ଓ୍ବାଶିଂଟନ୍,୬।୧୧: ୪ ବର୍ଷ ପରେ ଡୋନାଲ୍ଡ ଟ୍ରମ୍ପ ହ୍ବାଇଟ ହାଉସକୁ ଫେରିବାକୁ ଯାଉଛନ୍ତି। ସେ ୨୦୨୪ ଆମେରିକାର ରାଷ୍ଟ୍ରପତି ନିର୍ବାଚନରେ ସଂଖ୍ୟାଗରିଷ୍ଠତା ହାସଲ କରିଛନ୍ତି। ସରକାରୀ ଘୋଷଣାକୁ ଅପେକ୍ଷା କରାଯାଇଛି କିନ୍ତୁ ଟ୍ରମ୍ପ ଆମେରିକାର ଜନସାଧାରଣଙ୍କୁ ବିଜୟ ଦାବି କରି ସମ୍ବୋଧିତ କରିଛନ୍ତି। ଜାନୁଆରୀ ୨୦୨୫ରେ ସେ ଦ୍ୱିତୀୟ ଥର ପାଇଁ ଆମେରିକାର ରାଷ୍ଟ୍ରପତି ଭାବରେ ଶପଥ ଗ୍ରହଣ କରିବେ। ନିର୍ବାଚନର ଗୋଟିଏ ଦିନ ପୂର୍ବରୁ ଭୋଟରଙ୍କୁ ତାଙ୍କର ଶେଷ ସମ୍ବୋଧନରେ ଟ୍ରମ୍ପ ରାଷ୍ଟ୍ରପତି ହେବା ପରେ ତାଙ୍କର ପ୍ରଥମ ପଦକ୍ଷେପ କ’ଣ ହେବ ବୋଲି ସୂଚାଇ ଦେଇଛନ୍ତି।
ଟ୍ରମ୍ପ କହିଛନ୍ତି,ତାଙ୍କ ପ୍ରଶାସନରେ ପବ୍ଲିକ୍ ହେଲ୍ଥ ସହ ଜଡିତ ୨ ମାମଲାରେ ରବର୍ଟ ଏଫ କେନେଡି ଜୁନିୟର ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ। ସ୍ବାଧୀନ ପ୍ରାର୍ଥୀ ଭାବରେ କେନେଡି ଜୁନିୟର ନିର୍ବାଚନ ଦୌଡ଼ର ଏକ ଅଂଶ ହୋଇଥିଲେ ମଧ୍ୟ ପରେ ତାଙ୍କ ନାମ ପ୍ରତ୍ୟାହାର କରି ଟ୍ରମ୍ପଙ୍କୁ ସମର୍ଥନ କରିଥିଲେ। କେନେଡି ଜୁନିୟର୍ କହିଛନ୍ତି, ଯଦି ଟ୍ରମ୍ପ ୨୦୨୪ ନିର୍ବାଚନରେ ଜିତନ୍ତି, ତେବେ ତାଙ୍କର ପ୍ରଥମ ପଦକ୍ଷେପ ପାନୀୟ ଜଳରୁ ଫ୍ଲୋରାଇଡ ହଟାଇବା ହେବ।
ଏନେଇ ଟ୍ରମ୍ପଙ୍କୁ ପଚାରିବାରୁ ସେ କହିଥିଲେ, ସେ ଏ ବିଷୟରେ କେନେଡି ଜୁନିୟରଙ୍କ ସହିତ କଥାବାର୍ତ୍ତା କରିନାହାଁନ୍ତି। କିନ୍ତୁ ଏହା କରିବା ପ୍ରସ୍ତାବ ମଧ୍ୟ ସେମାନଙ୍କ ପାଇଁ ଭଲ ମନେହୁଏ। କେନେଡି କିଛି ଟିକା ଉପରେ ପ୍ରତିବନ୍ଧକ ଲଗାଇବାକୁ ମଧ୍ୟ ପରାମର୍ଶ ଦେଇଛନ୍ତି। ଏହା ଉପରେ ଟ୍ରମ୍ପ ତାଙ୍କୁ ପ୍ରଶଂସା କରିବା ସହ କହିଛନ୍ତି ଯେ ସେ ଏ ବିଷୟରେ କେନେଡିଙ୍କ ସହ କଥା ହେବେ।
ଫ୍ଲୋରାଇଡ ପୃଥିବୀରେ ଏକ ପ୍ରାକୃତିକ ଭାବରେ ଘଟୁଥିବା ଖଣିଜ ଅଟେ। କେନେଡି ଫ୍ଲୋରାଇଡକୁ ଅନେକ ରୋଗ ସହିତ ଯୋଡିଛନ୍ତି। ତଥାପି, ଆମେରିକୀୟ ଡେଣ୍ଟାଲ ଆସୋସିଏସନ ସମେତ ଅନେକ ଡାକ୍ତରୀ ଗୋଷ୍ଠୀ ଫ୍ଲୋରାଇଟେଡ ଜଳକୁ ସମର୍ଥନ କରନ୍ତି। ସେମାନେ କହିଛନ୍ତି ଯେ, ଏହା ଦାନ୍ତ କ୍ଷୟକୁ ରୋକିଥାଏ। ବିଶ୍ୱ ସୱାସ୍ଥ୍ୟ ସଂଗଠନ (ଡବ୍ଲୁଏଚ୍ଓ) ଏବଂ ଆମେରିକାର ରୋଗ ନିୟନ୍ତ୍ରଣ (ସିଡିସି) ମଧ୍ୟ ଫ୍ଲୋରାଇଡ ସୁରକ୍ଷିତ ବୋଲି ବିଚାର କରନ୍ତି।
