ଭୁବନେଶ୍ୱର,୨୬।୮(ବ୍ୟୁରୋ): ରାଜଧାନୀରେ ଏକ ବାଇକ ଏବଂ ହାଇଓ୍ବା ଲୁଟେରା ଗ୍ୟାଙ୍ଗ୍ର ପର୍ଦ୍ଦାଫାଶ୍ କରିଛି ସ୍ପେଶାଲ ସ୍କ୍ବାଡ୍ ଟିମ୍। ଏହି ଗ୍ୟାଙ୍ଗ୍ର ୨ଜଣ ଲୁଟେରାଙ୍କ ସମେତ ୨ଜଣ ରିସିଭର୍ଙ୍କୁ ଗିରଫ କରାଯାଇଛି। ଗିରଫ ଲୁଟେରା ଦ୍ୱୟ ହେଲେ କଟକ ବାଙ୍କୀର ସୁଶାନ୍ତ ପାତ୍ର ଓରଫ ବଣ୍ଟି ଓ କଟକର ଶାହିଲ ଜାନି। ସେହିପରି ଗିରଫ ରିସିଭର ଦ୍ୱୟ ହେଲେ ବାଙ୍କୀର ବିଜୁ ପାତ୍ର ଏବଂ ଢେଙ୍କାନାଳ ଭୁବନର ପୃଥିରାଜ ପ୍ରଧାନ। ଏମାନଙ୍କ ବିରୋଧରେ ବାଲିପାଟଣା ଥାନାରେ ଏକ କେସ୍ (ନଂ. ୧୮୬/୨୦) ରୁଜୁ ହୋଇଛି। ସମସ୍ତ ଅଭିଯୁକ୍ତଙ୍କୁ ମଙ୍ଗଳବାର କୋର୍ଟ ଚାଲାଣ କରାଯାଇଛି। ଏଥିସହ ୧୧ ବାଇକ ଜବତ କରାଯାଇଛି। ସୁଶାନ୍ତଙ୍କ ନାମରେ ବାଲିପାଟଣା, ଜଙ୍କିଆ, ବାରଙ୍ଗ, ନୟାପଲ୍ଲୀ, ଚନ୍ଦ୍ରଶେଖରପୁର, ମଞ୍ଚେଶ୍ୱର, ଯାଜପୁର ରୋଡ଼, ପୁରୀ ସଦର ଏବଂ ଛତ୍ରପୁର ଥାନାରେ ଏକାଧିକ ମାମଲା ରହିଛି। ସେହିପରି ସାହିଲଙ୍କ ନାମରେ ବାଲିପାଟଣା, ଜଙ୍କିଆ, ବାରଙ୍ଗ, ଚନ୍ଦ୍ରଶେଖରପୁର ଓ କ୍ୟାପିଟାଲ ଥାନାରେ ଏକାଧିକ ମାମଲା ରହିଛି। ୪ ଦିନ ତଳେ ଖଣ୍ଡଗିରି ଅଞ୍ଚଳରୁ ହୋଇଥିବା ବସ୍ ଚୋରି ଘଟଣାରେ ଏହି ଗ୍ୟାଙ୍ଗ୍ ସମ୍ପୃକ୍ତ ଥିବା ପୋଲିସ କହିଛି।
ପୋଲିସ ସୂଚନା ଅନୁଯାୟୀ, ଲକ୍ଡାଉନ୍ ସମୟରେ ରାଜଧାନୀର ଏକାଧିକ ଥାନା ଅଞ୍ଚଳରେ ବାଇକ୍ ଲୁଟ ହୋଇଥିଲା। ଲୁଟେରାମାନେ କେବଳ ହାଇପ୍ରୋଫାଇଲ୍ ବାଇକ୍ ଲୁଟ କରୁଥିଲେ। ଲୁଟ ବାଇକକୁ ସେମାନେ ଏକ ନିଛାଟିଆ ଡିପୋରେ ଲୁଚାଇ ରଖୁଥିଲେ। ପରେ ଗ୍ରାହକ ଯୋଗାଡ଼ କରି ଶାଗ ମାଛ ଦରରେ ବିକ୍ରି କରୁଥିଲେ। କେବଳ ବାଇକ ନୁହେଁ ଏହି ଗ୍ୟାଙ୍ଗ୍ ହାଇଓ୍ବା, ବସ୍ ମଧ୍ୟ ଲୁଟ କରୁଥିଲେ। ଏହି ଗ୍ୟାଙ୍ଗ୍ର ମାଷ୍ଟରମାଇଣ୍ଡ ଥିଲେ ସାହିଲ ଜାନି। ସେ ଜଣେ ଡିପ୍ଲୋମା ଇଞ୍ଜିନିୟରିଂ ଛାତ୍ର। ସେ ଗାଡ଼ିଗୁଡିକର ଲକ୍ କିଭଳି ଭଙ୍ଗାଯାଇ ଷ୍ଟାର୍ଟ କରାଯିବ ସେ ଟେକ୍ନିକାଲ ଦିଗ ବତାଉଥିଲେ। ସହରରେ ଏଭଳି ଲୁଟ ଘଟଣା ବଢିବା ପରେ ଡିସିପି ଡା. ଉମାଶଙ୍କର ଦାଶ ଲୁଟେରାମାନଙ୍କୁ ଧରିବା ପାଇଁ ସ୍ପେଶାଲ ସ୍କ୍ବାଡ୍କୁ ଦାୟିତ୍ୱ ଦେଇଥିଲେ। ଏହି ଗ୍ୟାଙ୍ଗ୍ କାରରେ ବିଭିିନ୍ନ ସ୍ଥାନ ବୁଲନ୍ତି। ଯେଉଁଠି ଦାମୀ ବୁଲେଟ ଏବଂ ବାଇକ ଦେଖନ୍ତି ତାକୁ ଲୁଟ କରି ଏକ ହାଇଓ୍ବା ଗାଡ଼ିିରେ ଲଦି ନେଇଆସନ୍ତି। ନିକଟରେ ସେମାନେ ବାଲିଅନ୍ତା ଥାନା ଅଞ୍ଚଳରୁ ଏକ ହାଇଓ୍ବା ଗାଡ଼ି ଲୁଟି ନେଇ ଅନୁଗୋଳର ଏକ ଜଙ୍ଗଲରେ ରଖିଥିଲେ। ସ୍ପେଶାଲ ସ୍କ୍ବାଡ୍ ସମ୍ପୃକ୍ତ ସ୍ଥାନରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରିଥିଲା। ପରେ ହାଇଓ୍ବା ଲୁଟ କରୁଥିବା ଗ୍ୟାଙ୍ଗ୍ର ୨ଜଣଙ୍କୁ ଠାବ କରାଯାଇଥିଲା। ପୋଲିସ ସେମାନଙ୍କ ମୋବାଇଲ୍ ଫୋନ୍ ଲୋକେଶନ୍ରୁ ସେମାନେ କଟକରେ ଥିବା ଜାଣି ଚଢାଉ କରି ୨ ଲୁଟେରାଙ୍କୁ ଗିରଫ କରିଥିଲା। ଏଥିସହ ହାଇଓ୍ବାକୁ ମଧ୍ୟ ଜବତ କରିଥିଲା। ଦୁଇ ଲୁଟେରାଙ୍କ ସମେତ ଗାଡ଼ି କିଣିଥିବା ୨ ରିସିଭରଙ୍କୁ ଗିରଫ କରାଯାଇଛି।
