ବାରିପଦା ଅଫିସ,୧୦।୩: ଶିମିଳିପାଳ ଅଭୟାରଣ୍ୟକୁ ନିଆଁରୁ ସୁରକ୍ଷା ଏବଂ ଗ୍ରାମାଞ୍ଚଳରେ ଲୋକଙ୍କୁ ପାନୀୟ ଜଳ ଯୋଗାଣ ଦାବିକୁ ନେଇ ଭଞ୍ଜସେନା ପକ୍ଷରୁ ଶୁକ୍ରବାର ଜିଲାପାଳଙ୍କ କାର୍ଯ୍ୟାଳୟ ଘେରାଉ କରି ବିକ୍ଷୋଭ ପ୍ରଦର୍ଶନ କରାଯାଇଛି। ସଙ୍ଗଠନର ପ୍ରତିଷ୍ଠାତା କଳିଙ୍ଗ କେଶରୀ ଜେନାଙ୍କ ନିର୍ଦ୍ଦେଶରେ ଜିଲା ସଭାପତି ପିଣ୍ଟୁ ମାଇତିଙ୍କ ନେତୃତ୍ୱରେ ଶତାଧିକ କର୍ମକର୍ତ୍ତା ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇ ଦାବି ଉପସ୍ଥାପନ କରିଥିଲେ।
ଏସିଆ ମହାଦେଶର ଦ୍ବିତୀୟ ବୃହତ ଜୈବମଣ୍ଡଳ ଭାବେ ଶିମିଳିପାଳ ଅଭୟାରଣ୍ୟ ପରିଚିତ। ହେଲେ ଦୁଇମାସ ଧରି ଅଭୟାରଣ୍ୟରେ ଜଳୁଥିବା ନିଆଁକୁ ବନବିଭାଗ ଆୟତ୍ତ କରିବାରେ ବିଫଳ ହୋଇଛି । ଫଳରେ ଅଭୟାରଣ୍ୟର ବୃକ୍ଷଲତା ସାଙ୍ଗକୁ ବନ୍ୟଜନ୍ତୁ ବିଶେଷ ଭାବେ ପ୍ରଭାବିତ ହେଉଛନ୍ତି । ଏପରିକି ବନ୍ୟଜନ୍ତୁ ମତ୍ୟୁ ମୁଖରେ ପଡୁଛନ୍ତି।
ଏପରି କି ଶିକାରୀ, କାଠମାଫିଆ ଏବଂ ମହୁଲ ଫୁଲ ସଂଗ୍ରହ ପାଇଁ ନିଆଁ ଲଗାଉଥିବା ଲୋକଙ୍କୁ ବନ ବିଭାଗ ଧରିବା ନେଇ କୌଣସି ପଦକ୍ଷେପ ନେଉ ନ ଥିବା ସେନା ପକ୍ଷରୁ ଅଭିଯୋଗ ହୋଇଛି। ବିଭାଗ ପକ୍ଷରୁ ନିଆଁ ଲିଭାଇବାରେ ବିଳମ୍ବ କରାଗଲେ ଆନ୍ଦୋଳନକୁ ବ୍ୟାପକ କରାଯିବ ବୋଲି ଭଞ୍ଜ ସେନା ପକ୍ଷରୁ ଚେତାବନୀ ଦିଆଯାଇଛି।
ସେହିପରି ଅଞ୍ଚଳରେ ପାଣି ସମସ୍ୟା ଦେଖାଦେଇଛି। ଜିଲାର ରାଇରଙ୍ଗପୁର ଓ ବାରିପଦାରେ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ଅଧିକାରୀମାନେ ଲୋକେ କିପରି ପାଣି ପାଇବେ ସେଥିପ୍ରତି ଦୃଷ୍ଟି ଦେଉ ନ ଥିବା ବେଳେ କେବଳ ଦୁର୍ନୀତି ମାଧ୍ୟମରେ କିପରି ଅଧିକ ରୋଜଗାର ହୋଇପାରିବ ସେଥିପ୍ରତି ନଜର ରଖିଥିବା ଅଭିଯୋଗ ହୋଇଛି। ଏନେଇ ଲୋକେ ପାଣି ପାଇଁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ସେନା ପକ୍ଷରୁ କୁହାଯାଇଛି। ଏହିସବୁ ସମସ୍ୟାର ତୁରନ୍ତ ସମାଧାନ କରା ନ ଗଲେ ଜିଲାରେ ଆନ୍ଦୋଳନକୁ ଜୋରଦାର କରାଯିବ ବୋଲି ଭଞ୍ଜ ସେନା ପକ୍ଷରୁ କୁହାଯାଇଛି।
