ମୁମ୍ବାଇ, ୬।୯ : ଭାରତୀୟ ଜନତା ପାର୍ଟି (ଭାଜପା) ବମ୍ବେ ମ୍ୟୁନିସପାଲ କର୍ପୋରେଶନ(ବିଏମ୍ସି) ନିର୍ବାଚନ ୨୦୨୨ ପାଇଁ ପ୍ରସ୍ତୁତି ଆରମ୍ଭ କରିଛି। ନିର୍ବାଚନ ସମ୍ପର୍କରେ ଭାଜପାର ରୂପରେଖା ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ମୁମ୍ବାଇ ଗସ୍ତରେ ପ୍ରାୟ ସ୍ପଷ୍ଟ ହୋଇସାରିଛି। ଅମିତ ଶାହା କହିଥିଲେ ଯେ ଏଥର ଉଦ୍ଧବ ଠାକରେଙ୍କୁ ତାଙ୍କ ସ୍ଥାନ ଦେଖାଇବାକୁ ପଡିବ। ଏହି ମର୍ମରେ ମଙ୍ଗଳବାର ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ ବିଏମସି ନିର୍ବାଚନ ସମ୍ପର୍କରେ ଭାଜପାର ଆଭିମୁଖ୍ୟ ଏବଂ ସ୍ଥିତି ସ୍ପଷ୍ଟ କରିଛନ୍ତି।
ଭାରତୀୟ ଜନତା ପାର୍ଟି ଏବଂ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କର ସମର୍ଥକଙ୍କ ସହିତ ମିଳିତ ଭାବେ ବିଏମସି ନିର୍ବାଚନରେ ଲଢ଼ି ଏବଂ ଜିତିବେ ବୋଲି ଫଡନାଭିସ ସୂଚନା ଦେଇଛନ୍ତି। ଫଡନାଭିସଙ୍କ ଏହି ବିବୃତ୍ତିରୁ ଏହା ସ୍ପଷ୍ଟ ହୋଇଛି ଯେ ଭାଜପା ଏକୁଟିଆ ନୁହେଁ ମିଳିତ ଭାବେ ନିର୍ବାଚନ ଲଢ଼ିବାକୁ ପ୍ରସ୍ତୁତ ହୋଇଛି।
ଅମିତ ଶାହା ଭାଜପା ପାଇଁ ମିଶନ ୧୩୫ର ସ୍ଲୋଗାନ ଦେଇଛନ୍ତି। ଅପରପକ୍ଷରେ ଫଡନାଭିସ କହିଛନ୍ତି ଯେ ଏଥର ବିଏମସି ନିର୍ବାଚନର ଅର୍ଥ ହେଉଛି ଆର କିମ୍ବା ପାରର ଶେଷ ଯୁଦ୍ଧ। ଏହା ଏକ ଉପାୟ ଯାହାଦ୍ୱାରା ଉଦ୍ଧବ ଠାକରେଙ୍କ ଶିବସେନାକୁ ସବୁଦିନ ପାଇଁ ହଟାଯାଇପାରିବ।
ମଙ୍ଗଳବାର ଶିନ୍ଦେ ତାଙ୍କର ସମସ୍ତ ବିଧାୟକଙ୍କୁ ରାତ୍ରୀ ଭୋଜନ ପାଇଁ ନିମନ୍ତ୍ରଣ କରିଛନ୍ତି। କୁହାଯାଉଛି ଏହି ଅବସରରେ ଦଶହରା ରାଲି ଉପରେ ଆଲୋଚନା ହେବ। ଏଥି ସହିତ ଶିନ୍ଦେ ବିଏମସି ନିର୍ବାଚନ ସମ୍ପର୍କରେ ତାଙ୍କ ବିଧାୟକଙ୍କ ସହ ମଧ୍ୟ ଆଲୋଚନା କରିିବେ।
