ବ୍ରହ୍ମପୁର,୧୨ା୮: ଭିଜିଲାନ୍ସ ଜାଲରେ ବ୍ରହ୍ମପୁର ମୁଖ୍ୟ ଜିଲା କୃଷି ଅଧିକାରୀ (CDAO) ବ୍ୟୋମକେଶ ମିଶ୍ର । ୧୫,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଧରିଲା ଭିଜିଲାନ୍ସ ବିଭାଗ । ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା (MKUY) ର ସମନ୍ୱିତ କୃଷି ପ୍ରଣାଳୀ ଅଧୀନରେ ଫାଇଲ୍ ପ୍ରକ୍ରିୟାକରଣ କରିବା ଏବଂ ସବ୍ସିଡ୍ ରିଲିଜ କରାଇବା ପାଇଁ ସେ ଏହି ଲାଞ୍ଚ ନେଉଥିଲେ ।
ଉକ୍ତ ଯୋଜନାର ମାର୍ଗଦର୍ଶିକା ଅନୁଯାୟୀ, ଜଣେ ହିତାଧିକାରୀ କୃଷି ଏବଂ ଭିତ୍ତିଭୂମିରେ ବିନିଯୋଗ କରିଥିବା ଅର୍ଥର ୫୦ ପ୍ରତିଶତ ସବ୍ସିଡ୍ ପାଇବାକୁ ଯୋଗ୍ୟ ଅଟନ୍ତି । ହିତାଧିକାରୀଜଣକ ତାଙ୍କ ଫାଇଲ୍ କାମ କରିବା ପାଇଁ ଗତ ଦୁଇ ମାସ ହେବ ଅଭିଯୁକ୍ତ ବ୍ୟୋମକେଶ ମିଶ୍ରଙ୍କୁ ଅନୁରୋଧ କରୁଥିଲେ। କିନ୍ତୁ ବାରମ୍ବାର ଅନୁରୋଧ ସତ୍ତ୍ୱେ CDAO ଫାଇଲ୍ ଆଗକୁ ବଢ଼ାଉ ନଥିଲେ। ଏହା ପରିବର୍ତ୍ତେ ସେ ଉକ୍ତ କାମ ପାଇଁ ବର୍ତ୍ତମାନ ୧୫,୦୦୦ ଟଙ୍କା ଲାଞ୍ଚ ମାଗିଥିଲେ ଏବଂ ସବ୍ସିଡ୍ ଟଙ୍କା ମିଳିବା ପରେ ଏକ ନିର୍ଦ୍ଦିଷ୍ଟ ପ୍ରତିଶତ ମଧ୍ୟ ଦାବି କରିଥିଲେ।
ଲାଞ୍ଚ ମାଗିବା ଅଭିଯୋଗରେ ଅତିଷ୍ଠ ହୋଇ ହିତାଧିକାରୀଜଣକ ଭିଜିଲାନ୍ସ କର୍ତ୍ତୃପକ୍ଷଙ୍କ ନିକଟରେ ଅଭିଯୋଗ କରିଥିଲେ। ଏହାପରେ ଆଜି ଓଡ଼ିଶା ଭିଜିଲାନ୍ସର ଏକ ଟିମ୍ ଜାଲ ବିଛାଇ CDAOଙ୍କୁ ୧୫,୦୦୦ ଟଙ୍କା ଲାଞ୍ଚ ନେଉଥିବା ସମୟରେ ଧରିଥିଲେ । ଅଭିଯୁକ୍ତଙ୍କ ନିକଟରୁ ସମସ୍ତ ଲାଞ୍ଚ ଟଙ୍କା ଜବତ କରାଯାଇଛି । ଏହି ଘଟଣା ପରେ ବ୍ୟୋମକେଶ ମିଶ୍ରଙ୍କ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି ।