ଝାରସୁଗୁଡ଼ା ଅଫିସ/ବେଲପାହାଡ଼,୧୬ା୧୨: ବେଲପାହାଡ ପୌର ନିର୍ବାହୀ ଅଧିକାରୀଙ୍କ ତରଫରୁ ଗୁରୁବାର ୩ନଂ କାଉନିସଲ ବୈଠକ ଆହ୍ବାନ କରାଯାଇଥିଲା। ବୈଠକରେ ପୌର ଉପାଧ୍ୟକ୍ଷାଙ୍କ ସମେତ ୧୩ଜଣ କାଉନସିଲର ଅନୁପସ୍ଥିତ ରହିଥିଲେ। ଫଳରେ କୋରମ ଅଭାବରୁ ବୈଠକ ହୋଇପାରି ନ ଥିଲା। ଏହା ପୂର୍ବରୁ କାଉନସିଲ ବୈଠକ ଆହ୍ବାନ କରାଯାଇଥିବାବେଳେ ଏଥିରେ ଅଧିକାଂଶ କାଉନସିଲର ଯୋଗଦେଇ ନ ଥିଲେ। ଏଭଳି ସ୍ଥିତି ଲାଗିରହିବା ଫଳରେ ପୌରାଞ୍ଚଳର ଉନ୍ନୟନ ବାଧାପ୍ରାପ୍ତ ହୋଇ ଅଚଳାବସ୍ଥା ଦେଖାଦେଇଛି ା ଏ ନେଇ ପୌରାଧ୍ୟକ୍ଷ ନିମାଇଁ ଚରଣ ପଣ୍ଡାଙ୍କ ସମେତ ୫ଜଣ କାଉନସିଲର ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏଥିରେ ଉଲ୍ଲେଖ ରହିଛି ଗତ ଅଗଷ୍ଟ ୧୦ରେ ହେବାକୁ ଥିବା କାଉନସିଲ୍ ବୈଠକ ଶାରଦୀୟ ଦୁର୍ଗାପୂଜା, ଉପନିର୍ବାଚନ ଓ ବିଧାନସଭା ଅଧିବେଶନକୁ ଦୃଷ୍ଟିରେ ରଖି ୩ମାସ ପାଇଁ ସ୍ଥଗିତ କରାଯାଇଥିଲା। ସ୍ଥଗିତ ରହିଥିବା ବୈଠକ ଗୁରୁବାର କରିବାପାଇଁ ପୌର ପରିଷଦ ତରଫରୁ ସମସ୍ତ କାଉନସିଲରଙ୍କୁ ସୂଚନା ଦିଆଯାଇଥିଲା। ହେଲେ ବୈଠକରେ ପୌରଧ୍ୟକ୍ଷ ପଣ୍ଡା, ବିଧାୟିକା ଅଳକା ମହାନ୍ତିିଙ୍କ ସମେତ ୫ଜଣ କାଉନସିଲର ଉପସ୍ଥିତ ଥିବାବେଳେ ପୌର ଉପାଧ୍ୟକ୍ଷାଙ୍କ ସମେତ ୧୨ଜଣ କାଉନସିଲର ଅନୁପସ୍ଥିତ ରହିଥିଲେ। ଫଳରେ ଆଲୋଚନା ପାଇଁ ରହିଥିବା ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହୋଇପାରି ନ ଥିଲା। ପୌର ପରିଷଦର ଉନ୍ନତି ପାଇଁ ଲୋକେ ଜନପ୍ରତିନିଧିଭାବେ ନିର୍ବାଚିତ କରିଛନ୍ତି। ହେଲେ ସେମାନେ ବୈଠକରେ ଯୋଗଦେଇ ମତସାବ୍ୟସ୍ତ କରୁନାହାନ୍ତି। ଫଳରେ ପୌରାଞ୍ଚଳର ବିକାଶ ବଧାପ୍ରାପ୍ତ ହେଉଛି। ଏ ଦିଗରେ ଜିଲାପାଳ ସ୍ବତନ୍ତ୍ର ଦୃଷ୍ଟି ଦେବାପାଇଁ ପୌରାଧ୍ୟକ୍ଷ ପଣ୍ଡା ଦାବି କରିଛନ୍ତି। ଉପଧ୍ୟକ୍ଷା ରୀନା ସୁନା କହିଛନ୍ତି, ପୌର ନିର୍ବାହୀ ଅଧିକାରୀ ରେଜୋଲୁଶନ କରି କାଉନସିଲ୍ ବୈଠକ ଆହ୍ବାନ କରିବା କଥା। ହେଲେ ଏହା କରାଯାଉନାହିଁ। ଓ୍ବାର୍ଡର ବିଭିନ୍ନ ସମସ୍ୟା ନେଇ କାଉନସିଲରମାନେ ପୌର ପରିଷଦର ଅଧିକାରୀମାନଙ୍କୁ ଅବଗତ କଲେ ଏହାର ସମାଧାନ କରା ନ ଯାଇ ଲିଖିତଭାବେ ଜଣାଇବାପାଇଁ କୁହାଯାଉଛି। ଏଥିରେ କାଉନସିଲରମାନେ ଅସନ୍ତୋଷ ବ୍ୟକ୍ତ କରି କାଉନସିଲ ବୈଠକରେ ଯୋଗଦେଇନାହାନ୍ତି। ନିର୍ବାଚନ ହେବାର ଇତିମଧ୍ୟରେ ୮ମାସ ହେଲାଣି। ପ୍ରତିମାସରେ କାଉନସିଲ ବୈଠକ କରାଯିବା କଥା। ଅଦ୍ୟାବଧି ୩କାଉନସିଲ୍ ବୈଠକ ଆହ୍ବାନ କରାଯାଇଛି। ଏଭଳି ଅବ୍ୟବସ୍ଥା ନେଇ ପୂର୍ବରୁ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଛି ବୋଲି ସେ କହିଛନ୍ତି। ସୂଚନାଯୋଗ୍ୟ ବେଲପାହାଡ ପୌର ପରିଷଦ ୧୯ ଓ୍ବାର୍ଡକୁ ନେଇ ଗଠିତ। ଚଳିତ ନିର୍ବାଚନରେ ୧୪ଜଣ କାଉନସିଲର ବିଜେଡି ସମର୍ଥତ୍ତ, ୩ଜଣ ଭାଜପା ଓ ୨ କଂଗ୍ରେସ ସମର୍ଥତ୍ତ ବିଜୟୀ ହୋଇଛନ୍ତି। କଂଗ୍ରେସ ଦଳର ପୌରାଧ୍ୟକ୍ଷ ରହିଥିବାବେଳେ ବିଜେଡିର ଉପଧ୍ୟକ୍ଷା ରହିଛନ୍ତି।
