ରାୟପୁର,୧୧।୧୦ : ମଙ୍ଗଳବାର ସକାଳୁ ଛତିଶଗଡ଼ରେ ଇଡି ପକ୍ଷରୁ ଚଢ଼ାଉ ଜାରି ରହିଛି। ଏହାକୁ ନେଇ ଛତିଶଗଡରେ ରାଜନୈତିକ ଆରୋପ ପ୍ରତ୍ୟାରୋପ ଆରମ୍ଭ ହୋଇଛି। ମୁଖ୍ୟମନ୍ତ୍ରୀ ଭୁପେଶ ବଘେଲା ଏହାକୁ କେନ୍ଦ୍ରୀୟ ଏଜେନ୍ସିର ଅପବ୍ୟବହାର ବୋଲି କହିଛନ୍ତି। ଏହାର ଜବାବରେ ପୂର୍ବତନ ମୁଖ୍ୟମନ୍ତ୍ରୀ ତଥା ଭାଜପା ନେତା ରମଣ ସିଂ ଭୁପେଶଙ୍କୁ ସୋନିଆ ଗାନ୍ଧୀଙ୍କ ଏଟିଏମ କାର୍ଡ ବୋଲି କହି କଟାକ୍ଷ କରିଛନ୍ତି। ସେ କହିଛନ୍ତି ମୁଁ ବାରମ୍ବାର ଏହା କହିଆସୁଛି।
ରମଣ ସିଂ କହିଛନ୍ତି ଯେ ଆଜି ଛତିଶଗଡ ସମଗ୍ର ଦେଶ ତଥା ବିଶ୍ୱରେ ଲଜ୍ଜିତ ହୋଇଛି। ରାଜ୍ୟର ୪୦ ଅଧିକାରୀଙ୍କ ଘରେ ଇଡି ଚଢ଼ାଉ କରାଯାଇଛି। ସେ କହିଛନ୍ତି ଯେ ସତ୍ୟ ସାମ୍ନାକୁ ଆସିବ। ସବୁକିଛି ଜଣାପଡ଼ିବ।
ରାଜ୍ୟରେ ହଜାର ହଜାର କୋଟିର ଟଙ୍କାର ବେଆଇନ କାରବାର ହୋଇଥାଏ। ଟଙ୍କା ଆଦାୟ କରାଯାଇ ଆସାମଏବଂ ହିମାଚଳ ପ୍ରଦେଶକୁ ପଠାଯାଏ। କଲେକ୍ଟରଙ୍କୁ କଲେକ୍ଟିଙ୍ଗ୍ ଏଜେଣ୍ଟ କରାଯାଇଛି। ଆଜି ଇଡି ସେସବୁ ଏଜେଣ୍ଟଙ୍କ ଘରେ ଚଢ଼ାଉ କରୁଛି। ରାଜ୍ୟରେ କଂଗ୍ରେସର ଶେଷ ହେବାର ସମୟ ପାଖେଇ ଆସିଛି। ଆମେ ସାରା ଦେଶରେ ଯୁଦ୍ଧ କରୁଛୁ। ଜନସାଧାରଣଙ୍କ ମନରେ ବହୁତ ଅସନ୍ତୋଷ ରହିଛି।
ରମଣ ମୁଖ୍ୟମନ୍ତ୍ରୀ ବଘେଲା ଦେଇଥିବା ପ୍ରତିକ୍ରିୟାକୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ ମୁଖ୍ୟମନ୍ତ୍ରୀଙ୍କ ପ୍ରତିକ୍ରିୟା ଚିନ୍ତାଜନକ। ସେ କହୁଛନ୍ତି ଭାଜପା ଏହି ଯୁଦ୍ଧରେ ଲଢ଼ିବାକୁ ସକ୍ଷମ ନୁହେଁ। ଆମେ ସେମାନଙ୍କୁ କହୁଛୁ ଯେ ଆମେ ଯୁଦ୍ଧ କରିବାରେ ସକ୍ଷମ। ପୂର୍ବରୁ ଭୁପେଶ କହିଥିଲେଭାଜପା ସିଧାସଳଖ ଲଢ଼ିବାକୁ ସକ୍ଷମ ନୁହେଁ ତେଣୁ ଇଡି,ଆଇଟି, ସିବିଆଇ ମାଧ୍ୟମରେ ଲଢ଼େଇ କରିବାକୁ ଚେଷ୍ଟା କରୁଛି। ଏଭଳି ଏଜେନ୍ସି ରାଜ୍ୟକୁ ବାରମ୍ବାର ଆସିବେ। ଏହା ସେମାନଙ୍କର ଶେଷ ଆସିବା ନୁହେଁ। ନିର୍ବାଚନ ଯେତିକି ପାଖେଇ ଆସିବ ସେମାନଙ୍କ ଚଢ଼ାଉ ସେତେ ବୃଦ୍ଧି ପାଇବ।
ଏହା ସହିତ ରମଣ ଅନ୍ୟ ଅଧିକାରୀମାନଙ୍କୁ ଚେତାବନୀ ଦେଇ କହିଛନ୍ତି ଯଦି ତୁମେ ଦୁର୍ନୀତିରେ ଲିପ୍ତ ରୁହ, ତୁମକୁ ସୁରକ୍ଷା ମିଳିବ ନାହିଁ। ତେଣୁ ସଚ୍ଚୋଟ ଭାବରେ କାମ କର । ଅଧିକ ସମୟ ନାହିଁ । ଶସକ ସରକାରଙ୍କର ଆଉ ଗୋଟିଏ ବର୍ଷ ବାକି ଅଛି । ସାବଧାନ ହେବା ଜରୁରୀ।
