ଭୁବନେଶ୍ୱର,୧୩।୧୨(ବ୍ୟୁରୋ):ରାଜଧାନୀ ଭୁବନେଶ୍ୱରକୁ ଆହୁରି ସୁନ୍ଦର ସହର ଭାବେ ଗଢ଼ି ତୋଳିବା ପାଇଁ ବିଏମ୍ସି ବିଭିନ୍ନ ପ୍ରକାରର ପଦକ୍ଷେପ ଗ୍ରହଣ କରୁଛି। ନିକଟରେ ସ୍ବେରେଜ, ସେଫ୍ଟେଜ ଓ ଫିକଲ୍ ମ୍ୟାନେଜମେଣ୍ଟ କ୍ଷେତ୍ରରେ ବିଏମ୍ସିକୁ ଜାତୀୟ ସ୍ତରରେ ପୁରସ୍କାର ମିଳିବା ପଛରେ ଭୁବନେଶ୍ୱରବାସୀଙ୍କ ସହଯୋଗ ଥିବା କହିଛନ୍ତି ମେୟର ସୁଲୋଚନା ଦାସ। ବିଏମ୍ସି ସଭାଗୃହରେ ସୋମବାର ଆୟୋଜିତ ଏକ ସ୍ବତନ୍ତ୍ର ବୈଠକରେ ବିଏମ୍ସିର ସମସ୍ତ କାର୍ଯ୍ୟକର୍ତ୍ତା ଏବଂ ଲୋକଙ୍କୁ ସଫଳତାର ଶ୍ରେୟ ଦେଇଥିଲେ ମେୟର। ଏଥିସହ ଖୁବ୍ଶୀଘ୍ର ସ୍ବଚ୍ଛ ସର୍ବେକ୍ଷଣ ପ୍ରକ୍ରିୟା ଆରମ୍ଭ ହେବାକୁ ଯାଉଥିବାରୁ ଏଥର କିଭଳି ଭୁବନେଶ୍ୱରର ର଼୍ୟାଙ୍କ୍ ୮୦ରୁ ଉପରେ ରହିବ ସେନେଇ ଲକ୍ଷ୍ୟ ଧାର୍ଯ୍ୟ କରାଯାଇଛି। ସହରକୁ ସ୍ବଚ୍ଛ, ସୁନ୍ଦର କରିବା ପାଇଁ ପଦକ୍ଷେପ ନିଆଯାଉଛି। କାନ୍ଥବାଡ଼ଠାରୁ ଆରମ୍ଭ କରି ରାସ୍ତାଘାଟ ପର୍ଯ୍ୟନ୍ତ ସବୁ ସୁନ୍ଦର କରାଯାଉଛି। ଏହାବ୍ୟତୀତ ସଲିଡ୍ ଏବଂ ଲିକ୍ୱିଡ୍ ବର୍ଜକୁ ଠିକ୍ ଭାବେ ପରିଚାଳନା କରାଯାଉଛି। ସେହିପରି ସହରକୁ ସ୍ଲମ୍ ଫ୍ରି ସିଟି ଭାବେ ପରିଗଣିତ କରିବା ସହ ଶ୍ରେଷ୍ଠ ବାସୋପଯୋଗୀ ସହର ଭାବେ ପରିଣତ କରିବାକୁ ଚେଷ୍ଟା କରାଯାଉଥିବା ମେୟର ଦାସ କହିଥିଲେ।
କାର୍ଯ୍ୟକ୍ରମରେ ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେ ଯୋଗଦେଇ କହିଲେ, ସହରର ବିକାଶ ଓ ଉନ୍ନତି କରିବା ନେଇ ବେଷ୍ଟ ପ୍ରାକ୍ଟିସ ପାଇଁ କର୍ପୋରେଟରମାନଙ୍କୁ ସୁରତ, ଇନ୍ଦୋର, ପୁଣେ ଭଳି ବିଭିନ୍ନ ରାଜ୍ୟକୁ ପଠାଯିବ। କର୍ପୋରେଟରମାନେ ସେଠାକୁ ଯାଇ ଉନ୍ନୟନମୂଳକ କାର୍ଯ୍ୟ ଦେଖିବା ସହ ଜ୍ଞାନ ଆହରଣ କରିବେ। ଚଳିତ ମାସରୁ ଏହି ପ୍ରକ୍ରିୟା ଆରମ୍ଭ ହେବାର ଯୋଜନା ରହିଛି। ସେହିପରି ହକି ବିଶ୍ୱକପ୍ ପାଇଁ କ୍ୟାମ୍ପେନ ମୋଡ୍ରେ ବିଭିନ୍ନ କାମ କରାଯିବ ବୋଲି କମିଶନର କହିଥିଲେ। ଏହା ବ୍ୟତୀତ ଆସନ୍ତା ୧୩ ତାରିଖ ମଧ୍ୟରେ ‘ମୁକ୍ତା’ ଯୋଜନାରେ ନିଜ ନିଜ ଓ୍ବାର୍ଡରେ ଥିବା ଖାଲି ଜାଗାରେ କେଉଁ ପ୍ରକଳ୍ପ କରାଯିବ ସେନେଇ ପ୍ରସ୍ତାବ ଦେବାକୁ କର୍ପୋରେଟରମାନଙ୍କୁ ନିର୍ଦ୍ଦେଶ ଦିଆଯାଇଥିଲା। ଏଥିସହ ପ୍ରତି ଓ୍ବାର୍ଡରୁ ସର୍ବାଧିକ ୧୦ଟି ଲେଖାଏ ପ୍ରସ୍ତାବ ଦେବାକୁ କୁହାଯାଇଥିଲା। ବୈଠକରେ ଡେପୁଟି କମିଶନର ମଞ୍ଜୁଲତା କହଁର, ଅତିରିକ୍ତ କମିଶନର ସୂର୍ଯ୍ୟବଂଶୀ ମୟୁର ବିକାଶ, ଡେପୁଟି କମିଶନର (ପରିମଳ) ଶୁଭେନ୍ଦୁ ସାହୁ, ସାନିଟେଶନ ଷ୍ଟାଣ୍ଡିଂ କମିଟି ଚେୟାରମ୍ୟାନ ବିରଞ୍ଚତ୍ ନାରାୟଣ ମହାସୁପକାର, ସିଟି ଇଞ୍ଜିନିୟର ଅରୁଣ ନାୟକଙ୍କ ସମେତ କର୍ପୋରେଟରମାନେ ଉପସ୍ଥିତ ଥିଲେ।
