ଭଞ୍ଜନଗର,୧୪।୭(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ଛାତ୍ରୀଛାତ୍ରମାନେ ଭୁବନେଶ୍ୱରରେ ଅନୁଷ୍ଟିତ ରିଜିଓନାଲ ଡାଇରେକ୍ଟରସ୍ତରୀୟ ଖେଳକୁଦ ପ୍ରତିଯୋଗିତା ୨୦୨୬-୨୦୨୭ରେ ସଫଳତା ହାସଲ କରିଛନ୍ତି। ଆୟୁଷ୍ମାନ ନାୟକ ଅଣ୍ଡର ୧୯ ସଟପୁଟରେ ଭାଗ ନେଇ ବ୍ରୋଞ୍ଚ ପଦକ ହାସଲ କରିଛନ୍ତି। ସେହିଭଳି ଆୟୁଷ ବେହେରା ସଟ ପୁଟରେ ଅଣ୍ଡର ୧୭ରେ ସିଲଭର ପଦକ ବିଜୟୀ ହୋଇଥିବାବେଳେ ଦିବ୍ୟାଂଶୁ ସାହୁ ଜାଭଲିନ ଥ୍ରୋରେ ବ୍ରୋଞ୍ଚ ଏବଂ ଦିବ୍ୟା ଆପଟ୍ଟ ୮୦ ମିଟର ବାଧା ଦୌଡ଼ରେ ସିଲଭର ପଦକ ବିଜୟୀ ହୋଇଛନ୍ତି। ଏଥିସହ ସାଇ କ୍ରିଷ୍ଠା ବେହେରା ଓ ଆଶୁତୋଷ ଗୌଡ଼ ପ୍ରତିଯୋଗିତାରେ ଅଂଶଗ୍ରହଣ କରି ବିଦ୍ୟାଳୟର ସୁନାମ ବଢ଼ାଇଛନ୍ତି।
ଭୁବନେଶ୍ବର କିଟ ବିଶ୍ୱବିଦ୍ୟାଳୟ ପରିସରରେ ଗତ ୧୦ ତାରିଖରୁ ୧୨ ତାରିଖ ପର୍ଯ୍ୟନ୍ତ ୩ ଦିନ ଧରି ରାଜ୍ୟର ବିଭିନ୍ନ ପ୍ରାନ୍ତରେ ଥିବା କେନ୍ଦ୍ରୀୟ ବିଦ୍ୟାଳୟ ଛାତ୍ରୀଛାତ୍ରମାନେ ପ୍ରତିଯୋଗିତାରେ ଅଂଶଗ୍ରହଣ କରିଥିଲେ। କୃତୀ ପ୍ରତିଯୋଗୀମାନେ ଇତିମଧ୍ୟରେ ଫେରିବା ପରେ ବିଦ୍ୟାଳୟ ପକ୍ଷରୁ ସେମାନଙ୍କୁ ସମ୍ବର୍ଦ୍ଧନା ଦିଆଯାଇଛି। ଅଧ୍ୟକ୍ଷ ପ୍ରଦୀପ କମାନୁ କୃତୀ ପ୍ରତିଯୋଗୀମାନଙ୍କ ଉଜ୍ଜ୍ବଳ ଭବିଷ୍ୟତ କାମନା କରିଛନ୍ତି। କ୍ରୀଡ଼ା ଶିକ୍ଷକ ମଞ୍ଜିତ ଏବଂ ଗ୍ରନ୍ଥାଗାର ସୁମନଙ୍କ ନେତୃତ୍ୱରେ ଛାତ୍ରୀଛାତ୍ରମାନେ ଭୁବନେଶ୍ୱର ଯାଇଥିଲେ। ପ୍ରତିଯୋଗୀଙ୍କ ସଫଳତାରେ ବିଦ୍ୟାଳୟ ଛାତ୍ରୀଛାତ୍ର ଏବଂ ଶିକ୍ଷକମାନେ ଖୁସି ବ୍ୟକ୍ତ କରିଛନ୍ତି।