୍ଘଟଣା ପ୍ରସଙ୍ଗରେ ୨ ବରିଷ୍ଠ ଭାଜପା ନେତା ମୁହଁାମୁହିଁ ହୋଇଛନ୍ତି। ବରିଷ୍ଠ ଭାଜପା ନେତା ବିଜୟ ମହାପାତ୍ର ମଙ୍ଗଳବାର ରେଳ ଦୁର୍ଘଟଣା ଉପରେ ଦେଇଥିବା ବୟାନକୁ ନେଇ ବୁଧବାର ତାଙ୍କ ନିଜ ଦଳ ପକ୍ଷରୁ ତୀବ୍ର ବିରୋଧ ହୋଇଛି। ବିଜୟଙ୍କୁ କଡ଼ା ସମାଲୋଚନାକରି ଦଳର ବରିଷ୍ଠ ନେତା ସମୀର ଦେ ଓ ସଜ୍ଜନ ଶର୍ମା ମୁହଁ ଖୋଲିଛନ୍ତି। ବିଜୟ ମହାପାତ୍ର ନିଜର ରାଜନୀତିକ ଉଦ୍ଦେଶ୍ୟ ରଖି ଦେଶବାସୀଙ୍କୁ ଭ୍ରମିତ କରିବାକୁ ଦାୟିତ୍ୱହୀନ ଓ ବେପରୁଆ ବୟାନ ଦେଉଛନ୍ତି ବୋଲି ଭାଜପା ଅଭିଯୋଗ କରିଛି। ଭାଜପା ନେତା ପୂର୍ବତନ ମନ୍ତ୍ରୀ ସମୀର ଦେ ଏକ ପ୍ରେସ୍ ବିଜ୍ଞପ୍ତି ଜରିଆରେ ବିଜୟ ମହାପାତ୍ରଙ୍କ ବୟାନକୁ ଖଣ୍ଡନ କରିବା ସହ ତାଙ୍କୁ କଡ଼ା ଭାଷାରେ ସମାଲୋଚନା କରିଛନ୍ତି। ବାହାନଗା ଟ୍ରେନ୍ ଦୁର୍ଘଟଣାରେ ଦେଶବାସୀ ମ୍ରିୟମାଣ ହୋଇଥିବାବେଳେ ବିଜୟଙ୍କ ଭଳି ଦୂରଦୃଷ୍ଟିସମ୍ପନ୍ନ ନେତା ତଥାକଥିତ ବିରୋଧୀ ଦଳ ନେତାଙ୍କ ଭଳି ନିଜର ରାଜନୀତିକ ଉଦ୍ଦେଶ୍ୟ ରଖି ମନ୍ତବ୍ୟ ଦେବା ଆଦୌ ଉଚିତ ହୋଇନାହିଁ। ଦୁର୍ଘଟଣାର ପ୍ରକୃତ କାରଣ ଓ ଦୋଷୀଙ୍କୁ ଲୋକଲୋଚନକୁ ଆଣିବା ପାଇଁ ସିବିଆଇ ଦ୍ୱାରା ନିରପେକ୍ଷ ତଦନ୍ତ ଜାରି ରହିଥିବା ବେଳେ ବିଜୟ ଏଭଳି ମନ୍ତବ୍ୟ ରଖି ଭାଜପା ସମେତ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ପ୍ରତି ଥିବା ନିଜର ଅସହିଷ୍ଣୁତାକୁ ପଦାରେ ପକାଇଛନ୍ତି। ଯଦି ବିଜୟଙ୍କ ପାଖରେ ଏତେ ସବୁ ତଥ୍ୟ ଥିଲା ତେବେ ଗଣମାଧ୍ୟମ ଆଗରେ ମନ୍ତବ୍ୟ ରଖିବା ପୂର୍ବରୁ ଦେଶବାସୀଙ୍କ ସ୍ବାର୍ଥ ଦୃଷ୍ଟିରୁ ରେଳମନ୍ତ୍ରୀ କିମ୍ବା ରେଳ ବିଭାଗକୁ ଜଣାଇଥିଲେ ଅସୁବିଧା କେଉଁଠି ଥିଲା ବୋଲି ସମୀର ପ୍ରଶ୍ନ କରିଛନ୍ତି। ଏବେ ଏଭଳି ମନ୍ତବ୍ୟ ରଖି କେବଳ ନିଜକୁ ଗଣମାଧ୍ୟମରେ ବଞ୍ଚାଇ ରଖିବାକୁ ସେ ଉଦ୍ୟମ କରୁଛନ୍ତି। ମୋଦି ସରକାରଙ୍କ ବିକାଶମୂଳକ କାର୍ଯ୍ୟ ଉପରେ ଦେଶବାସୀଙ୍କ ଅଖଣ୍ଡ ବିଶ୍ୱାସ ଓ ଭରସା ରହିଛି। ଦୁର୍ଘଟଣାରେ ଯିଏ ଦୋଷୀ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଶ୍ୱସ୍ତ କରାଯାଇସାରିଛି। ତେଣୁ ବିଜୟ ସାଧାରଣ ଲୋକଙ୍କୁ ଭ୍ରମିତ କରିବା ପାଇଁ ଯେତେ ଦାୟିତ୍ୱହୀନ ଓ ବେପରୁଆ ମନ୍ତବ୍ୟ ଦେଲେ ତା’ର କିଛି ପ୍ରଭାବ ପଡ଼ିବ ନାହିଁ ବୋଲି ସମୀର କହିଛନ୍ତି। ସେହିପରି ଭାଜପା ନେତା ସଜ୍ଜନ ଶର୍ମା ସାମାଜିକ ଗଣମାଧ୍ୟମରେ ପ୍ରତିକ୍ରିୟା ରଖି କହିଛନ୍ତି, ବିଜୟ ଓଡ଼ିଶାର ସୁବ୍ରମଣ୍ୟମ ସ୍ବାମୀ ହେବାକୁ ଚାହୁଁଛନ୍ତି, ଯିଏ ନିଜେ କୌଣସି ଅନୁଶାସନ ମାନନ୍ତି ନାହିଁ। ସୂଚନାଯୋଗ୍ୟ, ବିଜୟ ମହାପାତ୍ର ରେଳ ଦୁର୍ଘଟଣା ପ୍ରସଙ୍ଗରେ ରେଳ ମନ୍ତ୍ରଣାଳୟକୁ ମଧ୍ୟ ଟାର୍ଗେଟ କରିଥିଲେ।
