ଭଞ୍ଜନଗର, ୩୧।୫ (ବାବୁଲା ପ୍ରଧାନ): ଗଞ୍ଜାମ ଜିଲାର ଭଞ୍ଜନଗର ଅଞ୍ଚଳରେ ରବିବାର ସନ୍ଧ୍ୟାରେ କାଳବୈଶାଖୀ ପ୍ରଭାବରେ ବ୍ୟାପକ କ୍ଷୟକ୍ଷତି ଘଟିଛି। ଏହା ଫଳରେ ବିଭିନ୍ନ ବିଭାଗରେ କ୍ଷତି ସୃଷ୍ଟି ହୋଇଛି।
ଭଞ୍ଜନଗରର ବିଜୁ ପଟ୍ଟନାୟକ ଶିଶୁ ଉଦ୍ୟାନରେ ମଧ୍ୟ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଛି। ବଡ଼ ବଡ଼ ଗଛ ଉପୁଡ଼ି ପଡ଼ି ବିଭିନ୍ନ ଖେଳନା ଉପକରଣ ଉପରେ ପଡ଼ି ତାହାକୁ କ୍ଷତିଗ୍ରସ୍ତ କରିଛି।ଏହି କାରଣରୁ ମରାମତି କାମ ପାଇଁ ରବିବାର ପାର୍କ ବନ୍ଦ ରହିଛି। ସୋମବାର ମଧ୍ୟ ପାର୍କ ବନ୍ଦ ରହିବ। ପରିସ୍ଥିତି ସ୍ୱାଭାବିକ ହେଲେ ମଙ୍ଗଳବାର ପାର୍କ ଖୋଲିବା ସମ୍ଭାବନା ରହିଛି।
ପାର୍କ ଭିତରେ ଥିବା ୱାଟର ପାର୍କରେ ମଧ୍ୟ ଗଛ ଭାଙ୍ଗି ପଡ଼ିଥିବାରୁ ଏହା ଦୁଇ ଦିନ ପାଇଁ ବନ୍ଦ ରହିବ।ଏହା ସହିତ ବିଭିନ୍ନ ରାସ୍ତାରେ ଏବେ ମଧ୍ୟ ଛୋଟ ବଡ଼ ଗଛ ପଡ଼ି ରହିଛି। କେତେକ ସ୍ଥାନରେ ସ୍ଥାନୀୟ ଲୋକେ ଗଛ କାଟି ରାସ୍ତା ସଫା କରୁଛନ୍ତି, ଯେତେବେଳେ ଅନ୍ୟ କେତେକ ସ୍ଥାନରେ ଦମକଳ ବାହିନୀ ଦ୍ୱାରା ଗଛ କାଟି ସଫା କାମ କରାଯାଉଛି।
ବିଦ୍ୟୁତ୍ ସେବା ମଧ୍ୟ ଗୁରୁତର ଭାବରେ ପ୍ରଭାବିତ ହୋଇଛି। ଭଞ୍ଜନଗର ସହରରେ ବିଳମ୍ବିତ ରାତିରେ ବିଦ୍ୟୁତ୍ ସେବା ସ୍ୱାଭାବିକ ହୋଇଥିବା ବେଳେ ଗ୍ରାମାଞ୍ଚଳରେ ରବିବାର ସକାଳ ପର୍ଯ୍ୟନ୍ତ ମଧ୍ୟ ସେବା ସ୍ୱାଭାବିକ ହୋଇନାହିଁ। ଏହା ଫଳରେ ଲୋକମାନେ ବହୁତ ଅସୁବିଧାର ସମ୍ମୁଖୀନ ହୋଇଛନ୍ତି।କେତେକ ସ୍ଥାନରେ ଗଛ ପଡ଼ି ଛୋଟ ବଡ଼ ଘରମାନଙ୍କୁ ମଧ୍ୟ କ୍ଷତିଗ୍ରସ୍ତ କରିଛି।