ନୂଆଦିଲ୍ଲୀ,୬ା୮: ଦେଶରେ କମ୍ପ୍ରେସଡ୍ ବାୟୋଗ୍ୟାସ୍ (ସିବିଜି) ଉତ୍ପାଦନକୁ ତ୍ୱରାନ୍ବିତ କରିବା ଏବଂ ଜୀବାଶ୍ମ ଇନ୍ଧନ ଆମଦାନୀ ଉପରୁ ନିର୍ଭରଶୀଳତା ହ୍ରାସ କରିବା ପାଇଁ କେନ୍ଦ୍ର କ୍ୟାବିନେଟ ଗୁରୁବାର ୨୩,୭୩୧ କୋଟି ଟଙ୍କାର ଏକ ବୃହତ୍ ଜାତୀୟ ଯୋଜନାକୁ ମଞ୍ଜୁରୀ ଦେଇଛିି। କୃଷି ଓ ପୌରାଞ୍ଚଳର ଜୈବିକ ବର୍ଜ୍ୟବସ୍ତୁକୁ ବ୍ୟବହାରକରି ସ୍ବଚ୍ଛ ଇନ୍ଧନ ପ୍ରସ୍ତୁତ କରିବା ଏହି ଯୋଜନାର ମୁଖ୍ୟ ଲକ୍ଷ୍ୟ। ‘ଗୋବର୍ଦ୍ଧନ’ ଯୋଜନା ଅଧୀନରେ ୨୦୨୭ ରୁ ୨୦୩୬ ଆର୍ଥିକ ବର୍ଷ ମଧ୍ୟରେ ଏହି କାର୍ଯ୍ୟକ୍ରମ କାର୍ଯ୍ୟକାରୀ ହେବ। ଏହାଦ୍ୱାରା ଦେଶୀୟ କମ୍ପ୍ରେସଡ୍ ବାୟୋଗ୍ୟାସ୍ ଉତ୍ପାଦନକୁ ପ୍ରାୟ ୧୦ ଗୁଣ ପର୍ଯ୍ୟନ୍ତ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି।
କୃଷି ବର୍ଜ୍ୟବସ୍ତୁ, ଗୋବର, ଚିନିକଳରୁ ନିର୍ଗତ ପ୍ରେସ୍ମଡ୍, ପୌରାଞ୍ଚଳ ଜୈବିକ ବର୍ଜ୍ୟବସ୍ତୁ ଏବଂ ଅନ୍ୟାନ୍ୟ ବାୟୋମାସ୍କୁ ବ୍ୟବହାର କରି ସିବିଜି ଉତ୍ପାଦନ କରାଯିବ। ଏହି ବାୟୋଗ୍ୟାସ୍କୁ ସାଇକେଲ ଓ ଗାଡ଼ିଗୁଡ଼ିକରେ ବ୍ୟବହୃତ ସିଏନ୍ଜି ସହ ମିଶ୍ରଣ କରାଯାଇପାରିବ। ସିଟି ଗ୍ୟାସ୍ ଡିଷ୍ଟ୍ରିବ୍ୟୁଶନ (ସିଜିଡି) କମ୍ପାନୀଗୁଡ଼ିକ ପାଇଁ ସିଏନ୍ଜି ଏବଂ ଘରୋଇ ପାଇପ୍ ଗ୍ୟାସ୍ (ପିଏନ୍ଜି)ରେ ସିବିଜି ମିଶ୍ରଣ କରିବା ବାଧ୍ୟତାମୂଳକ କରାଯାଇଛି। ୨୦୨୭ ଆର୍ଥିକ ବର୍ଷରେ ୩%, ୨୦୨୮ରେ ୪% ଏବଂ ୨୦୨୯ରୁ ୫% ମିଶ୍ରଣ ଲକ୍ଷ୍ୟ ରଖାଯାଇଛି। ଉତ୍ପାଦକମାନଙ୍କୁ ସ୍ଥାୟୀ ରୋଜଗାରର ସୁରକ୍ଷା ଦେବା ଏବଂ ଗ୍ରାହକଙ୍କ ପାଇଁ ସୁଲଭ ମୂଲ୍ୟ ରଖିବା ପାଇଁ ସରକାର ପ୍ରତି ଏମ୍ଏମ୍ବିଟିୟୁ (ମିଲିୟନ ବ୍ରିଟିଶ ଥର୍ମାଲ ୟୁନିଟସ୍) ସିବିଜିର ମୂଲ୍ୟ ୨,୧୧୦ ଟଙ୍କା ନିର୍ଦ୍ଧାରଣ କରିଛନ୍ତି। ନୂତନ ଗ୍ରୀନ୍ଫିଲ୍ଡ ପ୍ରକଳ୍ପଗୁଡ଼ିକୁ ଦୈନିକ ୧ ଟନ ଉତ୍ପାଦନ କ୍ଷମତା ପାଇଁ ସର୍ବାଧିକ ୨ କୋଟି ଟଙ୍କା ପର୍ଯ୍ୟନ୍ତ ପୁଞ୍ଜି ସହାୟତା ଯୋଗାଇ ଦିଆଯିବ। ପୁରୁଣା ପ୍ଲାଣ୍ଟଗୁଡ଼ିକର ସମ୍ପ୍ରସାରଣ ପାଇଁ ମଧ୍ୟ ସହାୟତା ମିଳିବ। ସିବିଜି ପ୍ଲାଣ୍ଟଗୁଡ଼ିକୁ ମୁଖ୍ୟ ପାଇପ୍ଲାଇନ ଏବଂ ସିଟି ଗ୍ୟାସ୍ ନେଟ୍ୱର୍କ ସହ ଯୋଡ଼ିବା ପାଇଁ ପାଣ୍ଠି ଯୋଗାଇ ଦିଆଯିବ। ଏହାସହ ଏମ୍ଏସ୍ଏମ୍ଇ ସଂସ୍ଥାଗୁଡ଼ିକ ପାଇଁ କ୍ରେଡିଟ୍ ଗ୍ୟାରେଣ୍ଟି ବ୍ୟବସ୍ଥା ଏବଂ ଜିଲା ସ୍ତରୀୟ ପ୍ରକଳ୍ପ ପାଇଁ ଏକ ସ୍ବତନ୍ତ୍ର ଚ୍ୟାଲେଞ୍ଜ ଫଣ୍ଡ ସୃଷ୍ଟି କରାଯାଇଛି।
