ଭୁବନେଶ୍ବର,୧୨ା୧୨(ବ୍ୟୁରୋ): ପାଖେଇ ଆସୁଛି ହକି ବିଶ୍ୱକପ୍। ଜାନୁୟାରୀରେ ଆୟୋଜିତ ହେବାକୁ ଥିବା ଏହି ଅନ୍ତର୍ଜାତୀୟ ପ୍ରତିଯୋଗିତାକୁ ସଫଳ କରିବା ପାଇଁ ରାଜ୍ୟ ସରକାର ଜୋର୍ସୋର୍ରେ ଚଳାଇଛନ୍ତି ପ୍ରସ୍ତୁତି। ଏହି ବିଶ୍ୱସ୍ତରୀୟ ଟୁର୍ନାମେଣ୍ଟରେ ଭୁବନେଶ୍ୱର ଫୋକ୍ସରେ ରହିବ। ତେଣୁ ରାଜଧାନୀକୁ ସୁସଜ୍ଜିତ କରାଯାଉଛି। ନିର୍ଦ୍ଧାରିତ ସମୟରେ ଯେପରି ସମସ୍ତ କାର୍ଯ୍ୟ ସରିବ, ସେଥିଲାଗି ଜୋର୍ ଦିଆଯାଉଥିବାବେଳେ ରବିବାର ଉନ୍ନୟନମୂଳକ କାମର ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର। ବରମୁଣ୍ଡାରେ ନିର୍ମାଣଧୀନ ଆନ୍ତଃରାଜ୍ୟ ବସ୍ ଟର୍ମିନାଲ (ଆଇଏସ୍ବିଟି), ବିଏମ୍ସି ଆଇସିଓଏମ୍ସି କୋଠା ଏବଂ ଶହୀଦନଗରସ୍ଥିତ ବହୁତଳ କାର୍ ପାର୍କିଂ କୋଠା ଆଦି ବୁଲି ଦେଖିଛନ୍ତି। ଭୁବନେଶ୍ବର ଉନ୍ନୟନ କର୍ତ୍ତୃପକ୍ଷ (ବିଡିଏ) ଉପାଧ୍ୟକ୍ଷ ବଲୱନ୍ତ ସିଂ, ଭୁବନେଶ୍ବର ମହାନଗର ନିଗମ (ବିଏମସି) କମିଶନର ବିଜୟ ଅମୃତା କୁଲାଙ୍ଗେ ଉପସ୍ଥିତ ଥିଲେ। ବିଭାଗୀୟ ଅଧିକାରୀଙ୍କ ସହ ମୁଖ୍ୟ ଶାସନ ସଚିବ ଆଲୋଚନା କରିବା ସହ ଏବଂ ନିର୍ଦ୍ଧାରିତ ସମୟରେ ପ୍ରକଳ୍ପ ଶେଷ କରିବାକୁ ନିର୍ଦ୍ଦଶ ଦେଇଛନ୍ତି। ବିଡିଏ ତତ୍ତ୍ୱାବଧାନରେ ୧୫.୫ ଏକର ଜମିରେ ବରମୁଣ୍ଡା ଆଇଏସବିଟି ପ୍ରକଳ୍ପ କାମ ଚାଲିଛି। ଯାତ୍ରୀଙ୍କ ସୁବିଧା, କାର୍ଯ୍ୟାଳୟ ପାଇଁ ସ୍ଥାନ, ପାର୍କିଂ, ଫୁଡକୋର୍ଟ, ରେଷ୍ଟୁରାଣ୍ଟ, କମର୍ସିଆଲ ସ୍ପେସ୍ ଆଦି ଏଠାରେ ରହିବ। ଆସନ୍ତା ମାର୍ଚ୍ଚ ସୁଦ୍ଧା କାର୍ଯ୍ୟ ଶେଷ କରିବାକୁ ବିଡିଏ ଅଧିକାରୀଙ୍କୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି।
ଶହୀଦନଗର ବହୁତଳ କାର୍ ପାର୍କିଂ କୋଠାରୁ ବଜାର ପର୍ଯ୍ୟନ୍ତ ଯାତ୍ରୀଙ୍କ ନିରାପଦ ଯାତାୟାତ ପାଇଁ ନୋ-ପାର୍କିଂ ଜୋନ୍ କାର୍ଯ୍ୟକାରୀ କରିବାକୁ ବିଏମ୍ସି ଏବଂ ଭୁବନେଶ୍ବର ସ୍ମାର୍ଟ ସିଟି ଅଧିକାରୀଙ୍କୁ କୁହାଯାଇଛି। ସତ୍ୟନଗର, ଶହୀଦନଗର ଏବଂ ଖାରବେଳ ନଗର ଅଞ୍ଚଳରେ ଶିଶୁଙ୍କ ପାଇଁ ପାର୍କ, ସାଇକେଲ୍ ଟ୍ରାକ୍, ୱାକିଂ ଟ୍ରାକ୍ ଆଦି ବିଭିନ୍ନ ସୁବିଧା କରାଯିବାକୁ ଯୋଜନା ରହିଛି। ମୁଖ୍ୟ ଶାସନ ସଚିବ ସାଉଥ୍ ଲେକ୍ ଜୋନ୍ ପରିଦର୍ଶନ କରିବା ସହ ମୁଖ୍ୟ ରାସ୍ତା ପାଶର୍ବରେ ପାର୍କିଂ ସ୍ଥାନର ବିକାଶ କରିବାକୁ ପରାମର୍ଶ ଦେଇଛନ୍ତି। ଏହି ଅବସରରେ ସେ ଜନପଥରେ ୧୨ ମହଲା ବିଶିଷ୍ଟ ବିଏମ୍ସି ଆଇସିଓଏମ୍ସି କୋଠା, ହକି ବିଶ୍ବକପ୍ ପାଇଁ ସହରରେ ଜାରି ରହିଥିବା ଲ୍ୟାଣ୍ଡସ୍କେପିଂ, ଷ୍ଟ୍ରିଟ୍ ଆର୍ଟ କାର୍ଯ୍ୟ, କଳାଭୂମିରେ ଜାତୀୟସ୍ତରୀୟ ଚିତ୍ର ଶିବିର ଏବଂ ରାଜ୍ୟସ୍ତରୀୟ ଭାସ୍କର୍ଯ୍ୟକଳା ଶିବିର ପରିଦର୍ଶନ କରିଛନ୍ତି।
