ଇସଲାମାବାଦ,୨୦।୩: ଭାରତ ବିରୋଧରେ ସେନା ପ୍ରସ୍ତୁତ କରିବାରେ ବ୍ୟସ୍ତ ଥିବା ଚାଇନା ଏବଂ ପାକିସ୍ତାନକୁ ଏକ ବଡ଼ ଝଟକା ଲାଗିଛି। ଶେହବାଜ ସରକାର ଚାଇନାଠାରୁ କିଣିଥିବା ପଞ୍ଚମ ପିଢ଼ିର ଗୁପ୍ତ ଯୁଦ୍ଧ ବିମାନ J-35ର ତଥ୍ୟ ଲିକ ହୋଇଯାଇଛି। ଚାଇନାର ଗୋଇନ୍ଦା ବିଭାଗ, ରାଜ୍ୟ ସୁରକ୍ଷା ମନ୍ତ୍ରଣାଳୟ ଅର୍ଥାତ୍ ଏମ୍ଏସ୍ଏସ୍ ଏହାକୁ ନିଶ୍ଚିତ କରିଛି।
ଏଥିପାଇଁ, ଚାଇନା ଏକ ବିଦେଶୀ ଗୋଇନ୍ଦା ସଂସ୍ଥାକୁ ତଥ୍ୟ ଲିକ କରିବା ଅଭିଯୋଗରେ ପୂର୍ବତନ ପ୍ରତିରକ୍ଷା ଇଞ୍ଜିନିୟର ଲିଉଙ୍କୁ ଫାଶୀଦଣ୍ଡ ଦେଇଛି। ପାକିସ୍ତାନ ହେଉଛି ବିଶ୍ୱର ପ୍ରଥମ ଦେଶ ଯିଏ J-35 ଷ୍ଟିଲଥ ଲଢ଼ୁଆ ବିମାନ ପାଇଁ ଚାଇନା ସହିତ ଚୁକ୍ତି ସ୍ବାକ୍ଷର କରିଛି। କେବଳ ଏତିକି ନୁହେଁ, ପାକିସ୍ତାନ ତା’ର ପାଇଲଟମାନଙ୍କୁ ତାଲିମ ପାଇଁ ବେଜିଂ ପଠାଇଛି। ଯୁଦ୍ଧ ବିମାନ J-35 ର ତଥ୍ୟ ଲିକ ହେବା ଖବର ପ୍ରକାଶ ପାଇବା ପରେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ ଚାପଗ୍ରସ୍ତ ହୋଇଯାଇଛନ୍ତି। ଏହି ଯୁଦ୍ଧ ବିମାନ ଏପର୍ଯ୍ୟନ୍ତ ପାକିସ୍ତାନୀ ସେନାର ନୌବାହିନୀରେ ସାମିଲ ହୋଇନାହିଁ, କିନ୍ତୁ ଏହାର ପ୍ରଯୁକ୍ତିବିଦ୍ୟା ପୂର୍ବରୁ ପ୍ରକାଶ ପାଇଛି।
ଚାଇନା ଗୋଇନ୍ଦା ସଂସ୍ଥା ଏହାର ବିବୃତ୍ତିରେ କହିଛି ଯେ, ଲିଉଙ୍କ କାର୍ଯ୍ୟକଳାପ ଦେଶର ସୁରକ୍ଷା ପାଇଁ ଏକ ବଡ଼ ବିପଦ ସୃଷ୍ଟି କରିଛି। ଏହି ତଥ୍ୟ ଲିକ କରିଥିବା ଇଞ୍ଜିନିୟର ଚାଇନାର ଏକ ଗବେଷଣା ପ୍ରତିଷ୍ଠାନରେ ସହକାରୀ ଇଞ୍ଜିନିୟର ଥିଲେ। ଏହି ପ୍ରତିଷ୍ଠାନ ପ୍ରତିରକ୍ଷା ପ୍ରଯୁକ୍ତିବିଦ୍ୟା ଉପରେ କାର୍ଯ୍ୟ କରେ। ଏହା ମଧ୍ୟ କୁହାଯାଏ ଯେ, ଇଞ୍ଜିନିୟର ଜଣକ ପଦୋନ୍ନତି ନ ପାଇବାରୁ ରାଗି ଯାଇଥିଲେ, ଯାହା ପରେ ସେ ଚାକିରି ଛାଡି ଦେଇଥିଲେ। ପରେ ସେ ଏକ ନିବେଶ ଫାର୍ମରେ ଯୋଗ ଦେଇଥିଲେ। ତାଙ୍କର ଆର୍ଥିକ ଅବସ୍ଥା ଖରାପ ହୋଇଯିବାରୁ ସେ ଚାଇନାର ୫ମ ପିଢ଼ିର ଯୁଦ୍ଧ ବିମାନର ଗୋପନୀୟ କାଗଜପତ୍ର ଲିକ କରିଦେଲେ। ବଦଳରେ ସେ ଅନ୍ୟ ଦେଶରୁ ମଧ୍ୟ ପ୍ରଚୁର ଟଙ୍କା ପାଇଲେ। ଗୋଇନ୍ଦା ସଂସ୍ଥା ଏହା ଜାଣିପାରି ଅଭିଯୁକ୍ତ ଇଞ୍ଜିନିୟରଙ୍କୁ ଗିରଫ କରିଥିଲା। ପରେ ତାଙ୍କୁ ଦେଶଦ୍ରୋହ ଅଭିଯୋଗରେ ଫାଶୀ ଦିଆଯାଇଥିଲା।
J-35 ହେଉଛି ଚାଇନାର ସବୁଠାରୁ ଅପଡେଟେଡ୍ ଗୁପ୍ତ ଯୁଦ୍ଧ ବିମାନ। ଏହାକୁ ଶତ୍ରୁ ଉପରେ ଏକ ଶକ୍ତିଶାଳୀ ଆକ୍ରମଣ କରିବା ପାଇଁ ଡିଜାଇନ କରାଯାଇଥିଲା।
