ଛତ୍ରପୁର,୩୦ା୯(ଡି.ଏନ.ଏ.): ଗଞ୍ଜାମ ଜିଲା ବ୍ରହ୍ମପୁର ଉପକଣ୍ଠରେ ଟ୍ରକ୍ ଟର୍ମିନାଲ ପ୍ରତିଷ୍ଠା ପାଇଁ ବହୁ ପୂର୍ବରୁ ଯୋଜନା ହୋଇଥିଲା। ଏଥିପାଇଁ ଚିହ୍ନଟ ଜମି ବାଣିଜ୍ୟ ଓ ପରିବହନ ବିଭାଗ ନଁାରେ କରାଯିବାରେ ବିଳମ୍ବ ହୋଇଛି। ଏହାର ପ୍ରତିଷ୍ଠା ଏକପ୍ରକାର ପ୍ରସ୍ତାବରେ ଅଟକିଛି। ବିଶେଷକରି ବ୍ରହ୍ମପୁର ସହରକୁ ଦୈନିକ ଶତାଧିକ ଟ୍ରକ୍ ବିଭିନ୍ନ ମାଲ ନେଇ ପ୍ରବେଶ କରିଥାନ୍ତି। ଏଥିସହ ବ୍ରହ୍ମପୁର ଉପକଣ୍ଠ ଜଗନ୍ନାଥପୁରରେ ଥିବା ଏଫ୍ସିଆଇ(ଭାରତ ଖାଦ୍ୟ ନିଗମ)ଗୋଦାମକୁ ମଧ୍ୟ ଶତାଧିକ ଟ୍ରକ୍ ଆସି ମାଲ ଲୋଡିଂ ଓ ଅନ୍ଲୋଡିଂ କରିଥାନ୍ତି। ସେହିପରି ଜଗନ୍ନାଥପୁର ରେଲୱେ ଷ୍ଟେଶନରେ ମଧ୍ୟ ସାର, ଗହମ ଆଦିର ରେକ୍ ମଧ୍ୟ ଲାଗିଥାଏ। ଏଠାରୁ ଟ୍ରକ୍ ଯୋଗେ ମାଲ ପରିବହନ କରି ଜିଲାର ବିଭିନ୍ନ ବ୍ଲକ ଅଞ୍ଚଳକୁ ପଠାଯାଇଥାଏ। ଏଥିଲାଗି ବ୍ରହ୍ମପୁର ସହର ଓ ତା’ର ଚତୁଃପାର୍ଶ୍ୱରେ ଦୈନିକ ଟ୍ରାଫିକ୍ ଜାମ୍ ସାଧାରଣ କଥା ହେଲାଣି। ବ୍ରହ୍ମପୁର ସହର, ଜଗନ୍ନାଥପୁର ଏଫ୍ସିଆଇ ଗୋଦାମ ଓ ରେଲୱେ ଷ୍ଟେଶନକୁ ଦୈନିକ ଯିବା ଆସିବା କରୁଥିବା ଶତାଧିକ ଟ୍ରକ୍ ଏନଏଚ୍-୧୬ ଦେଇ ଆସିଥାନ୍ତି। ଫଳରେ ଦୈନିକ ବହୁ ଟ୍ରକ୍ ଏନଏଚ୍ ଉପରେ ଅଟକି ରହୁଥିବା ଦେଖିବାକୁ ମିଳିଥାଏ। ଏଥିଲାଗି ଏନଏଚ୍ରେ ଦୁର୍ଘଟଣା ମଧ୍ୟ ବୃଦ୍ଧି ପାଉଛି।
ଏନଏଚ୍ ଓ ବ୍ରହ୍ମପୁର ସହରରେ ଏପରି ଟ୍ରକ୍ କିଭଳି ନ ରହିବ ସେନେଇ ବ୍ରହ୍ମପୁର ସହର ବାହାରେ ତଥା ଉପକଣ୍ଠରେ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ଏକ ଟ୍ରକ୍ ଟର୍ମିନାଲ ପ୍ରତିଷ୍ଠା ପାଇଁ ପରିକଳ୍ପନା କରାଯାଇଥିଲା। ରାଜ୍ୟ ସରକାର ଏହାକୁ ମଞ୍ଜୁର ଦେଇଥିଲେ। ଏହାପରେ ଉକ୍ତ ଟ୍ରକ୍ ଟର୍ମିନାଲ ପ୍ରତିଷ୍ଠା ପାଇଁ ଜମି ଖୋଜା ଯାଇଥିଲା। ଜିଲାର ଚିକିଟି ତହସିଲ ଅଧୀନ ଗିରିସୋଲା ମୌଜାରେ ୧୪.୬୬୧ ଏକର ଜମିରେ ଏହା ପ୍ରତିଷ୍ଠା ପାଇଁ ଚିହ୍ନଟ ହୋଇଥିଲା। ଏଥିପାଇଁ ନିୟମ ଅନୁଯାୟୀ ଉକ୍ତ ସାଇଟ ସମ୍ପର୍କରେ ଚିକିଟି ତହସିଲଦାରଙ୍କୁ ଏପ୍ରିଲ ୩୦ରେ ଚିଠି (ନମ୍ବର ୨୮୨୪) ପରିବହନ ବିଭାଗ ପକ୍ଷରୁ ପଠାଯାଇଥିଲା। ତେବେ ଏହା ଉପରେ କୌଣସି ପଦକ୍ଷେପ ନିଆଯାଇ ନ ଥିଲା। ପରେ ପୁଣି ଏ ସମ୍ପର୍କରେ ବ୍ରହ୍ମପୁର ଉପଜିଲାପାଳଙ୍କୁ ମେ’ ୧୧ରେ ଏକ ଚିଠି (ନଂ-୨୨୬୧) ପରିବହନ ବିଭାଗ ପକ୍ଷରୁ ପଠାଯାଇଥିଲା।
ଏହା ଉପରେ ଚିକିଟି ତହସିଲଦାରଙ୍କୁ ପଦକ୍ଷେପ ନେବାକୁ ନିର୍ଦ୍ଦେଶ ଦେବାକୁ ବ୍ରହ୍ମପୁର ଉପଜିଲାପାଳଙ୍କୁ ଅନୁରୋଧ କରାଯାଇଥିଲା। ପ୍ରସ୍ତାବିତ ଟ୍ରକ୍ ଟର୍ମିନାଲ ପାଇଁ ଚିହ୍ନଟ ଉକ୍ତ ଜମି ଅର୍ଥ ବିଭାଗ ଅଧୀନରେ ରହିଛି। ଏଣୁ ଉକ୍ତ ଜମିକୁ ଭୁବନେଶ୍ୱରସ୍ଥିତ ରାଜ୍ୟ ବାଣିଜ୍ୟ ପରିବହନ ବିଭାଗ ନାଁରେ କରିବାକୁ ରାଜ୍ୟ ଅର୍ଥ ବିଭାଗ ପ୍ରମୁଖ ଶାସନ ସଚିବଙ୍କୁ ଗଞ୍ଜାମ ଜିଲାପାଳଙ୍କ ପକ୍ଷରୁ ପ୍ରସ୍ତାବ ପଠାଯାଇଥିଲା। ତେବେ ଏହି ପ୍ରକ୍ରିୟା ବିଳମ୍ବ ହୋଇଥିବା ଜଣାପଡିଛି।
