ନୂଆଦିଲ୍ଲୀ,୧୪।୧୧ (ପି.ଟି.): କଂଗ୍ରେସର ଭାରତ ଯୋଡ଼ୋ ଯାତ୍ରା ଲୋକଙ୍କ ପ୍ରସଙ୍ଗ ଉଠାଇବାରେ ସଫଳ ହୋଇଥିବାବେଳେ ଆଗାମୀ ଦିନରେ ଉକ୍ତ ପ୍ରସଙ୍ଗରେ ସରକାରଙ୍କୁ ଉତ୍ତରଦାୟୀ ସୁନିଶ୍ଚିତ କରାଇବାକୁ ଯାଉଛି। ଯାତ୍ରା ଦ୍ୱାରା କଂଗ୍ରେସ ନେତା ରାହୁଲ ଗାନ୍ଧୀ ବଦନାମ ହେବେ ବୋଲି ଯେଉଁ ମିଛ ପ୍ରଚାର ଚାଲିଥିଲା ତାହା ଭୁଲ୍ ପ୍ରମାଣିତ ହୋଇଛି। ଦେଶ ଆଗରେ ତାଙ୍କ ବାସ୍ତବତା ପଦାକୁ ଆସିଥିବା କଂଗ୍ରେସ କହିଛି। ଭାରତ ଯୋଡ଼ୋ ଯାତ୍ରାକୁ ଆଶାତୀତ ସଫଳତା ମିଳିଥିବା ଏଆଇସିସି ମୁଖ୍ୟାଳୟରେ ଏକ ଖବରଦାତା ସମ୍ମିଳନୀକୁ କଂଗ୍ରେସ ନେତା କହ୍ନେୟା କୁମାର କହିଛନ୍ତି।
ରାହୁଲଙ୍କ ନେତୃତ୍ୱରେ ଏହି ପଦଯାତ୍ରା ଯେତେବେଳେ ଆରମ୍ଭ ହେଲା ଏହାର ସଫଳତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିଲା। ଯାତ୍ରାରେ ଲୋକେ ସାମିଲ ହେବେ କି ନାହିଁ, ଏବଂ ଏହା ଦିନକୁ ୨୫ କିଲୋମିଟର ଅତିକ୍ରମ କରିପାରିବ କି ନାହିଁ ତାହାକୁ ନେଇ ଅନେକ ସନ୍ଦିହାନ ଥିଲେ। ଏବେ ଭାରତ ଯୋଡ଼ୋ ଯାତ୍ରା ୬୦ରୁ ଅଧିକ ଦିନ ଅତିକ୍ରମ କରିଥିବା ବେଳେ ପ୍ରତିଦିନ ଏଥିରେ ହଜାର ହଜାର ଲୋକ ସାମିଲ ହେଉଛନ୍ତି।
ମୂଲ୍ୟବୃଦ୍ଧି ଏବଂ ବେରୋଜଗାରି ଜନସାଧାରଣଙ୍କର ଦୁଇଟି ମୁଖ୍ୟ ପ୍ରସଙ୍ଗ ଯାହା ଯାତ୍ରା ସମୟରେ ଲୋକଙ୍କଠାରୁ ଜାଣିବାକୁ ମିଳିଛି। ସଂଘବାଦ ସୁରକ୍ଷା ପ୍ରସଙ୍ଗ ଦକ୍ଷିଣୀ ରାଜ୍ୟଗୁଡ଼ିକରେ ମୁଣ୍ଡ ଟେକିଛି। କେନ୍ଦ୍ର ସରକାର ନ୍ୟାୟ ଦେବାରେ ବିଫଳ ହୋଇଥିବା କୁମାର କହିଛନ୍ତି। ମହାରାଷ୍ଟ୍ରରେ ଚାଲିଥିବା ଭାରତ ଯୋଡ଼ୋ ଯାତ୍ରା ରବିବାର ପାଇଁ ବନ୍ଦ ଥିଲାବେଳେ ସୋମବାର ଏହା ହିଙ୍ଗୋଲି ଜିଲାରୁ ଓ୍ବାଶିମ ଅଭିମୁଖେ ବାହାରିବ। ଭାରତ ବିଭାଜିତ ହେବ ନାହିଁ କିମ୍ବା ଘୃଣାକୁ ପ୍ରଶ୍ରୟ ଦିଆଯାଇ ପାରିବ ନାହିଁ, ପଦଯାତ୍ରାରୁ ଏହି ବାର୍ତ୍ତା ମିଳିଥିବା କୁମାର କହିଛନ୍ତି।
