ବିଷମ କଟକ,୧୪ା୩(ଡି.ଏନ୍.ଏ.):ରାୟଗଡ଼ା ଜିଲା ବିଷମକଟକ ବ୍ଲକ ୨୧ଟି ପଞ୍ଚାୟତକୁ ନେଇ ଗଠିତ। ଜନସଂଖ୍ୟା ୯୨,୦୦୦ ହଜାରରୁ ଉଦ୍ଧର୍ବ। ବ୍ଲକରେ ୩୧୫ରୁ ଉଦ୍ଧର୍ବ ରାଜସ୍ବ ଗାଁ ରହିଛି। ୧୯୫୩ରୁ ବିଷମକଟକ ତହସିଲ କର୍ଯ୍ୟାଳୟ ସ୍ଥାପିତ ହୋଇଛି। ଏହା ପୂର୍ବରୁ ଏହା ଅଞ୍ଚଳ କର୍ଯ୍ୟାଳୟ ହୋଇଥିଲା। ୨୦୦୯ରେ ବିଷମକଟକରୁ ମୁନିଗୁଡ଼ା ଓ ଚନ୍ଦ୍ରପୁରକୁ ବିଭକ୍ତ କରାଯାଇଥିଲା। ଏହାସତ୍ତ୍ୱେ ବିଷମକଟକ ତହସିଲ ଜିଲାରେ ଅଧିକ ରାଜସ୍ବ ଦେଇ ଆସୁଛି। ହେଲେ ଏ ଯାଏ ଏହି ପୁରାତନ ସହରକୁ ବିଜ୍ଞାପିତ ଅଞ୍ଚଳ ପରିଷଦ ଓ ଉପଖଣ୍ଡ ମାନ୍ୟତା ମିଳି ପାରିନାହିଁ। ଏଠାରେ ସମସ୍ତ ଭିତ୍ତିଭୂମି ରହିଥିବାରୁ ୧୯୯୨ରୁ ବିଷମକଟକକୁ ଉପଖଣ୍ଡ ମାନ୍ୟତା ପାଇଁ ଦାବି ହୋଇ ଆସୁଥିଲେ ମଧ୍ୟ ସରକାର ଏ ଦିଗରେ କୌଣସି ପଦକ୍ଷେପ ଗ୍ରହଣ କରୁନାହାନ୍ତି। ତେଣୁ ଜନସାଧାରଣଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଉପଖଣ୍ଡ ମାନ୍ୟତା ପ୍ରସଙ୍ଗ ନେଇ ସୋମବାର ସ୍ଥାନୀୟ ରାଜସ୍ବ ବଙ୍ଗଳାଠାରେ ବିଭିନ୍ନ ସଂଗଠନ ଓ ରାଜନୈତିକ ନେତୃବୃନ୍ଦଙ୍କ ଉପସ୍ଥିତିରେ ଏକ ବୈଠକ ହୋଇଥିଲା। ଆସନ୍ତା ୧୭ ତାରିଖରେ ଏକ ବିଶାଳ ଶୋଭାଯାତ୍ରା ସହ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରିିବାକୁ ବୈଠକରେ ନିଷ୍ପତ୍ତି ନିଆଯାଇଛି। ରାୟଗଡା ସଦର ମହକୁମାଠାରୁ ୫୦ କି.ମି. ଦୂରରେ ରହିଛି ବିଷମକଟକ ସହର। ଏକାଦଶ, ଦ୍ବାଦଶ ଖ୍ରୀଷ୍ଟାବ୍ଦର ଏହି ସହରରେ ପ୍ରଥମେ ରାଜା ମହାରାଜାଙ୍କ ରାଜୁତି ଚାଲିଥିଲା। ପରେ ଜୟପୁର ଜମିଦାରୀ ଅଧିନରେ ୮ପୁରୁଷ ଧରି ଥାଟରାଜାମାନେ ଶାସନ କରୁଥିଲେ। ୧୯୫୦ରେ ବିଷମକଟକ ପଞ୍ଚାୟତ ମାନ୍ୟତା ପାଇଥିଲା । ବର୍ତ୍ତମାନ ଏହି ପଞ୍ଚାୟତରେ ୧୫ଟି ୱାର୍ଡ ରହିଛି। ପଞ୍ଚାୟତର ଜନସଂଖ୍ୟା ୧୨ହଜାର ଟପିଲାଣି। ୧୯୬୨ରେ ବିଷମକଟକ ବ୍ଲକ ଗଠନ ହେଲା। ସେବେଠାରୁ ବିଷମକଟକ ବ୍ଳକ ସଦର ମହକୁମା ହୋଇଛି। ସହରରେ ରାଷ୍ଟ୍ରାୟତ ବ୍ୟାଙ୍କ, କୋର୍ଟ, ତହସିଲ ଅଫିସ, ସବରେଜିଷ୍ଟ୍ରିର ଅଫିସ, ହାଇସ୍କୁଲ, ଡିଗ୍ରି କଲେଜ, ଶିକ୍ଷକ ପ୍ରଶିକ୍ଷଣ କଲେଜ ସମେତ ବ୍ରିଟିଶ ଅମଳରୁ ପୋଲିସ ଷ୍ଟେଶନ ଅଛି। ଜିଲାର ଚନ୍ଦ୍ରପୁର, ମୁନିଗୁଡା ଓ ଗୁଡାରୀ ବ୍ଲକର ଅନେକ ଅଞ୍ଚଳ ଲୋକ ବ୍ୟବସାୟ ବାଣିଜ୍ୟ ପାଇଁ ବିଷମକଟକ ଉପରେ ନିର୍ଭର କରିଥାନ୍ତି। ଐତିହାସିକ ପୃଷ୍ଠଭୂମି ଥିବା ଏହି ସହରର କଳେବର ବଢ଼ି ଚାଲିଥିବା ସତ୍ତ୍ୱେ ସରକାର ଏ ଯାଏ ଏହାକୁ ବିଜ୍ଞାପିତ ଅଞ୍ଚଳ ପରିଷଦ ଓ ଉପଖଣ୍ଡ ମାନ୍ୟତା ଦେଇନାହାନ୍ତି। ଏଥିଲାଗି ବିଭିନ୍ନ ସମୟରେ ଆନ୍ଦୋଳନ ହୋଇଛି। ହେଲେ କେବଳ ପ୍ରତିଶ୍ରୁତି ଛଡ଼ା କୌଣସି ପଦକ୍ଷେପ ନିଆଯାଇନାହିଁ।
