ନୂଆପଡ଼ା ଅଫିସ,୪।୨: ଦିଲ୍ଲୀରେ ୭୪ତମ ଜାତୀୟ ସାଧାରଣତନ୍ତ୍ର ଦିବସରେ ନୂଆପଡ଼ା ଜିଲାର ଆଦିବାସୀ ଭୁଞ୍ଜିଆ ଦମ୍ପତି ଭୁଜବଲ ମାଝି ଓ କୁଞ୍ଜବାଇ ମାଝି ରାଜଅତିଥି ଭାବେ ଯୋଗଦେଇ ଗୁରୁବାର ଗଁାକୁ ଫେରିଛନ୍ତି। ଦିଲ୍ଲୀରୁ ଫେରି ଭୁଞ୍ଜିଆ ଦମ୍ପତି ସୁନାବେଡାରେ ପହଞ୍ଚତ୍ବା ପରେ ଗ୍ରାମବାସୀ ପକ୍ଷରୁ ସ୍ବାଗତ କରାଯାଇଥିଲା। ଶୁକ୍ରବାର ସମ୍ପ୍ରଦାୟର ପରମ୍ପରା ଅନୁସାରେ ଗାଁରେ ଶୁଦ୍ଧି ହୋଇ ଇଷ୍ଟଦେବୀ ସୁନାଦେଈଙ୍କୁ ମୁଣ୍ଡିଆ ମାରିଥିଲେ। ଏକ ଶୋଭାଯାତ୍ରାରେ ନଗର ପରିକ୍ରମା କରି ଘରକୁ ଯାଇଥିଲେ। ପାରମ୍ପରିକ ରୀତିନୀତିିରେ ନିଜ ଘରେ ଶୁଦ୍ଧି ହେବା ପରେ ଲାଲବଙ୍ଗଳାରେ ଥିବା ନିଜ ଇଷ୍ଟଦେବୀଙ୍କୁ ମୁଣ୍ଡିଆ ମାରି କ୍ଷମା ପ୍ରାର୍ଥନା କରିଥିଲେ।
ଜାନୁୟାରୀ ୨୧ରେ ନୂଆପଡାରୁ ଦିଲ୍ଲୀ ଅଭିମୁଖେ ବାହାରିଥିଲେ। ଭୁଞ୍ଜିଆ ଦମ୍ପତି ଦିଲ୍ଲୀ ପହଞ୍ଚତ୍ବା ପରେ ପ୍ରଧାନମନ୍ତ୍ରୀଙ୍କ ସହ ସାକ୍ଷାତ କରି ୨୬ ତାରିଖ ସାଧାରଣତନ୍ତ୍ର ପରେଡରେ ଅତିଥି ଭାବେ ଉପସ୍ଥିତ ଥିଲେ। ୨୮ ତାରିଖରେ ଏନ୍ସିସି ପରେଡରେ ମଧ୍ୟ ଯୋଗଦାନ କରିଥିଲେ। ଏହା ବ୍ୟତୀତ ସେମାନେ ଦିଲ୍ଲୀ ନିକଟବର୍ତ୍ତୀ ସ୍ଥାନରେ ବୁଲିବା ସହ ବିଭିନ୍ନ ବିଦ୍ୟାଳୟ ଛାତ୍ରୀଛାତ୍ରମାନଙ୍କ ସହିତ ମିଶିଥିଲେ। ବିଭିନ୍ନ ରାଜ୍ୟରୁ ଆସିଥିବା ଅନେକ ଜନଜାତିର ଲୋକଙ୍କୁ ସାକ୍ଷାତ କରିବା ସହ ସେମାନଙ୍କ ବେଶଭୂଷା, ଚାଲିଚଳନ, ସାଂସ୍କୃତି, ପରମ୍ପରା ସମ୍ପର୍କରେ ମଧ୍ୟ ଜାଣିବାକୁ ପାଇଥିଲେ। ରାଷ୍ଟ୍ରପତିଙ୍କ ନୈଶଭୋଜିରେ ଯୋଗଦେଇଥିଲେ। ଶେଷରେ ଅନୁସୂଚିତ ଜାତି ଓ ଜନଜାତି ବିଭାଗ ମନ୍ତ୍ରୀଙ୍କ ସହ ସାକ୍ଷାତ କରି ତାଙ୍କଠାରୁ ପ୍ରମାଣପତ୍ର ତଥା ଉପହାର ଗ୍ରହଣ କରି ନୂଆପଡା ପ୍ରତ୍ୟାବର୍ତ୍ତନ କରିଛନ୍ତି। ନୂଆପଡା ଜନସାଧାରଣଠାରେ ଦିଲ୍ଲୀ ଗସ୍ତର ସମ୍ପୂର୍ଣ୍ଣ ଅନୁଭୂତି ବଖାଣି ଥିଲେ।
