ନୂଆଦିଲ୍ଲୀ,୧୨ା୩: ଭାରତକୁ ବିଶ୍ଵର ସ୍ମାର୍ଟଫୋନ୍ ହବ୍ କରିବା ଦିଗରେ କେନ୍ଦ୍ର ସରକାର ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି। ଆପଲ୍ ଏବଂ ସାମସଙ୍ଗ ଭଳି ବୃହତ ସ୍ମାର୍ଟଫୋନ୍ ନିର୍ମାତା କମ୍ପାନୀଗୁଡ଼ିକ ପାଇଁ ଏକ ନୂଆ ସବସିଡି ଯୋଜନା ପ୍ରସ୍ତୁତ ହେଉଛି। ଏହି ନୂଆ ନୀତି ଅଧୀନରେ ଭାରତରୁ ବିଦେଶକୁ ଫୋନ୍ ରପ୍ତାନି କରୁଥିବା ଏବଂ ସ୍ଥାନୀୟ ଯନ୍ତ୍ରାଂଶ ବ୍ୟବହାର କରୁଥିବା କମ୍ପାନୀଗୁଡ଼ିକୁ ବିଶେଷ ପୁରସ୍କାର ମିଳିବ।
ବର୍ତ୍ତମାନର ପ୍ରଡକ୍ସନ-ଲିଙ୍କଡ୍ ଇନସେଣ୍ଟିଭ୍ ବା PLI ସ୍କିମ୍ ଚଳିତ ବର୍ଷ ମାର୍ଚ୍ଚ ୩୧ରେ ଶେଷ ହେବାକୁ ଯାଉଛି। ଏହା ବଦଳରେ ସରକାର ଏକ ନୂଆ ମଡେଲ୍ ଉପରେ କାମ କରୁଛନ୍ତି। ପୂର୍ବ ଯୋଜନାର ଲକ୍ଷ୍ୟ କେବଳ ଭାରତରେ ଫୋନ୍ ଆସେମ୍ବଲି କରିବା ଥିବାବେଳେ, ନୂଆ ଯୋଜନାର ଲକ୍ଷ୍ୟ ହେଉଛି ‘ଲୋକାଲ୍ ଭାଲ୍ୟୁ ଆଡିସନ୍’। ଅର୍ଥାତ୍, ସ୍ମାର୍ଟଫୋନରେ ବ୍ୟବହୃତ ହେଉଥିବା କ୍ୟାମେରା ମଡ୍ୟୁଲ୍, ଡିସପ୍ଲେ ଏବଂ ଅନ୍ୟାନ୍ୟ ପାର୍ଟସ୍ ଯଦି ଭାରତରେ ପ୍ରସ୍ତୁତ ହୁଏ, ତେବେ କମ୍ପାନୀଗୁଡ଼ିକୁ ଅଧିକ ସବସିଡି ମିଳିବ।
ଏହି ନୂଆ ଯୋଜନା ଅନୁଯାୟୀ ଭାରତରୁ ଯେତେ ଅଧିକ ଫୋନ୍ ବିଦେଶକୁ ରପ୍ତାନି ହେବ, ସେତିକି ଅଧିକ ଆର୍ଥିକ ପ୍ରୋତ୍ସାହନ ମିଳିବ। ରିପୋର୍ଟ ଅନୁସାରେ, ଚଳିତ ବର୍ଷ ଶେଷ ସୁଦ୍ଧା ଆମେରିକା ପଠାଯାଉଥିବା ଅଧିକାଂଶ ଆଇଫୋନ୍ ଭାରତରେ ହିଁ ତିଆରି ହେବ। ସେହିଭଳି ଓପୋ, ଭିଭୋ ଏବଂ ଶାଓମି ଭଳି କମ୍ପାନୀଗୁଡ଼ିକୁ ମଧ୍ୟ ଭାରତରୁ ରପ୍ତାନି ବଢ଼ାଇବା ପାଇଁ ସରକାର ଏହି ଯୋଜନା ମାଧ୍ୟମରେ ଉତ୍ସାହିତ କରୁଛନ୍ତି।
ଯଦିଓ ଭାରତରେ ଫୋନ୍ ତିଆରି ବଢ଼ିଛି, କିନ୍ତୁ ଅନେକ ଦାମୀ ଯନ୍ତ୍ରାଂଶ ଏବେ ମଧ୍ୟ ଚାଇନା, ଦକ୍ଷିଣ କୋରିଆ ଏବଂ ତାଇୱାନରୁ ଆମଦାନୀ କରାଯାଉଛି। ସରକାରଙ୍କ ଏହି ନୂଆ ନୀତି ଦ୍ୱାରା ଚାଇନା ଉପରେ ନିର୍ଭରଶୀଳତା କମିବ ଏବଂ ଭାରତ ବିଶ୍ୱ ଇଲେକ୍ଟ୍ରୋନିକ୍ସ ଯୋଗାଣ ଶୃଙ୍ଖଳାରେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ଗ୍ରହଣ କରିବ।
