ନୂଆଦିଲ୍ଲୀ, ୭ା୮(ପି.ଟି.): ଗୁରୁବାର ଅପରାହ୍ନ ୨ଟାରେ ଗୃହ କାର୍ଯ୍ୟ ପୁନଃ ଆରମ୍ଭ ହେବା ପରେ ଅର୍ଥମନ୍ତ୍ରୀ ନିର୍ମଳା ସୀତାରାମନ ‘କର ଓ ଅନ୍ୟାନ୍ୟ ଆଇନ (ସଂଶୋଧନ) ବିଲ୍, ୨୦୨୬’ କୁ ଆଲୋଚନା ଓ ଅନୁମୋଦନ ପାଇଁ ଆଗତ କରିଥିଲେ। ଏହି ବିଲ୍ରେ ‘ପେମେଣ୍ଟ ଆଣ୍ଡ୍ ସେଟଲମେଣ୍ଟ ସିଷ୍ଟମ୍ସ ଆକ୍ଟ, ୨୦୦୭’, ‘ଆୟକର ଆଇନ, ୨୦୨୫’ ଏବଂ ‘ଅର୍ଥ ଆଇନ, ୨୦୨୬’ର ସଂଶୋଧନ ପାଇଁ ପ୍ରସ୍ତାବ ରହିଛି।
ନୂତନ ବିଲ୍ରେ ‘ପେମେଣ୍ଟ ଆଣ୍ଡ ସେଟଲମେଣ୍ଟ ସିଷ୍ଟମ୍ସ ଆକ୍ଟ, ୨୦୦୭’ର ଧାରା ୧୦ଏରେ ସଂଶୋଧନ କରାଯାଇଛି। ପୂର୍ବରୁ ଆୟକର ଆଇନର ଧାରା ୨୬୯ଏସ୍ୟୁ ଅଧୀନରେ ନିର୍ଦ୍ଧାରିତ ଇଲେକ୍ଟ୍ରୋନିକ୍ସ ପେମେଣ୍ଟ ମୋଡ୍ଗୁଡ଼ିକ (ଯେପରିକି ରୁପେ ଡେବିଟ କାର୍ଡ ଓ ଭିମ୍-ୟୁପିଆଇ-କ୍ୟୁଆର୍) ଉପରେ କୌଣସି ପ୍ରକାର ଶୁଳ୍କ ଲଗାଇବା ସମ୍ପୂର୍ଣ୍ଣ ନିଷିଦ୍ଧ ଥିଲା। ଏବେ ସଂଶୋଧନ ପରେ, କେନ୍ଦ୍ର ସରକାର ଗଜେଟ୍ ବିଜ୍ଞପ୍ତି ଦ୍ୱାରା ଯେଉଁ ଇଲେକ୍ଟ୍ରୋନିକ୍ସ ମାଧ୍ୟମଗୁଡ଼ିକୁ ନିର୍ଦ୍ଦିଷ୍ଟ କରିବେ, ସେଗୁଡ଼ିକ ଉପରେ ଶୁଳ୍କ ଲାଗୁ ହୋଇପାରିବ। ବର୍ତ୍ତମାନର ନିୟମ ଅନୁଯାୟୀ ୫୦ କୋଟି ଟଙ୍କାରୁ ଅଧିକ ବାର୍ଷିକ କାରବାର କରୁଥିବା ବ୍ୟବସାୟୀଙ୍କ ପାଇଁ ରୁପେ ଏବଂ ୟୁପିଆଇ ଭଳି ଡିଜିଟାଲ ମାଧ୍ୟମ ଗ୍ରହଣ କରିବା ବାଧ୍ୟତାମୂଳକ ଥିଲା। ସରକାରୀ ଓ ଆର୍ବିଆଇର ସ୍ପଷ୍ଟୀକରଣ ଅନୁଯାୟୀ, ଡିଜିଟାଲ ପେମେଣ୍ଟ ସେବାକୁ ସୁରକ୍ଷିତ ଓ ନିରବଚ୍ଛିନ୍ନ ରଖିବା ସହ ବ୍ୟାଙ୍କ, ପେମେଣ୍ଟ ସର୍ଭିସ ପ୍ରୋଭାଇଡର୍ (ପିଏସ୍ପି) ଏବଂ ଡିଜିଟାଲ ଭିତ୍ତିଭୂମି ସଂସ୍ଥାଗୁଡ଼ିକ ପାଇଁ ଏକ ସ୍ଥାୟୀ ଆୟ ମଡେଲ ପ୍ରସ୍ତୁତ କରିବା ସରକାରଙ୍କ ମୁଖ୍ୟ ଲକ୍ଷ୍ୟ। ଆର୍ବିଆଇ ଗଭର୍ନର ସଞ୍ଜୟ ମାଲହୋତ୍ରା ବୁଧବାର କହିଛନ୍ତି, ଡିଜିଟାଲ ପେମେଣ୍ଟ ଉପରେ ଏମ୍ଡିଆର୍ (ମର୍ଚ୍ଚାଣ୍ଟ ଡିସ୍କାଉଣ୍ଟ ରେଟ୍) ଲାଗୁ ନେଇ ଚର୍ଚ୍ଚା କରିବା ବର୍ତ୍ତମାନ ପାଇଁ ‘ଅକାଳ ସମୟ’। ମାତ୍ର ଭିତ୍ତିଭୂମିର ବିକାଶ ଓ ପରିଚାଳନା ପାଇଁ ଅର୍ଥ ଆବଶ୍ୟକ। ଆମ ପାଖରେ ଦୁଇଟି ବିକଳ୍ପ ରହିଛି, ପ୍ରଥମଟି ହେଉଛି ସାଧାରଣ ଜନତା ସରକାରଙ୍କୁ ଦେଉଥିବା ଟ୍ୟାକ୍ସ ଅର୍ଥରୁ ଏହି ଖର୍ଚ୍ଚ ବହନ କରାଯିବ, ନଚେତ୍ ‘ବ୍ୟବହାରକାରୀ ଦେୟ’ ନୀତି ଅନୁସାରେ କାରବାର କରୁଥିବା ବ୍ୟବସାୟୀଙ୍କଠାରୁ ଏମ୍ଡିଆର୍ ଆଦାୟ କରାଯିବ। ତେଣୁ ଏହି ସଂଶୋଧନ ଜରୁରୀ ଥିଲା ବୋଲି ସେ କହିଛନ୍ତି।
ତେବେ ସାଧାରଣ ଲୋକଙ୍କ ମଧ୍ୟରେ ହେଉଥିବା ବ୍ୟକ୍ତି-ରୁ-ବ୍ୟକ୍ତି (ପି-ଟୁ-ପି) ୟୁପିଆଇ ଟ୍ରାନ୍ସଫର ସମ୍ପୂର୍ଣ୍ଣ ଶୁଳ୍କମୁକ୍ତ ରହିବାର ସମ୍ଭାବନା ରହିଛି। ଅଟୋମୋବାଇଲ ଓ ଆର୍ଥିକ ବିଶ୍ଳେଷକଙ୍କ ମତରେ, କେବଳ ଗୋଟିଏ ନିର୍ଦ୍ଦିଷ୍ଟ ମୂଲ୍ୟ ସୀମାରୁ ଅଧିକ ପରିମାଣର ବ୍ୟବସାୟୀ-ଗ୍ରାହକ (ମର୍ଚ୍ଚାଣ୍ଟ) କାରବାର ଉପରେ ହିଁ ନୋମିନାଲ ବା ସାମାନ୍ୟ ଏମ୍ଡିଆର୍ ଲାଗୁ କରାଯାଇପାରେ। ଲୋକ ସଭାରେ ବିଲ୍ଟି ପାରିତ ହୋଇସାରିଥିବା ବେଳେ ଏବେ ତାହା ରାଜ୍ୟ ସଭାରେ ଉପସ୍ଥାପନ ହେବ। ରାଜ୍ୟ ସଭାର ମଞ୍ଜୁରୀ ଏବଂ ରାଷ୍ଟ୍ରପତିଙ୍କ ସ୍ବାକ୍ଷର ପରେ ସରକାର ଗେଜେଟ୍ ବିଜ୍ଞପ୍ତି ଜାରି କରିବା ପରେ ହିଁ ନୂତନ ଶୁଳ୍କ ନିୟମ କାର୍ଯ୍ୟକାରୀ ହେବ।