ଭୁବନେଶ୍ୱର, ୩୦।୯: ଫୁଲ-ଭଗବାନ ଫାଉଣ୍ଡେଶନ ଆନୁକୂଲ୍ୟରେ ବିଶିଷ୍ଟ ସାହିତି୍ୟକ ବିଭୂତି ପଟ୍ଟନାୟକଙ୍କ ‘ଶ୍ରେଷ୍ଠ କଥା ଦଶକ’ ସ୍ଥାନୀୟ ଏକ ହୋଟେଲରେ ବୁଧବାର ଉନ୍ମୋଚିତ ହୋଇଯାଇଛି। ଏହି ସାରସ୍ବତ ସଭାରେ ଫୁଲ-ଭଗବାନ ଫାଉଣ୍ଡେସନ ତରଫରୁ ପଟ୍ଟନାୟକ ଓ ତାଙ୍କ ସ୍ତ୍ରୀ ସୁରପ୍ରଭା ପଟ୍ଟନାୟକଙ୍କୁ ଉପଢ଼ୌକନ ଓ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରାଯାଇଥିଲା। ସମ୍ବର୍ଦ୍ଧନା ଉତ୍ତରରେ ପଟ୍ଟନାୟକ କହିଥିଲେ, ତାଙ୍କ ଜୀବନରେ ଲେଖିଥିବା ୧୦୦ରୁ ଊର୍ଦ୍ଧ୍ୱ ଉପନ୍ୟାସ ମଧ୍ୟରେ ‘ବଧୂ-ନରୁପମା’ ତାଙ୍କୁ ପାଠକମାନଙ୍କ ନିକଟରେ ପରିଚିତ କରାଇପାରିଛି। ପ୍ରାରମ୍ଭରୁ ଫାଉଣ୍ଡେଶନର ସଭାପତି ପୀତବାସ ରାଉତରାୟ ପଟ୍ଟନାୟକଙ୍କ ସାରସ୍ବତ ସୃଷ୍ଟି ସମ୍ପର୍କରେ ପରିଚିତ କରିଥିଲେ। ପଟ୍ଟନାୟକ କହିଥିଲେ, ତାଙ୍କ ଜୀବନର ଆଦ୍ୟ ପ୍ରେରଣାଦାତା ହେଉଛନ୍ତି ସାରଙ୍ଗଧର ଦାସ। ସେ କଲମଧାରୀଙ୍କୁ ଲଙ୍ଗଳଧାରୀଙ୍କ ପାଖକୁ ଯିବାକୁ ଉପଦେଶ ଦେଇଥିଲେ। ସେଥିପାଇଁ ଲେଖକ ଗଳ୍ପ ଓ ଉପନ୍ୟାସ ଲେଖିବା ପୂର୍ବରୁ ବହୁ ତଥ୍ୟ ସଂଗ୍ରହ କରନ୍ତି ବୋଲି ସ୍ବୀକାର କରିଥିଲେ। ମାକର୍ସସଙ୍କ ଅର୍ଥନୈତିକ ବିଶ୍ଳେଷଣ ଓ ଗାନ୍ଧୀଙ୍କ ଅହିଂସା ଦ୍ୱାରା ବେଶିମାତ୍ରାରେ ପ୍ରଭାବିତ। ସେ ତାଙ୍କ ଜୀବନରେ ରାଜନୈତିକ ଆନ୍ଦୋଳନରେ ଯୋଗଦେଇ ଥିବାରୁ ଶୋଷଣମୁକ୍ତ ସାମଜ ସପକ୍ଷରେ କଲମ ଚାଳନା କରିଆସିଛନ୍ତି ବୋଲି ମତବ୍ୟକ୍ତ କରିଥିଲେ। ଏହି ସଭାରେ ସାହିତି୍ୟକ ଅସିତ ମହାନ୍ତି, କୃପାସାଗର ସାହୁ, ଡ. ଅରବିନ୍ଦ ରାୟ, ସଦାନନ୍ଦ ତ୍ରିପାଠୀ, କ୍ଷୀରୋଦ ଦାସ, ସ୍ବାଗତିକା ସ୍ବାଇଁ, ସୁଧାଂଶୁ ଶେଖର ସ୍ବାଇଁ, ଅରବିନ୍ଦ ପଟ୍ଟନାୟକ, କେଦାର ପୃଷ୍ଟି, ଅରୁଣ କାନୁନ୍ଗୋ ତଥା ଫୁଲ-ଭଗବନା ଫାଉଣ୍ଡେଶନ ତରଫରୁ ଲେଖିକା କୁସୁମ ପଟେଲ ଓ ଅନୁବାଦିକା ମୀନାକ୍ଷୀ ରାଉତରାୟ ଉପସ୍ଥିତ ଥିଲେ।
