ନୂଆଦିଲ୍ଲୀ,୧୨ା୩ (ପି.ଟି.): ଆରାବଳୀ ପର୍ବତମାଳାର ପରିବେଶ କ୍ଷୟକ୍ଷତିକୁ ନେଇ ଏକ ଚିନ୍ତାଜନକ ତଥ୍ୟ ବୁଧବାର ସାମ୍ନାକୁ ଆସିଛି। ୨୦୧୭ରୁ ୨୦୨୪ ମଧ୍ୟରେ ଆରାବଳୀ ଅଞ୍ଚଳରେ ବାର୍ଷିକ ହାରାହାରି ମୃତ୍ତିକା କ୍ଷୟ ୧୩.୮% ବୃଦ୍ଧି ପାଇଛି। ଏହା ବର୍ଷକୁ ୧.୫୯ ଟନ୍ ହେକ୍ଟରରୁ ବଢ଼ି ୧.୮୧ ଟନ୍ ହେକ୍ଟରରେ ପହଞ୍ଚିଛି। ଏହି ଅବଧି ମଧ୍ୟରେ ଆରାବଳୀରେ ସହରୀକରଣ ଏବଂ ନିର୍ମାଣ କାର୍ଯ୍ୟ ୫୩% ବୃଦ୍ଧି ପାଇଛି। ଚାଷଜମି ଏବଂ ଘାସପଡ଼ିଆକୁ ନଷ୍ଟକରି ଏହି ନିର୍ମାଣ କରାଯାଇଛି। ଓ.ପି. ଜିନ୍ଦଲ ଗ୍ଲୋବାଲ ୟୁନିଭର୍ସିଟି ଏବଂ ଆଇଆଇଟି ଖଡ଼ଗପୁରର ଗବେଷକମାନଙ୍କ ପକ୍ଷରୁ କରାଯାଇଥିବା ମିଳିତ ଅଧ୍ୟୟନରୁ ଏହି ତଥ୍ୟ ଜଣାପଡ଼ିଛି।
ଅଧ୍ୟୟନ ରିପୋର୍ଟ ଅନୁଯାୟୀ, ଆଶ୍ଚର୍ଯ୍ୟଜନକ ଭାବେ ବନୀକରଣ ବୃଦ୍ଧି ପାଇଥିଲେ ମଧ୍ୟ ମୃତ୍ତିକା କ୍ଷୟ କମିନାହିଁ। ଗବେଷକମାନେ କହିଛନ୍ତି, କେବଳ ଗଛ ଲଗାଇବା ଦ୍ୱାରା ବ୍ୟାପକ ସ୍ତରରେ ହେଉଥିବା ଜମିର ରୂପାନ୍ତରଣକୁ ରୋକାଯାଇପାରିବ ନାହିଁ। ଆରାବଳୀ ଭାରତର ପୁରାତନ ଏବଂ ଖଣିଜ ସମ୍ପଦରେ ଭରପୂର ପର୍ବତମାଳା ହୋଇଥିବାରୁ ଏଠାରେ ବହୁଳ ଭାବେ ଖଣି ଖନନ ଚାଲିଛି। ମାନବୀୟ କାର୍ଯ୍ୟକଳାପ ସହିତ ପରିବର୍ତ୍ତିତ ପାଣିପାଗ ମୃତ୍ତିକା କ୍ଷୟକୁ ଅଧିକ ତ୍ୱରାନ୍ବିତ କରିଛି। ପ୍ରାକୃତିକ ପରିବେଶକୁ କଂକ୍ରିଟ ଜଙ୍ଗଲରେ ପରିଣତ କରିବା ଫଳରେ ମାଟିର ପ୍ରାକୃତିକ ପ୍ରତିରକ୍ଷା ବ୍ୟବସ୍ଥା ନଷ୍ଟ ହୋଇଯାଇଛି। ସ୍ଥାନୀୟ ସଂରକ୍ଷଣ କାର୍ଯ୍ୟ ଅପେକ୍ଷା ଜମିର ଅଣକୃଷି ବ୍ୟବହାର (ନିର୍ମାଣ) ଅଧିକ ହେଲେ ପାରିପାର୍ଶ୍ୱିକ ସନ୍ତୁଳନ ରକ୍ଷା କରିବା ଅସମ୍ଭବ ହୋଇପଡ଼ିବ ବୋଲି ଉପରୋକ୍ତ ଅଧ୍ୟୟନ ଚେତାଇ ଦେଇଛି।
