ଲଣ୍ଡନ,୨୪।୬ : ବ୍ରିଟିଶ ପ୍ରଧାନମନ୍ତ୍ରୀ ଋଷି ସୁନକଙ୍କ ଘନିଷ୍ଠ ସହଯୋଗୀ ତଥା ପୂର୍ବତନ ଉପପ୍ରଧାନ ମନ୍ତ୍ରୀ ଡୋମିନିକ ରାଏବ ପ୍ରଧାନମନ୍ତ୍ରୀ ସୁନକଙ୍କୁ ଭାରତ ସହ ନୂତନ ବାଣିଜ୍ୟ ଏବଂ ପ୍ରତିରକ୍ଷା ଚୁକ୍ତି ସ୍ବାକ୍ଷର କରିବାକୁ ପରାମର୍ଶ ଦେଇଛନ୍ତି। ସେ କହିଛନ୍ତି ଏହି ସମୟରେ ବ୍ରିଟେନ ଭାରତ ସହ ଥିବା ବନ୍ଧୁତ୍ୱର ଲାଭ ଉଠାଇବା ଉଚିତ। ବ୍ରିଟେନର ପ୍ରଥମ ଭାରତୀୟ ପ୍ରଧାନମନ୍ତ୍ରୀଙ୍କ ସହ ଦ୍ୱିପାକ୍ଷିକ ସମ୍ପର୍କରେ ଭାରତରୁ ଅନେକ କିଛି ହାସଲ କରିବାକୁ ପଡିବ ବୋଲି ରାଏବ କହିଛନ୍ତି।
ଡୋମିନିକ ରାଏବ ଗତ ମାସରେ ତାଙ୍କ ପଦରୁ ଇସ୍ତଫା ଦେଇଥିଲେ। ତାଙ୍କ ବିରୋଧରେ ଅସଦାଚରଣ ମାମଲାର ଅଭିଯୋଗ ହୋଇଥିଲା। ସୂଚନାନୁସାରେ, ରାଏବଙ୍କ ବିରୋଧରେ ନ୍ୟାୟ ମନ୍ତ୍ରଣାଳୟ ଏବଂ ହ୍ବାଇଟହଲର ଅନ୍ୟ ବିଭାଗକୁ ଭୟଭୀତ କରାଯାଇଥିବା ଅଭିଯୋଗ ହୋଇଥିଲା, ଏହା ପରେ ସେ ନିଜ ପଦରୁ ଇସ୍ତଫା ଦେଇଥିଲେ।
