ଢାକା,୬।୮: କ୍ରିକେଟ ଇତିହାସରେ ପ୍ରଥମ ଥର ପାଇଁ ଅଷ୍ଟ୍ରେଲିଆକୁ ଲଗାତାର ୩ ଥର ହରାଇ ଦେଇଛି ବାଂଲାଦେଶ। ବିଶ୍ୱ କ୍ରିକେଟରେ ଏହାକୁ ସବୁଠୁ ବଡ଼ ବିପର୍ଯ୍ୟୟ କହିଲେ ଭୁଲ ହେବ ନାହିଁ। ଏଥି ପୂର୍ବରୁ କୌଣସି ଫର୍ମାଟରେ ଅଷ୍ଟ୍ରେଲିଆକୁ ବାଂଲାଦେଶ କ୍ରମାଗତ ୩ଟି ମ୍ୟାଚ୍ରେ ହରାଇ ନ ଥିଲା। ଶୁକ୍ରବାର ଖେଳାଯାଇଥିବା ୩ୟ ଟି୨୦ ମ୍ୟାଚ୍କୁ ୧୦ ରନ୍ରେ ଘରୋଇ ବାଂଲାଦେଶ ଜିତି ନେଇଛି। ଏଥି ସହିତ ୫ ମ୍ୟାଚ୍ ବିଶିଷ୍ଟ ସିରିଜ୍କୁ ୩-୦ ବ୍ୟବଧାନରେ ଆଗୁଆ ଜିତି ନେଇଛି ମେହମ୍ମୁଦୁଲାଙ୍କ ନେତୃତ୍ୱାଧୀନ ଦଳ।
ପ୍ରଥମେ ବ୍ୟାଟିଂ କରିଥିବା ବାଂଲାଦେଶ ୨୦ ଓଭରରେ ୯ ଉଇକେଟ ହରାଇ ୧୨୭ ରନ୍ କରିଥିଲା। ଅଧିନାୟକ ମେହମ୍ମୁଦୁଲା ୫୨ ରନ୍ କରିଥିବା ବେଳେ ଅଷ୍ଟ୍ରେଲିଆ ପକ୍ଷରୁ ହ୍ୟାଟ୍ରିକ ଉଇକେଟ ନେଇଥିଲେ ନାଥନ ଏଲିସ। ଜୋସ ହାଜେଲଉଡ ଓ ଆଡମ ଝାମ୍ପା ୨ ଲେଖାଏ ଉଇକେଟ ହାତେଇଥିଲେ। ଜବାବରେ ୧୩ ଓଭର ସୁଦ୍ଧା ୧ ଉଇକେଟ ହରାଇ ୭୧ ରନ୍ କରି ସୁବିଧାଜନକ ସ୍ଥିତିରେ ଥିଲା ଅଷ୍ଟ୍ରେଲିଆ। କିନ୍ତୁ କ୍ରମାଗତ ବ୍ୟବଧାନରେ ବେନ ମ୍ୟାକଡରମଟ୍ଟ (୩୫) ଓ ମିଚେଲ ମାର୍ଶ (୫୧) ଆଉଟ୍ ହେବାରୁ ମ୍ୟାଚ୍ର ଭାଗ୍ୟ ବଦଳି ଯାଇଥିଲା। ଏପରି କି ଶେଷ ପର୍ଯ୍ୟନ୍ତ ଖେଳି ଭ୍ରମଣକାରୀ ଦଳ ୪ ଉଇକେଟ ହରାଇ ୧୧୭ ରନ୍ କରିବାକୁ ସକ୍ଷମ ହୋଇଥିଲା।
