ଭବାନୀପାଟଣା,୨୦।୯(ସ୍ବ.ପ୍ର.): ଭବାନୀପାଟଣାସ୍ଥିତ ସରକାରୀ ଶିଳ୍ପ ତାଲିମ କେନ୍ଦ୍ରରେ ଟାଟା ଇଲେକ୍ଟ୍ରୋନିକ୍ସ ପ୍ରାଇଭେଟ ଲିମିଟେଡ ପକ୍ଷରୁ ତାମିଲନାଡୁର ହୋସୁରଠାରେ ଥିବା ପ୍ଲାଣ୍ଟ ପାଇଁ ଏକ ବୃହୃତ ନିଯୁକ୍ତି ମେଳା ଆସନ୍ତା ୨୪ ତାରିଖରେ ଅନୁଷ୍ଠିତ ହେବ। ଏଥିପାଇଁ ସୋମବାର କଳାହାଣ୍ଡି ଜିଲା ପ୍ରଶାସନ ପକ୍ଷରୁ ସ୍ଥାନୀୟ ଓସୱାନ କେନ୍ଦ୍ରରେ ଭର୍ଚୁଆଲ ମାଧ୍ୟମରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଜିଲାପାଳ ପି. ଅନ୍ବେଷା ରେଡ୍ଡୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଜିଲାସ୍ତରୀୟ ଅଧିକାରଙ୍କ ସମେତ ଜିଲାର ସମସ୍ତ ବିଡିଓମାନେ ସାମିଲ ହୋଇଥିଲେ। ଏଥିରେ ୩୦।୯।୨୦୨୨ ସୁଦ୍ଧା ୧୮ରୁ ୨୦ ବର୍ଷ ବୟସ ପ୍ରାପ୍ତ ହୋଇଥିବା ଅନୁସୂଚିତଜାତି ଓ ଜନଜାତି ବର୍ଗର କେବଳ ଛାତ୍ରୀମାନେ ଯେଉଁମାନେ କି ୨୦୨୧ କିମ୍ବା ୨୦୨୨ରେ ଯୁକ୍ତ ୨ (କଳା, ବାଣିଜ୍ୟ, ବିଜ୍ଞାନ ବିଭାଗ) ପରୀକ୍ଷାରେ ଉର୍ତ୍ତିଣ୍ଣ ହୋଇଥିବେ, ସେମାନେ କମ୍ପାନୀ ପକ୍ଷରୁ ଆୟୋଜିତ ଏହି ପରୀକ୍ଷାରେ ଭାଗ ନେଇପାରିବେ। ପ୍ରାଥିନୀଙ୍କ ଓଜନ ୪୩ରୁ ୬୫ କେଜି ଏବଂ ଉଚ୍ଚତା ୧୫୦ ସିଏମ ହୋଇଥିବେ। ପରୀକ୍ଷାରେ ଉତ୍ତୀର୍ଣ୍ଣ ହେଲେ ହୋସୁର୍ଠାରେ ୧୨ ଦିନିଆ ତାଲିମ ନେଇ ଡାଟା ଏଣ୍ଟ୍ରି ଅପରେଟର ରୂପେ ମାସିକ ୧୫୦୦୦ ଟଙ୍କା ଦରମାରେ ନିଯୁକ୍ତି ପାଇବେ। ସେମାନଙ୍କ ଖାଇବା, ରହିବା ଓ ସମସ୍ତ ସୁବିଧା କମ୍ପାନୀ ପକ୍ଷରୁ କରାଯାଉଛି। ବିଡିଓମାନଙ୍କୁ ନିଜ ବ୍ଲକରେ ପଢୁଥିବା ଇଛୁକ ଛାତ୍ରୀମାନଙ୍କୁ ବସରେ ଆଣି ୨୪।୯।୨୦୨୨ ତାରିଖ ପରୀକ୍ଷା କେନ୍ଦ୍ରରେ ଉପସ୍ଥିତ କରିବା ପାଇଁ ଜିଲାପାଳ ନିର୍ଦ୍ଦେଶ ଦେଇଥିଲେ। ଭବାନୀପାଟଣା ଆଇଟିଆଇଠାରେ ଏଥିପାଇଁ ସମସ୍ତ ବ୍ୟବସ୍ଥା କରାଯାଉଛି। ପ୍ରକାଶ ଥାଉକି, ରାଜ୍ୟର ୪ଟି ଜିଲା ସୁନ୍ଦରଗଡ଼, କୋରାପୁଟ, ମୟୂରଭଞ୍ଜ ଓ କଳାହାଣ୍ଡିରେ ଟାଟା ଇଲେକ୍ଟ୍ରୋନିକ୍ସ ପାର୍ଥି ଚୟନ କରିବ। ଏଥିରୁ କଳାହାଣ୍ଡି ଜିଲାରୁ ୨୦୦ଜଣ ପ୍ରାର୍ଥିନୀଙ୍କୁ ଚୟନ କରିବ। ପ୍ରସ୍ତୁତି ବୈଠକରେ ଜିଲା ଉନ୍ନୟନ ଅଧିକାରୀ ଜିଲା ପରିଷଦ ସୁଶାନ୍ତ କୁମାର ପଟେଲ, ଧର୍ମଗଡ଼ ଉପଜିଲାପାଳ ସଚିନ ପାୱାର, ଡିଏସଡବ୍ଲୁଓ ଜ୍ୟୋସ୍ନାରାଣୀ ପାତ୍ର, ପିଏଆଇଟିଡିଏ ବିରଞ୍ଚତ୍ନାରାୟଣ ଦରୱାନ, ଡିଡବ୍ଲୁଓ ଅରବିନ୍ଦ ରାୟ, ଡିଆଇପିଆରଓ ମନୋଜ କୁମାର ବେହେରା, ଆରଟିଓ ଶ୍ରୀନିବାସ ର୍ସିକା, ମ୍ୟୁନିସିପାଲଟି ଇଓ ବଳୟ ଦେହୁରୀ, ଏପିଡି ବିମ୍ବାଧର ସାହୁ, ଜିଲା କର୍ମ ନିୟୋଜନ ଅଧିକାରୀ ଅଜିତ କୁମାର ଉତ୍ତରାୟ ଉପସ୍ଥିତ ଥିଲେ।
