ବାହାନଗା,୫ା୧୨(ଡି.ଏନ.ଏ.): ପଶ୍ଚିମବଙ୍ଗକୁ ଚାଲାଣ ହେଉଥିବା ଗୋମାଂସ ବୋଝେଇ ଟ୍ରକ୍ ଶେରଗଡ ଟୋଲଗେଟ୍ ଭାଙ୍ଗି ପଳାଉଥିବା ବେଳେ ଲୋକେ ଗୋଡ଼ାଇ ଗୋଡ଼ାଇ ଧରିଛନ୍ତି। ଉକ୍ତ ଟ୍ରକ୍କୁ ବାଲେଶ୍ୱର ସଦର ଥାନା ନିକଟରୁ ବଜରଙ୍ଗ ଦଳର କର୍ମୀ ଓ କିଛି ସ୍ଥାନୀୟ ଲୋକେ ଅଟକାଇ ଖନ୍ତାପଡ଼ା ଥାନା ପୋଲିସକୁ ହସ୍ତାନ୍ତର କରିଛନ୍ତି। ଏହି ଟ୍ରକ୍ (ନଂ.ୟୁପି ୭୫ଏମ୪୪୭୮) ଯାଜପୁରରୁ ପଶ୍ଚିମବଙ୍ଗ ଯାଉଥିଲା।
ଟ୍ରକ୍ରେ ଗୋମାଂସ ଚାଲାଣ ହେଉଥିବା ନେଇ ବଜରଙ୍ଗ ଦଳର କର୍ମୀ ଖବର ପାଇଥିଲେ। ସେମାନେ ଶେରଗଡ଼ ଟୋଲଗେଟ ନିକଟରେ ମାଲ ବୋଝେଇ ଟ୍ରକ୍କୁ ଅଟକାଇବାକୁ ପ୍ରସ୍ତୁତ ହେଉଥିବା ବେଳେ ଗୋମାଂସ ବୋଝେଇ ଟ୍ରକ୍ ଡ୍ରାଇଭର ଟୋଲଗେଟ ନିକଟରେ ନ ଅଟକି ଗେଟ୍ ଭାଙ୍ଗି ପଳାଇଥିଲେ। ଲୋକେ ଗୋଡ଼ାଇ ଗୋଡ଼ାଇ ୧୬ ନଂ.ଜାତୀୟ ରାଜପଥର ସଦର ଥାନା ନିକଟସ୍ଥ ବ୍ରିଜ୍ଠାରେ ଅଟକାଇଥିଲେ। ସେଠାରୁ ଖନ୍ତାପଡ଼ା ଥାନାକୁ ଆଣିଥିଲେ। ଖବର ଲେଖାହେବା ଯାଏ ଥାନାରେ କୌଣସି ମାମଲା ରୁଜୁ ହୋଇ ନାହିଁ। ତେବେ ଟ୍ରକ୍ରେ କେତେ ଗୋମାଂସ ଅଛି ତାହା ଜଣାପଡ଼ିନାହିଁ। ଟ୍ରକ୍ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଛନ୍ତି। ମଙ୍ଗଳବାର ମାଜିଷ୍ଟ୍ରେଟଙ୍କ ଉପସ୍ଥିତିରେ ଟ୍ରକ୍ ଖୋଲାଯାଇ ଦେଖାଯିବ। ଟୋଲଗେଟକୁ ଧକ୍କା ମାରି ଭାଙ୍ଗି ଦେଇଥିବାରୁ ଟୋଲଗେଟ ମ୍ୟାନେଜର ଆସି ଅଭିଯୋଗ କରିବା ପରେ ମାମଲା ରୁଜୁ ହେବ ବୋଲି ପୋଲିସ ପକ୍ଷରୁ କୁହାଯାଇଛି।
