ଭୁବନେଶ୍ୱର,୬।୬(ବ୍ୟୁରୋ): ବାହାନଗା ଟ୍ରେନ ଟ୍ରାଜେଡି ପରେ ଏବେ ମୃତଦେହ ହସ୍ତାନ୍ତର ପ୍ରକ୍ରିୟା ଜାରି ରହିଛି। ଭୁବନେଶ୍ୱର ଏମ୍ସ ସହ ଅନ୍ୟ ହସ୍ପିଟାଲରେ ସମ୍ପର୍କୀୟମାନେ ମୃତଦେହ ନେବାକୁ ଅପେକ୍ଷା କରିଛନ୍ତି। ଏଥିପାଇଁ ପ୍ରଶାସନ ଓ ହସ୍ପିଟାଲ ପକ୍ଷରୁ ସେମାନଙ୍କୁ ସମସ୍ତ ସହଯୋଗ ଯୋଗାଇ ଦିଆଯାଉଛି। ହେଲେ ବହୁ ମୃତଦେହ ନଷ୍ଟ ହୋଇଯାଇଥିବାରୁ ଚିହ୍ନିବା କଷ୍ଟକର ହୋଇପଡିଛି। ଫଳରେ ପ୍ରଶାସନ ପାଇଁ ଏହା ବଡ଼ ଚ୍ୟାଲେଞ୍ଜ ପାଲଟିଛି। ଅନ୍ୟପଟେ ପରିବାର ଓ ସମ୍ପର୍କୀୟମାନେ ମୃତକଙ୍କ ଫଟୋ ଧରି ଗୋଟିଏ ପରେ ଗୋଟିଏ ହସ୍ପିଟାଲ ଦୌଡି ନୟାନ୍ତ ହୋଇଥିଲେ ମଧ୍ୟ କୌଣସି ପତ୍ତା ନ ପାଇବାରୁ ନିରାଶ ହୋଇପଡିଛନ୍ତି। ବିହାରର ମହମ୍ମଦ ସୌକତ ପୁଅ ମହମ୍ମଦ ତସ୍ୱରଙ୍କର ଟ୍ରେନ୍ ଦୁର୍ଘଟଣାରେ ମୃତ୍ୟୁ ଘଟିଥିବା ନେଇ ତାଙ୍କ ବୋହୂ ତଥା ତସ୍ଓ୍ବରଙ୍କ ସ୍ତ୍ରୀଙ୍କୁ ଖବର ଦେଇଥିଲେ। ଏହାପରେ ସ୍ବାମୀଙ୍କ ସମ୍ପର୍କରେ ଟିଭିରୁ ଜାଣିବା ପରେ ୭ ମାସର ଗର୍ଭବତୀ ଥିବା ସ୍ତ୍ରୀ ବୁକୁ ଫଟାଇ କାନ୍ଦୁଛନ୍ତି। ଏପଟେ ବାପା ମହମ୍ମଦ ପୁଅକୁ ଖୋଜିବାକୁ ବାଲେଶ୍ୱରରେ ଆସି ପହଞ୍ଚିଥିଲେ। ସେଠାରେ କୌଣସି ପତ୍ତା ନ ପାଇବାରୁ କେତେଜଣ ରେଳ କର୍ମଚାରୀ ଭୁବନେଶ୍ୱର ଏମ୍ସ କିମ୍ବା କଟକ ଯିବାକୁ କହିଥିଲେ। ହେଲେ ଏମ୍ସରେ ଦୀର୍ଘ ସମୟର ଧାଁ ଦୌଡ କରିଥିଲେ ମଧ୍ୟ ପୁଅର ମୃତଦେହ କିମ୍ବା ତାଙ୍କ ସମ୍ପର୍କରେ କିଛି ସୂଚନା ପାଇ ନ ଥିଲେ। ତାଙ୍କୁ ଦେଖି କେତେଜଣ ପୋଲିସ କର୍ମଚାରୀ କଟକ ଯିବାକୁ କହିବାରୁ ସେ ରାଗିଯାଇଥିଲେ। ଗୋଟିଏ ପଟେ ମୃତଦେହ ଚିହ୍ନଟ କରିବା କଷ୍ଟକର ହୋଇଥିବା ବେଳେ ଅନ୍ୟପଟେ ପ୍ରଶାସନ ପକ୍ଷରୁ ଠିକ ସହଯୋଗ କରାଯାଉ ନ ଥିବା ସେ ଅଭିଯୋଗ କରିଛନ୍ତି। ଏପରିକି ତାଙ୍କ ପୁଅର ମୃତଦେହକୁ ଫିଙ୍ଗି ଦିଆଯାଇଥିବା ସେ ଗୁରୁତର ଅଭିଯୋଗ ଆଣିଛନ୍ତି। ସେହିପରି ବିହାରର ଲକ୍ଷ୍ମୀଶ୍ୱର ଠାକୁର ମଧ୍ୟ ଜଣଙ୍କ ମୃତଦେହ ଚିହ୍ନଟ କରିଥିବା ବେଳେ ଅନ୍ୟ ୫ ଜଣଙ୍କୁ ଏଯାବତ୍ ଚିହ୍ନଟ କରି ପାରିନାହାନ୍ତି। ଫଳରେ ୫ ଜଣଙ୍କ ଫଟୋକୁ ଧରି ହସ୍ପିଟାଲ ସାରା ଘୁରି ବୁଲୁଥିବା ସେ କହିଛନ୍ତି। ଏହିଭଳି କିଏ ସ୍ବାମୀଙ୍କ ଫଟୋ ଧରି ତ ପୁଣି କିଏ ସ୍ତ୍ରୀ, ଭାଇଙ୍କ ଫଟୋ ଧରି ପଚାରି ବୁଝୁଛନ୍ତି। ତେଣୁ ଏଭଳି ପରିସ୍ଥିତିରେ ନିଖୋଜ ବ୍ୟକ୍ତିଙ୍କ ଖୋଜିବାର ଆବଶ୍ୟକତା ରହିଛି ବୋଲି ସାଧାରଣରେ ମତ ପ୍ରକାଶ ପାଇଛି ।
