ରସୁଲପୁର,୨୨ା୪(ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳରେ ଆଧାର ସଂଯୋଗ ବିନା ଖାଦ୍ୟ ସୁରକ୍ଷା ଯୋଜନାରୁ ଯୋଗ୍ୟ ହିତାଧିକାରୀ ବଞ୍ଚତ୍ତ ହେବା ଘଟଣାରେ ତଦନ୍ତ ଆରମ୍ଭ ହୋଇଛି। ମଙ୍ଗଳବାର ଏକ ତଦନ୍ତକାରୀ ଦଳ ରସୁଲପୁର ବ୍ଲକରେ ପହଞ୍ଚତ୍ ତଦନ୍ତ କରିଛି। ବ୍ଲକ ପ୍ରଶାସନ ସହାୟତାରେ ଏହି ଦଳ ବ୍ଲକର କଲଣ, ଜାବରା, ପ୍ରଥମାଖଣ୍ଡି, ଗନ୍ଧଣ ଆଦି ପଞ୍ଚାୟତର ଆଧାର ସଂଯୋଗ ହୋଇ ନ ଥିବା କେତେଜଣ ହିତାଧିକାରୀଙ୍କୁ ଭେଟି ସେମାନଙ୍କ ମତାମତ ସଂଗ୍ରହ କରିଛି। ଏନେଇ ୨୫ ତାରିଖ ପୂର୍ବରୁ ଓଡ଼ିଶା ହାଇକୋର୍ଟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଥିବାରୁ ତଦନ୍ତକାରୀ ଦଳ ପକ୍ଷରୁ ତ୍ୱରିତ ପଦକ୍ଷେପ ନିଆଯାଇଛି। ଏହିକ୍ରମରେ ଆଧାର ବିନା ବ୍ଲକ ଅଞ୍ଚଳରେ ହିତାଧିକାରୀଙ୍କୁ ଚାଉଳ ନ ମିଳିବା ଅଡୁଆ ଦୂର ହେବାକୁ ଯାଉଛି।
ଖାଦ୍ୟ ସୁରକ୍ଷା ଆଇନ ମୁତାବକ କେହି ହିତାଧିକାରୀ ଭୋକିଲା ରହିବେ ନାହିଁ। କୌଣସି ଆଳରେ କାହାରିକୁ ଯୋଜନାରୁ ମିଳୁଥିବା ସୁବିଧାରୁ ବଞ୍ଚତ୍ତ କରାଯାଇ ପାରିବ ନାହିଁ। ଏନେଇ ରାଜ୍ୟ ସରକାର କୋର୍ଟ ସମ୍ମୁଖରେ ସତ୍ୟପାଠ ଦାଖଲ କରିଛନ୍ତି। ଅନ୍ୟପକ୍ଷରେ ରାଶନକାର୍ଡ ସହ ଶତପ୍ରତିଶତ ଆଧାର ସଂଯୋଗ କରିବାକୁ ସରକାର ଲକ୍ଷ୍ୟ ରଖିଛନ୍ତି। ସେ ଦିଗରେ ବିଭାଗ ଉପରେ ସରକାରୀ ଚାପ ରହୁଛି ମଧ୍ୟ। ସେହି ମୁତାବକ ଆଧାରକାର୍ଡ ନ ଥିବା ହିତାଧିକାରୀଙ୍କୁ ତୁରନ୍ତ ଆଧାର ନମ୍ବର ସହ କାର୍ଡ ସଂଯୋଗ କରିବାକୁ ସରକାରୀ ନିର୍ଦ୍ଦେଶ ଥିଲା। ଯେଉଁମାନେ ଆଧାର ଦେଉ ନ ଥିଲେ ସେମାନଙ୍କ ଚାଉଳ ବନ୍ଦ କରାଯାଉଥିବା ନେଇ ଅଭିଯୋଗ ହେଉଥିଲା। ଏପରି କି କେତେକ କ୍ଷେତ୍ରରେ ଚାଉଳ ବଣ୍ଟନ ଦାୟିତ୍ୱରେ ଥିବା ଡିଲରମାନେ ହିତାଧିକାରୀଙ୍କୁ ଚାଉଳ ନ ଦେଇ ଫେରାଇ ଦେଉଥିବା ନଜିର ରହିଛି। ଏନେଇ ଏପ୍ରିଲ ୫ ତାରିଖରେ ‘ଧରିତ୍ରୀ’ ଓ ‘ଓଡ଼ିଶା ପୋଷ୍ଟ’ରେ ଖବର ପ୍ରକାଶ ପରେ ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ଏସ୍୍. ମୁରଲୀଧର ଓ ଜଷ୍ଟିସ ମୁରାହରି ଶ୍ରୀରମଣଙ୍କୁ ନେଇ ଗଠିତ ଖଣ୍ଡପୀଠ ଉକ୍ତ ଖବରକୁ ଗୁରୁତର ସହ ନେଇ ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ। ତଦନ୍ତାକରୀ ଦଳ ରସୁଲପୁର ବ୍ଲକକୁ ଯାଇ ତଦନ୍ତ କରିବା ସହ ଏହାର ରିପୋର୍ଟ କୋର୍ଟରେ ଦାଖଲ କରିବାକୁ ପରାମର୍ଶ ଦେଇଥିଲେ। ଏ ସମ୍ପର୍କରେ ଅବଗତ ହେବା ପରେ ଜିଲା ଓ ବ୍ଲକ ଯୋଗାଣ ବିଭାଗରେ ଛନକା ପଶିଥିଲା। ଆଧାର ବିନା ଚାଉଳ ବନ୍ଦ ହୋଇଛି କି ନାହଁ ସେ ନେଇ ବିଭାଗ ପକ୍ଷରୁ ତନାଘନା ହୋଇଥିଲା। ଯେଉଁ ସବୁ ସ୍ଥାନରେ ହିତାଧିକାରୀଙ୍କୁ ଆଧାର ଆଳରେ ଚାଉଳ, ଗହମ ବନ୍ଦ ହୋଇଛି ତୁରନ୍ତ ସେ ସବୁ ଘଟଣାକୁ ସମାଧାନ କରିବାକୁ ତତ୍ପରତା ପ୍ରକାଶ ପାଇଥିଲା।
ସ୍ଥିତି ପରଖିବାକୁ ଆସିଥିବା ତଦନ୍ତ ଦଳରେ ରାଜ୍ୟ ଯୋଗାଣ ବିଭାଗ(ହେଡ୍ କ୍ୱାର୍ଟର)ମୁଖ୍ୟ ଅଧିକାରୀ, ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ଯୁଗ୍ମ ନିର୍ଦ୍ଦେଶକଙ୍କ ସମେତ ଯାଜପୁର ଜିଲା ଯୋଗାଣ ଅଧିକାରୀ ସଲାଉଦ୍ଦିନ ଖାନ୍, ଯାଜପୁର ବ୍ଲକ ଯୋଗାଣ ଅଧିକାରୀ ଇତିଶ୍ରୀ ଜେନା, ଧର୍ମଶାଳା ବ୍ଲକ ଯୋଗାଣ ଅଧିକାରୀ ମାସନ କୁମାର ସିହା ପ୍ରମୁଖ ଘଟଣାସ୍ଥଳକୁ ଯାଇ ଆଧାର ନ ଥିବା ଓ ବାୟୋ ମେଟ୍ରିକରେ ଟିପଚିହ୍ନ ଚିହ୍ନଟ ହେଉ ନ ଥିବା ଓ ଆଇ ସ୍କାନରରେ ଆଖିଡୋଳା ଚିହ୍ନଟ ହେଉ ନ ଥିବା ହିତାଧିକାରୀଙ୍କୁ ଭେଟି ତଦନ୍ତ କରିଥିଲେ। ଏନେଇ ଜିଲା ଯୋଗାଣ ଅଧିକାରୀ ସଲାଉଦ୍ଦିନଙ୍କୁ ପଚାରିବାରୁ ସେ କହିଛନ୍ତି, କୋର୍ଟଙ୍କ ନିର୍ଦ୍ଦେଶ ବଳରେ ଏକ ତଦନ୍ତକାରୀ ଦଳ ଆସିଥିଲା। ଉକ୍ତ ଦଳକୁ ଜିଲା ଯୋଗାଣ ବିଭାଗ ପକ୍ଷରୁ ସହଯୋଗ କରାଯାଇଥିଲା। ତଦନ୍ତକାରୀ ଦଳ ହିତାଧିକାରୀଙ୍କୁ ଭେଟି ସେମାନଙ୍କ ମତାମତ ନେବା ସହ କେତେଜଣ ହିତାଧିକାରୀଙ୍କଠାରୁ ରାଶନକାର୍ଡ ସଂଗ୍ରହ କରିଛି ବୋଲି ସଲାଉଦିନ ପ୍ରକାଶ କରିଛନ୍ତି।
