ଗାଜା ସିଟି/ଜେରୁଜେଲମ୍,୧୮ା୧୧: ଇସ୍ରାଏଲର ହମାସ୍ ବିରୋଧୀ ଯୁଦ୍ଧକୁ ୫ ସପ୍ତାହରୁ ଅଧିକ ସମୟ ବିତିଯାଇଥିବାବେଳେ ରାସ୍ତାଘାଟ, ହସ୍ପିଟାଲ ସବୁକିଛି ପାଲଟିଯାଇଛି ଶ୍ମଶାନ। ଇସ୍ରାଏଲର ମିଶାଇଲ ମାଡ଼ରେ ନିହତ ହୋଇଥିବା ଅନେକ ହଜାର ପାଲେଷ୍ଟିନୀୟଙ୍କ ମୃତଦେହ ପୋତି ହୋଇରହିଛି। ଗାଜା ଷ୍ଟ୍ରିପ୍ର ବିସ୍ତୃତ ଭଗ୍ନାବଶେଷ ତଳେ ଲୋକେ ନିଜ ପିଲାଛୁଆ, ମା’ବାପା, ପଡ଼ୋଶୀଙ୍କ ମୃତଦେହ ଖୋଜୁଛନ୍ତି। ଯେଉଁଠୁ ଦୁର୍ଗନ୍ଧ ଛୁଟୁଛି, ସେଇଠି ଚାଲିଛି ଆମତ୍ୀୟଙ୍କ ଶବ ସନ୍ଧାନ। କିନ୍ତୁ ଉପକରଣ, ମାନବସମ୍ବଳ ଓ ଇନ୍ଧନ ଅଭାବରୁ ଏହା ସମ୍ଭବ ହୋଇପାରୁନାହିଁ। ତେଣୁ ଲୋକେ ବିକଳ ହୋଇ ହାତରେ ବି ଖୋଳି ପକାଉଛନ୍ତି।
ଅକ୍ଟୋବର ୭ରୁ ଅଦ୍ୟାବଧି ଗାଜାରେ ଅନୂ୍ୟନ ୧୧,୪୭୦ ପାଲେଷ୍ଟିନୀୟଙ୍କ ମୃତ୍ୟୁ ଘଟିଥିବା କୁହାଯାଉଛି। କିନ୍ତୁ ସ୍ବାସ୍ଥ୍ୟ ବ୍ୟବସ୍ଥା ସମ୍ପୂର୍ଣ୍ଣ ଭୁଶୁଡ଼ିଯାଇଥିବାରୁ ଡେଟା ସଂଗ୍ରହ ହୋଇ ନ ପାରିବାରୁ ବର୍ଦ୍ଧିତ ମୃତ୍ୟୁସଂଖ୍ୟା ଅପ୍ଡେଟ୍ କରାଯାଇନାହିଁ। ଇତିମଧ୍ୟରେ ଅଲ୍ ଶିଫା ପରିସରରେ ୭,୦୦୦ ରୋଗୀ, ଡାକ୍ତର, ନର୍ସ ଓ ନାଗରିକ ଆଶ୍ରୟ ନେଇଥିବା ଉକ୍ତ ହସ୍ପିଟାଲର ଡାଇରେକ୍ଟର ଅବୁ ସଲମିୟା କହିଛନ୍ତି। ଅନ୍ୟପକ୍ଷେ ହମାସ୍ ଆକ୍ରମଣରେ ଇସ୍ରାଏଲୀଙ୍କ ମୃତ୍ୟୁସଂଖ୍ୟା ୧,୨୦୦ ରହିଛି।
୪୨ ଦିନରେ ଇସ୍ରାଏଲ-ହମାସ୍ ଯୁଦ୍ଧ
ଏୟାର ଡିଫେନ୍ସ ରାଜଧାନୀ ଡାମାସ୍କସ୍ ନିକଟରେ ଇସ୍ରାଏଲୀ ମିଶାଇଲଗୁଡ଼ିକୁ ଖସାଇଦେଇଥିବା ସିରିଆ ସେନା ପକ୍ଷରୁ ଶୁକ୍ରବାର ଘୋଷଣା କରାଯାଇଛି।
ତତ୍କାଳ ଅନାହାର ଦେଖାଦେବ ବୋଲି ଜାତିସଂଘ ଖାଦ୍ୟ କାର୍ଯ୍ୟକ୍ରମ (ଡବ୍ଲ୍ୟୁଏଫ୍ପି) ସତର୍କ କରାଇଛି। ଯୁଦ୍ଧ ପ୍ରଭାବିତ ଅଞ୍ଚଳକୁ ମାତ୍ର ୧୦% ଖାଦ୍ୟ ଯୋଗାଣ କରାଯାଇପାରୁଛି। ଦକ୍ଷିଣ ଗାଜାର ବେକେରି ଓ ଅଟାକଳଗୁଡ଼ିକ ଉପେରେ ଇସ୍ରାଏଲର ଆକ୍ରମଣ ଯୋଗୁ କେବଳ ଗୋଟିଏ କମ୍ପାନୀ ଅଟା ଉତ୍ପାଦନ କରିପାରୁଛି। ବାକି ସବୁ ବନ୍ଦ ହୋଇଗଲାଣି।
ଅଧିକାଂଶ ଅଞ୍ଚଳରେ ଯୋଗାଯୋଗ ସମ୍ପୂର୍ଣ୍ଣ ବ୍ୟାଘାତ ହୋଇଛି। ସ୍ବାସ୍ଥ୍ୟ ବ୍ୟବସ୍ଥା ଉପରେ ଆକ୍ରମଣ ଫଳରେ କ୍ଷତିଗ୍ରସ୍ତ ଅଞ୍ଚଳ ସମ୍ପର୍କିତ ତଥ୍ୟ ସଂଗ୍ରହ କରାଯାଇପାରୁ ନାହିଁ।
ଆକ୍ରମଣରେ ଗାଜାର ଜବାଲିଆ ଶରଣାର୍ଥୀ ଶିବିରରେ ୧୮ ଜଣ ନିହତ ହୋଇଥିବା ପାଲେଷ୍ଟିନୀୟ କର୍ତ୍ତୃପକ୍ଷ ସୂଚନା ଦେଇଛନ୍ତି।
ଗାଜା ହସ୍ପିଟାଲ ସ୍ଥିତି
ଗାଜାରେ ଥିବା ହସ୍ପିଟାଲଗୁଡ଼ିକର ସ୍ଥିତି ଆହୁରି ଖରାପ ହେବାରେ ଲାଗିଛି। ସର୍ବବୃହତ୍ ମେଡିକାଲ ଫାସିଲିଟି ଅଲ୍ ଶିଫା ହସ୍ପିଟାଲରେ ଇସ୍ରାଏଲ ଡିଫେନ୍ସ ଫୋର୍ସ (ଆଇଡିଏଫ୍) ସୈନ୍ୟ ତୃତୀୟ ଦିନ ଧରି ଅଭିଯାନ ଜାରି ରଖିଛନ୍ତି। ସେଠାରେ ରୋଗୀଙ୍କ ପାଇଁ ଶଯ୍ୟା ନ ଥିବାରୁ ଅନେକେ ବାରଣ୍ଡା ଉପରେ ଚିକିତ୍ସିତ ହେଉଛନ୍ତି। ମାଲେସିଆ ପକ୍ଷରୁ ଗାଜାରେ ନିର୍ମିତ ଏକ ହସ୍ପିଟାଲ ଇସ୍ରାଏଲ ବୋମାମାଡ଼ରେ ବିଧ୍ୱସ୍ତ ହୋଇଯାଇଛି।
କୂଟନୀତି
ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ ଅଷ୍ଟ୍ରେଲିଆ ପ୍ରତିପକ୍ଷ ଆଣ୍ଟୋନି ଅଲ୍ବାନେସ୍ଙ୍କ ସହ ସାମ୍ପ୍ରତିକ ସ୍ଥିତି ଉପରେ ଆଲୋଚନା କରିଥିବା ବିଷୟ ଏକ୍ସ’ରେ ଘୋଷଣା କରିଛନ୍ତି। ଉଭୟେ ଅସ୍ତ୍ରବିରତି ପାଇଁ ଆହ୍ବାନ ଦେଇଛନ୍ତି।
ଜୋର୍ଡାନ୍ର ଏକ ସାମରିକ ହସ୍ପିଟାଲରେ ଇସ୍ରାଏଲ ଆକ୍ରମଣ କରିବାରୁ ୭ ଆହତ ହୋଇଥିବା ଆମେରିକା ପରରାଷ୍ଟ୍ର ବିଭାଗ ଏକ ବିବୃତିରେ କହିଛି। ତେବେ ଆକ୍ରମଣକୁ ଓ୍ବାଶିଂଟନ୍ ନିନ୍ଦା କରିନାହିଁ।
ସଚିବ ଆଣ୍ଟୋନି ବ୍ଲିଙ୍କେନ୍ ଓ୍ବେଷ୍ଟ୍ ବ୍ୟାଙ୍କରେ ଉତ୍ତେଜନା ହ୍ରାସ ପାଇଁ ଇସ୍ରାଏଲର ଯୁଦ୍ଧ କ୍ୟାବିନେଟ୍ ମନ୍ତ୍ରୀ ବେନ୍ନି ଗାଣ୍ଟଜଙ୍କ ସହ ଆଲୋଚନା କରିଛନ୍ତି। ବ୍ଲିଙ୍କେନ୍ ଗାଜାକୁ ମାନବୀୟ ସହାୟତା ବୃଦ୍ଧି ସମ୍ପର୍କରେ ମଧ୍ୟ ଇଜିପ୍ଟ ବହିର୍ବ୍ୟାପାର ମନ୍ତ୍ରୀ ସାମେହ ଶୋଉକ୍ରିଙ୍କ ସହ ଆଲୋଚନା କରିଛନ୍ତି।
ବିଶ୍ୱନେତାମାନଙ୍କ ଗୋଷ୍ଠୀ ‘ଦି ଏଲ୍ଡର୍ସ’ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କୁ ଏକ ଖୋଲାଚିଠି ପଠାଇଛି। ଗାଜାରେ ଇସ୍ରାଏଲର ଧ୍ୱଂସଲୀଳା ଓ ଗଣହତ୍ୟା ଆମେରିକାର ବିଶ୍ୱସନୀୟତା ଉପରେ ପ୍ରଶ୍ନଚିହ୍ନ ଲଗାଇଥିବା ଏଥିରେ ଉଲ୍ଲେଖ କରାଯାଇଛି।
