ତୁଣ୍ଡଲା,୪।୯(ଫିରୋଜ କୁମାର ଦାଶ):ଲୋକଙ୍କୁ ଉତ୍ତମ ସ୍ବାସ୍ଥ୍ୟ ସେବା ଯୋଗାଇ ଦେବାକୁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ଡାକ୍ତରଖାନାର ଉନ୍ନତି ପାଇଁ ଗୁରୁତ୍ୱ ଦେଉ ନ ଥିବାରୁ ଡାକ୍ତରଖାନାଗୁଡିକ ବିପଦପୂର୍ଣ୍ଣ ଅବସ୍ଥାରେ ରହିଥିବା ଦେଖିବାକୁ ମିଳିଛି। ଏପରି ପରିସ୍ଥିତି କଳାହାଣ୍ଡି ଜିଲା କେସିଙ୍ଗା ବ୍ଲକ ବେଲଖଣ୍ଡି ନୂତନ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଉପୁଜିଛି। ସୂଚନାଯୋଗ୍ୟ ଯେ, ରାଜ୍ୟ ସରକାର ୧୯୮୮ରେ ରଜାପଡା, ବାଦିପଡ଼ା, ଦିଗଶିରା, ସିର୍ଜାପାଲି, ହାତୀଖୋଜ, ସିଙ୍ଗାରିବାହାଲ, ପିପଲପଦର, ବେଲଖଣ୍ଡି, ଫଲସାପଡା,ସାହାଜପାଟି, ଅଞ୍ଚଳର ପାଖାପାଖି ୫୦ ହଜାର ଲୋକଙ୍କୁ ସ୍ବାସ୍ଥ୍ୟସେବା ଯୋଗାଇ ଦେବା ପାଇଁ ଏକ ପ୍ରାଥମିକ ଉପ ସ୍ବାସ୍ଥ୍ୟକେନ୍ଦ୍ର ନିର୍ମାଣ କରିଥିଲେ। ହେଲେ ବର୍ତ୍ତମାନ ଏହି ସ୍ବାସ୍ଥ୍ୟକେନ୍ଦ୍ର ଭଙ୍ଗାଦଦରା ହୋଇ ବିପଦ ଅବସ୍ଥାରେ ପଡିରହିଛି। କର୍ମଚାରୀମାନେ ମଧ୍ୟ ନିଜ ଜୀବନକୁ ବାଜି ଲାଗଇ ଏହି ଭଙ୍ଗାଦଦରା ଘରେ ଅନ୍ୟଙ୍କୁ ସ୍ବାସ୍ଥ୍ୟସେବା ଯୋଗାଉଛନ୍ତିି। ଏହି ସ୍ବାସ୍ଥ୍ୟକେନ୍ଦ୍ର ଉପରେ ବେଲଖଣ୍ଡି, ସିର୍ଜାପାଲି, ହାତୀଖୋଜ ପଞ୍ଚାୟତର ହାରାହାରି ପଚାଶ ହଜାର ଲୋକ ନିର୍ଭର କରନ୍ତି। ମିଳିଥିବା ସୂଚନା ଅନୁଯାୟୀ ଏହି ସ୍ବାସ୍ଥ୍ୟକେନ୍ଦ୍ରରେ ଆଜକୁ ପ୍ରାୟ ୩ବର୍ଷ ହେଲା ବର୍ଷା ଦିନେ ପାଣି ଝରୁଛି ଏବଂ ଭିତର ପଟୁ ବିଭିନ୍ନ ସମୟରେ ଚକଡା ଚକଡା ସିମେଣ୍ଟ ଖସିପଡ଼ୁଛି। ବର୍ତ୍ତମାନ ଚକଡାଗୁଡିକ ତଳେ ଖସି ଲୁହା ଛଡଗୁଡିକ ଦେଖାଯାଉଛି। ସେହିଭଳି ଡାକ୍ତରଖାନାରେ ଥିବା ଡ୍ରେସିଂ ରୁମ, ଡେଲିଭରି ରୁମ, ଔଷଧ ରଖାଯାଉଥିବା ଷ୍ଟକ ରୁମ, ଦୈନନ୍ଦିନ ରୋଗୀଙ୍କୁ ଦେଖୁଥିବା ରୁମ ଏବଂ ଅନ୍ୟାନ୍ୟ ରୁମଗୁଡିକ ମଧ୍ୟ ସମାନ ଅବସ୍ଥା। କେତେବେଳେ କଣ ଅଘଟଣ ଘଟିବ ତାହା ଆକଳନ କରାଯାଇପାରୁନାହିଁ। ଏହାକୁ ନେଇ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଜିଲା ପ୍ରଶାସନ ଓ ବିଭାଗୀୟ ଉଚ୍ଚକର୍ତ୍ତୃପକ୍ଷ ଦୃଷ୍ଟି ଦେଇ ନୂତନ ଘର ତିଆରି କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି।
