ଭୁବନେଶ୍ୱର, ୨୭।୩(କ୍ରୀଡ଼ା ପ୍ରତିନିଧି): ରାମେଶ୍ୱର ସ୍ପୋର୍ଟିଂ କ୍ଲବ ଆନୁକୂଲ୍ୟରେ ୧୫ ବର୍ଷରୁ କମ୍ କମଳା ପରିଡ଼ା ସ୍ମାରକୀ (୫ମ ରାମେଶ୍ୱର କପ୍) କ୍ରିକେଟ ଟୁର୍ନାମେଣ୍ଟ ରବିବାର ଆରମ୍ଭ ହୋଇଛି। ଏହାର ପ୍ରଥମ ମ୍ୟାଚ୍ରେ ଅଧିନାୟକ ଶୁଭାଶିଷ ମଲିକଙ୍କ ବିସ୍ଫୋରକ ଶତକ ସହାୟତାରେ ଆୟୋଜକ ରାମେଶ୍ୱର ସ୍ପୋର୍ଟିଂ ୨୦୫ ରନ୍ର ବୃହତ୍ ବ୍ୟବଧାନରେ ସହିଦ ସ୍ପୋର୍ଟିଂକୁ ପରାସ୍ତ କରିଛି।
ସହିଦ ସ୍ପୋର୍ଟିଂ ଟସ୍ ଜିତି ରାମେଶ୍ୱରକୁ ବ୍ୟାଟିଂ ଆମନ୍ତ୍ରଣ କରିଥିଲା। ରାମେଶ୍ୱର ସ୍ପୋର୍ଟିଂ ନିର୍ଦ୍ଧାରିତ ୩୫ ଓଭରରେ ୩ ଉଇକେଟ ହରାଇ ୩୧୮ ରନ୍ କରିଥିଲା। ଦଳ ପକ୍ଷରୁ ଶିଭାଶିଷ ୧୦୬ଟି ବଲ୍ର ସମ୍ମୁଖୀନ ହୋଇ ୨୨ ଚୌକା ଓ ୭ ଛକା ସହାୟତାରେ ସର୍ବାଧିକ ୧୧୬ ରନ୍ କରିଥିଲେ। ତୀର୍ଥଙ୍କର ସାହୁ ୪୧ ଓ ସ୍ନେହାଶିଷ ଚୌଧାରୀ ୩୫ ରନ୍ କରିଥିଲେ। ବିପକ୍ଷ ଦଳର ଓମ୍ ପି. ନାୟକ ୩୬ ରନ୍ ଦେଇ ଗୋଟିଏ ଉଇକେଟ ନେଇଥିଲେ। ଜବାବରେ ସହିଦ ସ୍ପୋର୍ଟିଂ ୩୫ ଓଭରରେ ୫ ଉଇକେଟ ହରାଇ ମାତ୍ର ୧୧୩ ରନ୍ କରିବାକୁ ସକ୍ଷମ ହୋଇଥିଲା। ମହେଶ ପରିଡ଼ା ସର୍ବାଧିକ ୨୫ ରନ୍ କରିଥିଲେ।
ବିଜୟୀ ଦଳର ସୋହମ୍ ପଟ୍ଟନାୟକ ଓ ଜଗଦୀଶ ମହାପାତ୍ର ଗୋଟିଏ ଲେଖାଏ ଉଇକେଟ ନେଇଥିଲେ। ପ୍ଲେୟର ଅଫ୍ ଦି ମ୍ୟାଚ୍ ଶୁଭାଶିଷଙ୍କୁ ରଣ୍ଜୀ ଖେଳାଳି ରାଜେଶ ମହାନ୍ତି ଓ ପରେଶ ପଟେଲ ପୁରସ୍କୃତ କରିଥିଲେ। ବିଧାୟକ ସୁରେଶ କୁମାର ରାଉତରାୟ, କର୍ପୋରେଟର ଚନ୍ଦ୍ରଶେଖର ମଲିଆ, ଭୁବନେଶ୍ୱର ଆଥ୍ଲେଟିକ୍ ଆସୋସିଏଶନ ସମ୍ପାଦକ ସୌର୍ଯ୍ୟରଞ୍ଜନ ପରିଜା, ଉପସଭାପତି ରାଧାନାଥ ମହାପାତ୍ର ପ୍ରମୁଖ ପ୍ରତିଯୋଗିତାକୁ ଉଦ୍ଘାଟନ କରିଥିଲେ।
