ପାଟନା,୨୩ ।୧୦: ବିହାର ବିଧାସଭା ପାଇଁ ଆସନ୍ତା ସପ୍ତାହରେ ପ୍ରଥମ ପର୍ଯ୍ୟାୟ ମତଦାନ କରାଯିବ । ଏଥିଲାଗି ଏବେ ପ୍ରଚାର କାର୍ଯ୍ୟ ଯୋର ଧରିଛି । ଶୁକ୍ରବାର ଭାରତୀୟ ଜନତା ପାର୍ଟି(ଭାଜପା)ର ଷ୍ଟାର ପ୍ରଚାରକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାସାରାମ ପହଞ୍ଚିଛନ୍ତି । ଏହା ତାଙ୍କର ପ୍ରଥମ ନିର୍ବାଚନ ରାଲି । ଏହାପରେ ସେ ଆଉ ୨ଟି ରାଲିରେ ସମ୍ବୋଧନ ଦେବାର କାର୍ଯ୍ୟକ୍ରମ ରହିଛି । ସାସାରାମରେ ପାଖାପାଖି ୪୧ ମିନିଟର ଭାଷଣରେ ସେ ରାମବିଳାସ ପାଶୱାନ ଓ ରଘୁବଂଶ ପ୍ରସାଦଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି । ଏହାପରେ ସେ ବିରୋଧି ଦଳ ନେତା ଲାଲୁ ପ୍ରସାଦ ଯାଦବ ଓ କଂଗ୍ରେସ ଉପରେ ଖୁବ୍ ବର୍ଷିଛନ୍ତି । ହେଲେ ଲୋକ ଜନଶକ୍ତି ପାର୍ଟି ବା ଚିରାଗ ପାଶୱାନଙ୍କ ସମ୍ପର୍କରେ ପଦଟିଏ ବି କହି ନ ଥିଲା ଲକ୍ଷ୍ୟ କରାଯାଇଛି । ଯଦିଓ ପ୍ରଥମେ ଚିରାଗ ପାଶୱାନଙ୍କ ଦଳ ଭାଜପା ସହ ମିଶି ନିର୍ବାଚନ ଲଢିବ ବୋଲି ସ୍ଥିର ହୋଇଥିଲା ହେଲେ ପରେ ଚିରାଗ ଭାଜପାଠାରୁ ଅଲଗା ହୋଇଯାଇଥିଲେ । ସମସ୍ତଙ୍କ ନଜର ଥିଲା ନିହାତି ଭାବେ ମୋଦି ଚିରାଗଙ୍କୁ ଟାର୍ଗେଟ କରିବେ । ହେଲେ ଫଳ ଓଲଟା ହେଲା । ଚିରଗଙ୍କ କଥା ଉଠାଇଲେ ନାହିଁ ମୋଦି । ଏଥିସହ ସେ ନୀତୀଶ କୁମାରଙ୍କ ନିଷ୍ପତ୍ତିକୁ ସ୍ୱାଗତ କରିଛନ୍ତି । ସେ କହିଛନ୍ତି ବିହାରରେ ଭାଜପା ଶାସନ କଲେ ଆଉ କେବେ ଏହି ରାଜ୍ୟ ରୋଗରେ ପଡ଼ିବ ନାହିଁ । ଏଥିପାଇଁ ଆପଣମାନଙ୍କ ଭୋଟର ଆବଶ୍ୟକତା ରହିଛି ବୋଲି ମୋଦି କହିଛନ୍ତି । ଏହାପରେ ସେ ଉପସ୍ଥିତ ଜନତାଙ୍କୁ ଧନ୍ୟବାଦ ଦେଇଥିଲେ ।
