ଭୁବନେଶ୍ୱର, ୯ା୨(ବ୍ୟୁରୋ):ଅରୁଆ ଓ ଉଷୁନା ଚାଉଳକୁ ନେଇ ରାଜନୀତି ଜୋର୍ ଧରିଛି। ସମ୍ପ୍ରତି ପଞ୍ଚାୟତ ନିର୍ବାଚନ ଥିବାରୁ ଅରୁଆ ଓ ଉଷୁନା ଚାଉଳକୁ ନେଇ ଉଭୟ ଶାସକ ବିଜେଡି ଏବଂ ଭାଜପା ନାଟକବାଜି କରୁଛନ୍ତି ବୋଲି ପ୍ରଦେଶ କଂଗ୍ରେସ କିଷାନ ସେଲ୍ ଅଧ୍ୟକ୍ଷ ଅମିୟ କୁମାର ପଟ୍ଟନାୟକ କହିଛନ୍ତି। ରାଜ୍ୟରେ ଧାନକିଣାକୁ ନେଇ ଅବ୍ୟବସ୍ଥା ଲାଗିରହିଥିବା ବେଳେ ଚାଷୀଙ୍କ ନିକଟରୁ ନିଜକୁ ବଞ୍ଚାଇବା ପାଇଁ ଉଭୟ ଦଳ ଏଭଳି ରାଜନୀତି ରଚିଛନ୍ତି। ଜାଣି ଅଜଣା ପରି ରାଜ୍ୟ ସରକାର ଯଥେଷ୍ଟ ପୂର୍ବରୁ କାହିଁକି ସଂଘୀୟ ବ୍ୟବସ୍ଥାରେ ଓଡ଼ିଶା ଚାଷୀଙ୍କ ହକ୍ ପାଇଁ ୧୭ଲକ୍ଷ ମେଟ୍ରିକ୍ ଟନ୍ ଉଷୁନା ଓ ଅରୁଆ ଚାଉଳ ଉଠାଇବାକୁ ଦାବି କଲେ ନାହିଁ ବୋଲି ସେ ପ୍ରଶ୍ନ କରିଛନ୍ତି। ସେ କହିଛନ୍ତି, ଛତିଶଗଡ଼ ସରକାର ଯେପରି ଚାଷୀଙ୍କୁ ଏମ୍ଏସ୍ପି ଉପରେ ପ୍ରାୟ ୫୬୦ଟଙ୍କା ବୋନସ୍ ଦେଉଛନ୍ତି, ସେହିପରି ଓଡ଼ିଶା ସରକାରଙ୍କର ଯଦି ଚାଷୀଙ୍କ ପାଇଁ ସତରେ ଚିନ୍ତା ରହିଛି ତେବେ ପ୍ରତି କୁଇଣ୍ଟାଲରେ ୫୦୦ ଟଙ୍କା ବୋନସ ଦିଅନ୍ତୁ। ଓଡ଼ିଶାରେ ଉଷୁନା ଚାଉଳ ମୁଖ୍ୟ ଉତ୍ପାଦ ହୋଇଥିବାବେଳେ ଅରୁଆ ପ୍ଲାଣ୍ଟ ପ୍ରୋସେସିଂ ୟୁନିଟ ଭିତ୍ତିଭୂମି, ବୈଷୟିକ ଜ୍ଞାନକୌଶଳ ପ୍ରଦାନ ଓ ଆବଶ୍ୟକ ସଂଖ୍ୟକ ଗୋଦାମ ଘର ନିର୍ମାଣ ଲାଗି ସୁଯୋଗ ସୃଷ୍ଟି କରାଯାଇ ନାହିଁ। ଅପରପକ୍ଷେ ପ୍ରଧାନମନ୍ତ୍ରୀ ୨୦୨୨ ସୁଦ୍ଧା ଚାଷୀଙ୍କ ଆୟ ଦ୍ୱିଗୁଣିତ କରିବେ ବୋଲି ୫ବର୍ଷ ତଳେ ଯେଉଁ ପ୍ରତିଶ୍ରୁତି ଦେଇଥିଲେ ତାହା ଏପର୍ଯ୍ୟନ୍ତ ହୋଇନାହିଁ। ସେହିପରି ଜାତୀୟ ସାମ୍ପୁଲ ସର୍ଭେ ଅନୁଯାୟୀ ଓଡ଼ିଶା ଚାଷୀଙ୍କ ଆୟ ବର୍ତ୍ତମାନ ତଳ ଆଡ଼ୁ ଦ୍ୱିତୀୟରେ ରହିଛି। ଉଭୟ କେନ୍ଦ୍ର ଓ ରାଜ୍ୟ ସରକାର ସାର ଯୋଗାଣରେ ମଧ୍ୟ ଅବହେଳା କରିଚାଲିଛନ୍ତି। ଯଦି କେନ୍ଦ୍ର ସରକାର ଓଡ଼ିଶାର ୨ଲକ୍ଷ ମେଟ୍ରିକ ଟନ୍ ଅରୁଆ ଓ ୧୫ଲକ୍ଷ ମେଟ୍ରିକ ଟନ ଉଷୁନା ଚାଉଳକୁ ଯୁଦ୍ଧକାଳୀନ ଭିତ୍ତିରେ ନ ଉଠାନ୍ତି ତେବେ ରାଜ୍ୟର ୧୦ଲକ୍ଷରୁ ଉର୍ଦ୍ଧ୍ୱ ଚାଷୀ କରିବେ କ’ଣ ଏବଂ ସେମାନଙ୍କ ଆୟ କିପରି ଦ୍ୱିଗୁଣିତ ହେବ ବୋଲି ପଟ୍ଟନାୟକ ପ୍ରଶ୍ନ କରିଛନ୍ତି।
