ପାଟନା,୧୭।୫: ଦେଶରେ କରୋନା ସଙ୍କଟ ଜାରି ରହିଛି। ସୋମବାର ଦୈନିକ ସଂକ୍ରମଣ ସାମାନ୍ୟ ହ୍ରାସ ହୋଇଥିବା ବେଳେ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି। କରୋନାକୁ ରୋକିବା ପାଇଁ ବିଭିନ୍ନ ରାଜ୍ୟରେ ଲକ୍ଡାଉନ ଘୋଷଣା କରାଯାଇଛି। ରାଜ୍ୟରେ ଲକ୍ଡାଉନ ପ୍ରଭାବ ପକାଉଥିବାରୁ ଏହାର ଅବଧିକୁ ବଢ଼ାଇବାକୁ ରାଜ୍ୟସରକାର ଏବେ ନିଷ୍ପତ୍ତି ନେଉଛନ୍ତି। ଏହିକ୍ରମରେ ବିହାରରେ ମଧ୍ୟ ଲକ୍ଡାଉନର ଅବଧିକୁ ବୃଦ୍ଧି କରାଯାଇଛି। ରାଜ୍ୟରେ ମେ’ ୨୫ପର୍ଯ୍ୟନ୍ତ ଲକ୍ଡାଉନ ଘୋଷଣା କରିଛନ୍ତି ସରକାର। ଏହି ସମୟରେ କେବଳ ଜରୁରୀ ସେବାକୁ ଛାଡ଼ି ଦେଲେ ସ୍କୁଲ, କଲେଜ ଆଦି ଶିକ୍ଷାନୁଷ୍ଠାନ ବନ୍ଦ ରହିବ। ସହରାଞ୍ଚଳରେ ରାଶନ, ପନିପରିବା ଦୋକାନ ଆଦି ସକାଳ ୬ଟାରୁ ୧୦ଟା ପର୍ଯ୍ୟନ୍ତ ଓ ଗ୍ରାମାଞ୍ଚଳରେ ସକାଳ ୮ଟାରୁ ୧୨ଟା ପର୍ଯ୍ୟନ୍ତ ଖୋଲା ରହିବ। ସେହିପରି ବିବାହ ଉତ୍ସବରେ କଟକଣା ଲଗାଯାଇଛି। ମାତ୍ର ୨୦ଜଣ ବ୍ୟକ୍ତିଙ୍କ ଉପସ୍ଥିତିରେ ବିବାହ କାର୍ଯ୍ୟକ୍ରମ ଅନୁଷ୍ଠିତ ହେବ। ଏତଦ୍ ବ୍ୟତୀତ ରାସ୍ତାରେ ଅନାବଶ୍ୟକ ପଦଯାତ୍ରା ଉପରେ ରୋକୋ ଲଗାଯାଇଛି। ବିନା କାର୍ଯ୍ୟରେ ଯଦି କୌଣସି ବ୍ୟକ୍ତି ଗାଡ଼ିରେ ରାସ୍ତାରେ ବୁଲୁଥିବେ ତେବେ ତାଙ୍କଠାରୁ ୨ହଜାର ଟଙ୍କା ଜରିମାନା ଆଦାୟ କରାଯିବ। ଅନ୍ୟପଟେ ରାଜ୍ୟରେ ବ୍ୟାଙ୍କିଙ୍ଗ୍ ସେବାର ସମୟ ଅବଧିରେ ପରିବର୍ତ୍ତନ କରାଯାଇଛି। ଏଣିକି ମେ’ ୩୧ ପର୍ଯ୍ୟନ୍ତ ସକାଳ ୧୦ଟାରୁ ଦ୍ୱିପ୍ରହର ୨ଟା ଯାଏ ବ୍ୟାଙ୍କ ସେବା ଜାରି ରହିବ। ଏଥିସହ ବ୍ୟାଙ୍କରେ ୫୦ ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟ କରାଯିବ ବୋଲି କୋଭିଡ ଗାଇଡ୍ଲାଇନ୍ରେ ଉଲ୍ଲେଖ କରାଯାଇଛି।
