ସୋନପୁର,୬।୮(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ଜିଲା ଯୋଜନା କମିଟିରେ ଖାଲିଥିବା ୧୧ ଆସନ ପାଇଁ ନିର୍ବାଚନ ଅନୁଷ୍ଠିତ ହୋଇଥିଲା। ଜିଲାର ନିର୍ବାଚିତ ଜିଲା ପରିଷଦ ସଭ୍ୟାସଭ୍ୟ ଏହି ନିର୍ବାଚନରେ ଅଂଶଗ୍ରହଣ କରିଥିଲେ। ତେବେ ଖାଲିଥିବା ଆସନ ପାଇଁ ଜଣେ ଲେଖାଏ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଥିଲେ। ଫଳରେ ସମସ୍ତ ପ୍ରାର୍ଥୀ ନିର୍ଦ୍ୱନ୍ଦ୍ୱରେ ବିଜୟୀ ହୋଇଛନ୍ତି। ସମସ୍ତ ସଦସ୍ୟଙ୍କୁ ବୁଧବାର ବିଜୟ ପ୍ରମାଣପତ୍ର ପ୍ରଦାନ କରାଯାଇଛି। ବିଜେଡିର ପ୍ରାର୍ଥୀମାନେ ୧୦ଟି ଆସନରେ ବିଜୟ ଲାଭ କରିଥିବା ବେଳେ ଗୋଟିଏ ଆସନ ବିରୋଧୀ କଂଗ୍ରେସ ପ୍ରାର୍ଥୀଙ୍କୁ ଛାଡ଼ି ଦେଇଛନ୍ତି। ଭାଜପାର ଏକମାତ୍ର ଜିଲା ପରିଷଦ ସଦସ୍ୟ ଥିବା ପ୍ରମିଳା କଲତା ଏହି ନିର୍ବାଚନରୁ ଦୂରେଇ ରହିଥିଲେ। ଚଳିତ ଡିପିସି ନିର୍ବାଚନରେ ଜିଲାରେ ନୂଆ ସମୀକରଣ ଦେଖିବାକୁ ମିଳିଛି। ବିଜେଡି ଓ କଂଗ୍ରେସ ମଧ୍ୟରେ ଅଘୋଷିତ ମେଣ୍ଟ ସମସ୍ତ ଆସନ ପୋଛି ନେଇଛନ୍ତି। ରାଜ୍ୟରେ ଶାସକ ଭାଜପା ଦଳ ଡିପିସି ନିର୍ବାଚନରେ ଜିଲାରେ ଜଳକା ହୋଇ ରହିଯାଇଛି। ଏମ୍ପି, ବିଧାୟକ ଓ ଭାଜପା ନେତୃବୃନ୍ଦ ନିର୍ବାଚନକୁ ଗୁରୁତ୍ୱ ନ ଦେଇ ଚୁପ୍ ରହିବା ସମସ୍ତଙ୍କୁ ଆଶ୍ଚର୍ଯ୍ୟାନ୍ବିତ କରିଛି। ବିଜେଡି ଓ କଂଗ୍ରେସ ଭିତରେ ଅଘୋଷିତ ମେଣ୍ଟ ହେବା ପରେ ସଂଖ୍ୟା ଦୃଷ୍ଟିରୁ ସମସ୍ତ ଆସନରେ ବିଜୟ ହେବା ସୁନିଶ୍ଚିତ ଥିଲା। ତେଣୁ ଭାଜପାର ଏକମାତ୍ର ଜିଲା ପରିଷଦ ସଦସ୍ୟା ନିର୍ବାଚନରୁ ଦୂରେଇ ରହିଲେ ବୋଲି ଦଳ ପକ୍ଷରୁ ସଫେଇ ଦିଆଯାଇଛି।
ନିର୍ବାଚିତ ଡିପିସି ସଦସ୍ୟଙ୍କ ମଧ୍ୟରୁ ୫ଜଣ ସାଧାରଣ ବର୍ଗର ଓ ୬ଜଣ ମହିଳା। ବିଜେଡିର ୧୦ ନିର୍ବାଚିତ ସଦସ୍ୟ ହେଲେ ଉଲୁଣ୍ଡା ବ୍ଲ୍ଳକ ଜିଲା ପରିଷଦ ଜୋନ ୧ର ବିଜୟଲକ୍ଷ୍ମୀ ତରାଇ, ଜୋନ ୨ର ଝସକେତନ ବଘାର, ଡୁଙ୍ଗୁରିପାଲି ବ୍ଲକ ଜୋନ ୧ର ସୁପାର ଠେଲା, ୨ର ମଞ୍ଜୁଶ୍ରୀ ମାଝୀ, ୩ର ଗଣେଶ ଚନ୍ଦ୍ର ଭୋଇ, ତରଭା ବ୍ଲକ ଜୋନ ୧ର ଅଞ୍ଜଳି କମ୍ପ, ୨ର ଶକୁନ୍ତଳା ପୃଷ୍ଟି, ବିନିକା ବ୍ଲକ ଜୋନ ୨ର ବଶିଷ୍ଠ ଭରାସାଗର, ବୀରମହାରାଜପୁର ବ୍ଲକ ଜୋନ ୨ର ଚନ୍ଦ୍ରକାନ୍ତି ଦନ୍ତା ଓ ସୋନପୁର ବ୍ଲକ ଜୋନ ୨ର ମଧୁସୂଦନ ଓତା। ସେହିପରି ବୀରମହାରାଜପୁର ବ୍ଲକ ଜୋନ ୧ର କଂଗ୍ରେସ ଜିଲା ପରିଷଦ ସଦସ୍ୟ ଲବ କୁମାର ସାହୁ ଡିପିସି ସଦସ୍ୟ ଭାବେ ନିର୍ବାଚିତ ହୋଇଛନ୍ତି। ଗତ ପଞ୍ଚାୟତ ନିର୍ବାଚନରେ ବିଜେଡିକୁ ଆଶାତିତ ସଫଳତା ମିଳିଥିଲା। ଜିଲାର ମୋଟ ୧୩ ଜିଲା ପରିଷଦ ସଭ୍ୟଙ୍କ ମଧ୍ୟରୁ ବିଜେଡିର ୧୧ ଜଣ ବିଜୟୀ ହୋଇଥିଲା ବେଳେ, ଭାଜପାର ଜଣେ ଓ କଂଗ୍ରେସର ଜଣେ ସଦସ୍ୟ ନିର୍ବାଚିତ ହୋଇଥିଲେ। କିଛି ମାସ ପୂର୍ବରୁ ବିଜେଡି ଟିକେଟ୍ରେ ସୋନପୁର ବ୍ଲକ ଜୋନ୍ ୧ରୁ ବିଜୟ ଲାଭ କରିଥିବା ସସ୍ମିତା ମହାନ୍ତିଙ୍କ ପରଲୋକ ହୋଇଛି। ତେଣୁ ୧୨ ଜିଲା ପରିଷଦଙ୍କ ପାଇଁ ଡିପିସିର ୧୧ ଆସନ ସକାଶେ ନିର୍ବାଚନ ଅନୁଷ୍ଠିତ ହୋଇଥିଲା। ତେବେ ବିଜେଡି ପ୍ରାର୍ଥୀ ନିର୍ଦ୍ୱନ୍ଦ୍ୱରେ ବିଜୟ ହେବା ପରେ ଦଳୀୟ ଶିବିରରେ ଉତ୍ସାହ ପ୍ରକାଶ ପାଇଛି। ବୁଧବାର ଜିଲା ପରିଷଦ କାର୍ଯ୍ୟାଳୟରେ ନବନିର୍ବାଚିତ ସଦସ୍ୟମାନଙ୍କୁ ଶୁଭେଚ୍ଛା ଓ ସମ୍ବର୍ଦ୍ଧନା ପ୍ରଦାନ କରାଯାଇଥିଲା।
